പാർട്ടിക്കും പൊതുസമൂഹത്തിനും വേണ്ടി ആത്മാർത്ഥതയോടെയും അചഞ്ചലമായ പ്രതിബദ്ധതയോടെയും പ്രവർത്തിച്ചിരുന്ന ഒരു പ്രിയ സഹപ്രവർത്തകനെയാണ് ഹിദൂർ മുഹമ്മദിന്റെ വിയോഗത്തിലൂടെ നഷ്ടമായിരിക്കുതെന്ന് എഐസിസി ജനറൽ സെക്രട്ടറി കെസി വേണുഗോപാൽ എംപി പറഞ്ഞു
പാർട്ടി ഏൽപ്പിച്ച ഓരോ ഉത്തരവാദിത്വവും പൂർണ ആത്മാർത്ഥതയോടെയും സമർപ്പണബോധത്തോടെയും നിർവഹിച്ചിരുന്ന ഹിദൂർ, തന്റെ രാഷ്ട്രീയ ജീവിതത്തിലുടനീളം നിലപാടുകളോടുള്ള പ്രതിബദ്ധത കാത്തുസൂക്ഷിച്ച വ്യക്തിയായിരുന്നു. പദവികളേക്കാൾ പ്രവർത്തനത്തിനും വ്യക്തിബന്ധങ്ങളേക്കാൾ സ്നേഹത്തിനും പ്രാധാന്യം നൽകിയ അദ്ദേഹത്തിന്റെ ലളിതമായ പെരുമാറ്റവും സൗഹൃദപരമായ സമീപനവും എല്ലാവരുടെയും ഹൃദയത്തിൽ ഇടം നേടിയിരുന്നു.
രാഷ്ട്രീയമായി വ്യത്യസ്ത നിലപാടുകളുള്ളവരോടുപോലും വ്യക്തിപരമായ സൗഹൃദവും ഹൃദയബന്ധവും കാത്തുസൂക്ഷിക്കാൻ അദ്ദേഹത്തിന് കഴിഞ്ഞിരുന്നു. അതായിരുന്നു ഹിദൂറിന്റെ ഏറ്റവും വലിയ പ്രത്യേകതകളിലൊന്ന്. സഹപ്രവർത്തകനെന്നതിലുപരി, ഏത് സമയത്തും ഒപ്പം നിൽക്കുന്ന ആത്മാർത്ഥ സുഹൃത്തായിരുന്നു അദ്ദേഹം. ഏറെ നാളത്തെ ആത്മബന്ധമാണ് തനിക്ക് ഹിദൂർ മുഹമ്മദിനോട് ഉണ്ടായിരുന്നത്. സമീപകാലത്ത് അദ്ദേഹത്തെ സന്ദർശിച്ചപ്പോഴും പൂർണ്ണ ആരോഗ്യവാനായി ജീവിതത്തിലേക്ക് മടങ്ങിയെത്തുമെന്ന് താൻ ഏറെ പ്രതീക്ഷിച്ചിരുന്നു.
പാർട്ടിയോടുള്ള അടിയുറച്ച വിശ്വാസവും, പൊതുപ്രവർത്തനത്തോടുള്ള ആത്മാർത്ഥതയും, ഹിദൂറിന്റെ ഓർമ്മകളെ എന്നും സജീവമാക്കി നിർത്തും. അദ്ദേഹത്തിന്റെ വിയോഗം കുടുംബത്തിനും സുഹൃത്തുക്കൾക്കും സഹപ്രവർത്തകർക്കും മാത്രമല്ല, പൊതുപ്രവർത്തന രംഗത്തിനാകെയും തീരാനഷ്ടമാണ്.
ഹിദൂറിന്റെ സ്നേഹനിർഭരമായ ഓർമ്മകൾക്ക് മുന്നിൽ ആദരാഞ്ജലികൾ അർപ്പിക്കുന്നു. അദ്ദേഹത്തിന്റെ കുടുംബത്തിന്റെയും പ്രിയപ്പെട്ടവരുടെയും അഗാധമായ ദുഃഖത്തിൽ പങ്കുചേരുന്നു.
