വിമാനയാത്ര നടത്തിയതില്‍ ഒരു രൂപ പോലും ഗവണ്‍മെന്റിന് ചെലവായിട്ടില്ല. സ്പോണ്‍സര്‍ ആരാണെന്ന് പറയേണ്ട കാര്യമില്ല : മുഖ്യമന്ത്രി

മന്ത്രിസഭായോഗത്തിന് ശേഷം മുഖ്യമന്ത്രി നടത്തിയ വാര്‍ത്താസമ്മേളനം (23/09/2026),   PART-2

വിമാനയാത്ര നടത്തിയതില്‍ ഒരു രൂപ പോലും ഗവണ്‍മെന്റിന് ചെലവായിട്ടില്ല. സ്പോണ്‍സര്‍ ആരാണെന്ന് പറയേണ്ട കാര്യമില്ല. മുഖ്യമന്ത്രി വിമാനമോ ഹെലികോപ്ടറോ ഉപയോഗിച്ചതില്‍ ഒരു രൂപ പോലും ഈ ഗവണ്‍മെന്റിന് ചെലവായിട്ടില്ല. നേരത്തെ ഹെലികോപ്ടര്‍ യാത്ര ചില മാധ്യമങ്ങള്‍ വിവാദമാക്കിയിരുന്നു. ഹെലികോപ്ടറിന്റെ എഗ്രിമെന്റ്് പ്രകാരം മാസം എണ്‍പത് ലക്ഷം രൂപ നല്‍കി ഇരുപത്തിയഞ്ച് മണിക്കൂര്‍ യാത്ര ചെയ്യാം. മൂന്നോ നാലോ മണിക്കൂറാണ് യാത്ര ചെയ്തത്. കഴിഞ്ഞ ഗവണ്‍മെന്റ് ഉണ്ടാക്കിയ കരാര്‍ പ്രകാരം മാസം എണ്‍പത് ലക്ഷം രൂപ നല്‍കണം. ഉപയോഗിച്ചാലും ഇല്ലെങ്കിലും എണ്‍പത് ലക്ഷം രൂപ കൊടുക്കണം. സെപ്റ്റംബര്‍ 19ന് ആ എഗ്രിമെന്റ് അവസാനിച്ചു. അത് രണ്ട് പ്രാവശ്യം ഉപയോഗിച്ചതല്ലാതെ എന്റെ യാത്രയ്ക്ക് വേണ്ടി ഒരു രൂപ പോലും സര്‍ക്കാരിന്റെ ഖജനാവില്‍ നിന്ന് ചെലവാക്കിയിട്ടില്ല. മലപ്പുറത്ത് വലിയൊരു ദുരന്തമുണ്ടായി ആറ് പേര്‍ മരിച്ചു. മുഖ്യമന്ത്രി ഡിസാസ്റ്റര്‍ മാനേജ്മെന്റ് കൂടി നോക്കുന്ന ആളാണ്. സെപ്റ്റംബര്‍ 21ന് തീയതി ശിവഗിരിയില്‍ ശ്രീനാരായണ ഗുരു സമാധിദിന പരിപാടിയില്‍ പങ്കെടുത്തതിന് ശേഷം അവിടെ എത്തണം. പോയില്ലെങ്കില്‍ 6 പേര് മരിച്ചിട്ടും മുഖ്യമന്ത്രി തിരിഞ്ഞു നോക്കിയില്ലെന്നായിരിക്കും വാര്‍ത്ത. പോകാന്‍ വേറെ മാര്‍ഗമില്ല. അപ്പോള്‍ പരിചയക്കാരന്‍ വിമാനം അറേഞ്ച് ചെയ്തു തന്നു. അതിലെന്താണ് തെറ്റ്?

സ്വകാര്യ വ്യക്തി അറേഞ്ച് ചെയ്ത വിമാനത്തിലാണ് പോയത്. അത് ആരാണെന്ന് വെളിപ്പെടുത്തണമെന്ന് സി.പി. എമ്മിന്റെ സെക്രട്ടറി എം.വി ഗോവിന്ദന്‍ പറയുന്നത് കേട്ടു. മുഖ്യമന്ത്രിയായിരുന്ന പിണറായി വിജയന്‍ സ്വകാര്യ വ്യക്തികള്‍ അറേഞ്ച് ചെയ്തുതന്ന വിമാനത്തിലും സ്വകാര്യ ഹെലികോപ്ടറിലും നിരവധി തവണ യാത്ര ചെയ്തിട്ടുണ്ട്. പേര് വെളിപ്പെടുത്തിയിട്ടുണ്ടോ? മലയാളി ആയ ഒരാള്‍ അറേഞ്ച് ചെയ്ത ഫ്ളൈറ്റിലാണ് ഞാന്‍ പോയത്. ആവശ്യമുണ്ടെങ്കില്‍ ഇനിയും പോകും. അതില്‍ എന്താണ് തെറ്റ്? ഒരു തെറ്റും അതില്‍ കാണുന്നില്ല. ഇതിന് മുന്‍പ് മുഖ്യമന്ത്രിമാരായിരുന്ന പിണറായി വിജയനും ഉമ്മന്‍ ചാണ്ടിയും സ്വകാര്യ വ്യക്തികള്‍ അറേഞ്ച് ചെയ്ത തന്ന വിമാനത്തില്‍ പോയിട്ടുണ്ട്. ആദ്യം സര്‍ക്കാരിന്റെ ഖജനാവില്‍ നിന്നും പണം മുടക്കിയാണ് യാത്രയെന്നായിരുന്നു വാര്‍ത്ത. ഖജനാവിലെ പണമല്ല എന്നറിഞ്ഞപ്പോള്‍ സ്വകാര്യവ്യക്തിയായി. ഇന്ത്യയിലെ എല്ലാ മുഖ്യമന്ത്രിമാരും അവരുടെ ഔദ്യോഗിക ഹെലികോപ്ടറിലും ഔദ്യോഗിക വിമാനത്തിലുമല്ലാതെ സ്വകാര്യവിമാനങ്ങളിലും ഹെലികോപ്ടറുകളിലും സഞ്ചരിക്കാറുണ്ട്. കേരളത്തിലെ മുന്‍മുഖ്യമന്ത്രിമാര്‍ സഞ്ചരിച്ചിട്ടുണ്ട്. ഞാന്‍ ഇപ്പോള്‍ സഞ്ചരിച്ചു. ഞാന്‍ ഇനിയും സഞ്ചരിക്കും.

എന്തെങ്കിലും ലാഭേച്ഛയോടെയാണ് വിമാനം വിട്ടുതന്നതെങ്കില്‍ മുന്‍ മുഖ്യമന്ത്രിക്കും അങ്ങനെയാണോ നല്‍കിയത്? കേരളത്തില്‍ വിമാനം സ്വന്തമായി ഉള്ളത് ആര്‍ക്കൊക്കെയാണെന്ന് എല്ലാവര്‍ക്കുമറിയാം. അവരൊക്കെ പ്രധാനപ്പെട്ട ആളുകളാണ്. അത്യാവശ്യത്തിന് കേരളത്തിലെ മുഖ്യമന്ത്രിക്ക് ഒരു ദുരന്തസ്ഥലത്തേയ്ക്ക് യാത്ര ചെയ്യാന്‍ വിമാനം നല്‍കിയതിന് നാളെ ഒരു ഔദാര്യം കൈപ്പറ്റാന്‍ വരുന്നവരല്ല അവര്‍. അങ്ങനെ ഔദാര്യം ചോദിച്ചു വന്നാല്‍ ചെയ്തു നല്‍കുന്ന ഗവണ്‍മെന്റുമല്ല കേരളത്തിലുള്ളത്. പിണറായി വിജയന്‍ സ്വകാര്യ വ്യക്തികള്‍ നല്‍കിയ വിമാനം പല തവണ ഉപയോഗിച്ചിട്ടുണ്ട്. അങ്ങനെ പോകേണ്ടി വരും. പ്രതിപക്ഷ നേതാവെന്ന നിലയില്‍ അത് ചോദ്യം ചെയ്തിട്ടില്ല. പ്രതിപക്ഷം അതിനെ പരിഹസിച്ചിട്ടില്ല. വിമാനം നല്‍കിയവരുടെ പേര് ആവശ്യപ്പെട്ടിട്ടില്ല. വെറുതെ അവരുടെ പേര് വലിച്ചിഴച്ച് വഷളാക്കേണ്ട. മുഖ്യമന്ത്രിക്ക് വിമാനം നല്‍കിയത് കൊണ്ട് അവര്‍ ഔദാര്യം ചോദിച്ചു വരുമെന്ന തരത്തില്‍ ചര്‍ച്ചകള്‍ കൊണ്ടു പോകേണ്ട കാര്യമില്ല.

സംസ്ഥാനത്തിന്റെ ഖജനാവിന് നഷ്ടമുണ്ടാകുന്ന തരത്തില്‍ നമ്മള്‍ ഒന്നും ചെയ്യാറില്ല. നേരത്തെ സംസ്ഥാനത്തിന്റെ ധനസഥിതി മോശമാണെന്ന മെസേജ്, വൈറ്റ് പേപ്പര്‍ നല്‍കിയിരുന്നു. ആ മെസേജ് കൊടുത്തിട്ട് നമ്മള്‍ ധൂര്‍ത്ത് ആയിട്ട് ഒന്നും ചെയ്യാന്‍ പറ്റില്ല. അത് കൊണ്ടാണ് പുതിയ വാഹനങ്ങള്‍ വേണ്ടെന്ന് വച്ചത്. ഇപ്പോള്‍ അത് പുന:പരിശോധിക്കേണ്ട സ്ഥിതിയാണ്. മുഖ്യമന്ത്രി തന്നെ പഴയ വാഹനത്തിലാണ് സഞ്ചരിക്കുന്നത്. 2017ല്‍ വാങ്ങിയ വണ്ടികളാണ് പല മന്ത്രിമാരും ഉപയോഗിക്കുന്നത്. പത്ത് കൊല്ലത്തോളം പഴക്കമുളള വണ്ടികളാണ്. പലതും വഴിയില്‍ നിന്നു പോകുന്നുണ്ടെന്ന് മന്ത്രിമാര്‍ പറയുന്നുണ്ട്. ഇതിന് മുന്‍പുള്ള മന്ത്രിമാര്‍ ഉപയോഗിച്ച വണ്ടികളാണ് ഇപ്പോഴത്തെ മന്ത്രിമാര്‍ ഉപയോഗിക്കുന്നത്. സാധാരണക്കാര്‍ ഉപയോഗിക്കുന്നത് പോലെയല്ല മന്ത്രിമാര്‍ വാഹനങ്ങള്‍ നന്നായി ഉപയോഗിക്കും. ജുഡീഷ്യല്‍ ഓഫീസര്‍മാര്‍ പുതിയ വാഹനങ്ങള്‍ വാങ്ങുമ്പോള്‍ പഴയവ തിരിച്ചു നല്‍കും. അങ്ങനെ കിട്ടിയ വണ്ടികളാണ് പല മന്ത്രിമാരും ഉപയോഗിക്കുന്നത്. മുഖ്യമന്തിമാരും മന്ത്രിമാരും പുതിയ വാഹനങ്ങള്‍ വാങ്ങിച്ചതു കൊണ്ട് സംസ്ഥാനത്തിന്റെ ധനസഥിതി തകര്‍ന്നു പോകില്ല. മുകളിലിരിക്കുന്ന ആളുകള്‍ താഴേക്ക് നല്ല മെസേജ് കൊടുക്കുന്നതിനാണ് ധനവകുപ്പ് ഇങ്ങനെയൊരു നിയന്ത്രണം ഏര്‍പ്പെടുത്തിയത്. സ്ഥിതി മെച്ചപ്പെടുന്നതിന് അനുസരിച്ച് മാറാമെന്ന് പറഞ്ഞിട്ടുണ്ട്. മന്ത്രിമാര്‍ യാത്ര ചെയ്യുമ്പോള്‍ വഴിയില്‍ കിടക്കാന്‍ പറ്റുമോ. മന്ത്രി കെ.എം ഷാജി ഉപയോഗിക്കുന്ന വാഹനം പത്ത് കൊല്ലം പഴയതാണ്. പലപ്പോഴും വഴിയില്‍ കേടായി പോകുന്നു. അതു കൊണ്ട് സുഹൃത്തിന്റെ വണ്ടിയില്‍ യാത്ര ചെയ്തു. അതിലെന്താണ് തെറ്റ്. മുന്‍പും മന്ത്രിമാരു മുഖ്യമന്ത്രിയും, പിണറായി വിജയനല്ല, വേറെ വണ്ടികളില്‍ യാത്ര ചെയ്തിട്ടുണ്ട്. മന്ത്രിമാര്‍ സ്വന്തം വണ്ടി ഉപയോഗിക്കുന്നതിനും വേറെ വണ്ടികള്‍ ഉപയോഗിക്കുന്നതിനും പെര്‍മിഷന്‍ കൊടുക്കാറുണ്ട്.

മന്ത്രിമാര്‍ വിദേശത്ത് പോയതിന് എന്താണ് ഇത്രയും വാര്‍ത്ത. ഞാനാണ് അവരോട് പറഞ്ഞത് പോയി വരാന്‍. വിവിധ പരിപാടികളില്‍ പങ്കെടുത്ത് ലോകരാജ്യങ്ങളില്‍ എന്താണ് നടക്കുന്നത് എന്ന് അറിഞ്ഞ് വാ എന്ന് ഞാനാണ് പറഞ്ഞത്. നമുക്ക് ഇവിടെ പലതും ചെയ്യാനുളളതാണ്. മുഖ്യമന്ത്രിയുടെ മുന്നില്‍ യാത്രയ്ക്കുള്ള അപേക്ഷ വരുമ്പോള്‍ ചെലവ്് വരുന്നുണ്ടോ എന്നാണ് നോക്കുന്നത്്. ചെലവ് ഇല്ല. ചെലവ് ഇല്ലാതെ ആദ്യമായിട്ടല്ല മന്ത്രിമാര്‍ വിദേശയാത്ര നടത്തുന്നത്. സംഘടനകളുടെ ചെലവില്‍ മന്ത്രിമാര്‍ വിദേശത്തേക്ക് പോയി എന്നാണ് വാര്‍ത്തകള്‍ വന്നത്. മുന്‍പ് പോയവരുടെ കണക്ക് വായിച്ച് ഞാന്‍ ആരെയും അപമാനിക്കാനോ കളിയാക്കാനോ കുറ്റപ്പെടുത്താനോ ഇല്ല. യു. എ. ഇയില്‍ മാത്രം ആയിരത്തിലധികം സംഘടനകളുണ്ട്. പ്രത്യേകിച്ച് ഒരു പുതിയ ഗവണ്‍മെന്റ് വന്നിരിക്കുന്ന സാഹചര്യത്തില്‍ മുഖ്യമന്ത്രിയെയും മന്ത്രിമാരെയും പരിപാടികളില്‍ പങ്കെടുപ്പിക്കണമെന്ന് അവര്‍ ആഗ്രഹിക്കും. അവര്‍ തന്നെ ടിക്കറ്റ് എടുത്ത് നല്‍കും. മന്ത്രിമാര്‍ രണ്ട് മൂന്ന് ദിവസം പോയി വരുന്നതിന് എന്തിനാണ് ഇങ്ങനെ വാര്‍ത്തയാക്കുന്നത്. വ്യക്തികളും സംഘടനകളും ലാഭേച്ഛയോടെയല്ല ഇങ്ങനെ ചെയ്യുന്നത്. ഞാന്‍ കഴിഞ്ഞ അഞ്ച് വര്‍ഷം പ്രതിപക്ഷ നേതാവായിരുന്നപ്പോള്‍ പല യാത്രകളും നടത്തിയിട്ടുണ്ട്. ഒരു യാത്രയ്ക്ക് പോലും ചെലവ് വാങ്ങിച്ചിട്ടില്ല. പേഴ്സണല്‍ സ്റ്റാഫിനെ കൂടെ കൊണ്ടു പോകാം. പക്ഷേ ചെലവ് ഒഴിവാക്കാനായി അങ്ങനെ ചെയ്യാറില്ല. കൊച്ചിയില്‍ നിന്ന് തിരുവനന്തപുരത്തേയ്ക്കും, കണ്ണൂരിലേക്കുമൊക്കെ വിമാനത്തില്‍ യാത്ര ചെയ്യേണ്ടി വരുമ്പോള്‍ ഗണ്‍മാനെ പോലും കൂട്ടാറില്ല. ഡല്‍ഹിയില്‍ ഒറ്റയ്ക്ക് പോകുന്ന മുഖ്യമന്ത്രി ഞാനാണ്. ഒരാളെയും കൂട്ടാറില്ല. അവിടെ പോലീസുണ്ട്. ചെലവ് ഒഴിവാക്കാനാണ് അങ്ങനെ ചെയ്യുന്നത്. എന്തായാലും എന്റെ ടിക്കറ്റ് എടുക്കണം. രണ്ട് പേരുടെ വേണ്ടല്ലോ. ഇങ്ങനെ വരണ്ടെന്ന് ഡി.ജി.പിയും ചീഫ് സെക്രട്ടറിയും ഡല്‍ഹി പോലീസും പറഞ്ഞു. ലാളിത്യം കാണിക്കാനല്ല ഒരു സഥാനത്ത് ഇരിക്കുമ്പാള്‍ നമ്മള്‍ ഒരു മെസേജ് കൊടുക്കണം അതിനാണ്. സുഹൃത്തുക്കളോ സംഘടനകളോ ടിക്കറ്റ് എടുത്ത് കൊടുത്തു എന്ന് കരുതി ആകാശം ഇടിഞ്ഞു വീഴില്ല. ഇഷ്ടം പോലെ മുന്‍ മന്ത്രിമാരും മുന്‍ മുഖ്യമന്ത്രിയും ഔദ്യോഗിക ചെലവിലല്ലാതെ ഇങ്ങനെ വിദേശയാത്ര നടത്തിയിട്ടുണ്ട്. എന്റെ കൈയില്‍ കണക്കുണ്ട്. അത് പറയുന്നില്ല. എന്തിനാണ് സര്‍ക്കാരിന്റെ പണം ചെലവാക്കുന്നത്. അല്ലാതെ കിട്ടിയാല്‍ പോകാമല്ലോ. ഇതിന് മുന്‍പു പോയിട്ടുണ്ട്. അവരുടെയൊന്നും പേര് വലിച്ചിഴക്കേണ്ട കാര്യമില്ല.

ദുരന്തനിവാരണ നിധിയിലെ പണം കൊണ്ട് വിമാനയാത്ര നടത്തില്ല. ദുരന്തനിവാരണ നിധിയിലേക്ക് ആളുകള്‍ പണം തരുന്നത് പാവങ്ങളെ സഹായിക്കാന്‍ വേണ്ടിയാണ്. ഇപ്പോള്‍ തന്നെ പത്ത് പേര്‍ക്ക് എട്ടു ലക്ഷം രൂപ വീതം നല്‍കി. അതിനുള്ള പൈസയാണ്. അത് മുഖ്യമന്ത്രിക്ക് വിമാനത്തില്‍ പോകാനുള്ള പൈസയല്ല. അതില്‍ നിന്ന് പണം എടുക്കില്ല. വിമാനത്തില്‍ പോകേണ്ടി വന്നത് എന്തെന്നാല്‍ മുഖ്യമന്ത്രി അവിടെ പോകണമായിരുന്നു. ആറ് പേര്‍ മരിച്ചു എന്നുള്ളത് ഞെട്ടിക്കുന്ന സംഭവമാണ്. മാത്രമല്ല ഒരു മഴ പോലും എന്തിന് മഴക്കാറ് പോലുമില്ലാത്ത സമയത്താണ് മഴ പെയ്തത്. നൂറോളം പേര്‍ ആ സമയത്ത് പുഴയിലുണ്ടായിരുന്നു. ദുരന്തനിവാരണത്തില്‍ രാജ്യത്ത് തന്നെ മാതൃകയാകുന്ന സംഭവം ചെയ്തു കൊണ്ടിരിക്കുകയാണ്. ആ സ്പോട്ടില്‍ ചെന്ന് അത് പരിശോധിക്കണമെന്ന് തോന്നി. മാത്രമല്ല പ്രദേശത്തുള്ളവരും ദുരന്തത്തില്‍പ്പെട്ടവരുടെ കുടുംബങ്ങളുമെല്ലാം പെട്ടെന്ന് നടുക്കത്തിലായിരുന്നു. മുഖ്യമന്ത്രിയുടെ സാന്നിദ്ധ്യം അവിടെ വേണമായിരുന്നു. അത് കൊണ്ടാണ് പോയത്. ഇതിന് മുന്‍പും മുഖ്യമന്ത്രിയും മന്ത്രിമാരുമൊക്കെ അങ്ങനെ അടിയന്തരമായി പോയിട്ടുണ്ട്.

ലോക മാരിടൈം ദിനമായ സെപ്റ്റംബര്‍ 24 ന് ഓഷ്യനേറിയത്തിന്റെയും ഇന്റര്‍നാഷണല്‍ മാരിടൈം മ്യൂസിയത്തിന്റെയും കാര്യത്തില്‍ സുപ്രധാനമായ പ്രഖ്യാപനം ഉണ്ടാകും. കേരളത്തെ തുറമുഖ നഗരമായി മാറ്റുക എന്ന സര്‍ക്കാരിന്റെ സ്വപ്നം സാക്ഷാത്കരിക്കാനുള്ള ഗൃഹപാഠം ചെയ്തുകൊണ്ടിരിക്കുകയാണ്. അതിനുള്ള ചിട്ടയായ കാര്യങ്ങള്‍ ചെയ്തുവരുന്നു. തുറമുഖത്തിന് അകത്തും പുറത്തും ധാരാളം നിക്ഷേപങ്ങള്‍ വരുന്നുണ്ട്. അതിന്റെ മാതൃകകളെ പറ്റി പോര്‍ട്ട് സിറ്റിയ്ക്കുവേണ്ടിയുള്ള റൗണ്ട് ടേബിള്‍ കോണ്‍ഫറന്‍സില്‍ പ്രത്യേകമായി ചര്‍ച്ച നടത്തി. അഞ്ചാറ് വിഷയങ്ങള്‍ ഗവണ്‍മെന്റ് നന്നായി ശ്രദ്ധ കേന്ദ്രീകരിക്കുന്നുണ്ട്. പോര്‍ട് സിറ്റി, ഏവിയേഷന്‍ ഹബ്, എംഎസ്എംഇ, ഭാവി സാങ്കേതികവിദ്യയുടെ ഭാഗമായ സെമി കണ്ടക്ടര്‍ , ഡാറ്റ സെന്റര്‍, ഗ്ലോബല്‍ കേപ്പബിലിറ്റി സെന്റര്‍, ഡിസാസ്റ്റര്‍ മാനേജ്‌മെന്റിന് ഇന്ത്യയ്ക്കായി പ്രത്യേകമൊരു മോഡല്‍, സില്‍വര്‍ ഇക്കോണമി എന്നിവയിലൊക്കെ ഗവണ്‍മെന്റ് കൂടുതല്‍ പ്രാധാന്യം കൊടുക്കുന്നു. ആ മേഖലയിലേയ്ക്ക് വലിയ നിക്ഷേപം കേരളത്തിനു പുറത്തുനിന്നും രാജ്യത്തിനു പുറത്തുനിന്നും വരുന്നുണ്ട്. ഒന്നില്‍ കൂടുതല്‍ ആളുകള്‍ വരുന്നതിനാല്‍ വളരെ സുതാര്യമായി ഏതൊക്കെ കാര്യങ്ങളിലാണ് താല്‍പ്പര്യപത്രം ക്ഷണിക്കേണ്ടത് എന്നതെല്ലാം ആലോചിച്ച് തീരുമാനിക്കും. കൂടുതല്‍ മാനുഫാക്ചറിങ് പാര്‍ക്കുകള്‍ സ്ഥാപിക്കും. ഹെല്‍ത്ത് സയന്‍സ് പാര്‍ക്ക്, ആരോഗ്യമേഖലയിലെ ഉപകരണങ്ങള്‍ നിര്‍മിക്കാനുള്ള പാര്‍ക്ക്, ദന്തചികിത്സാ ഉപകരണങ്ങള്‍ നിര്‍മിക്കാനുള്ള പാര്‍ക്കുകള്‍ എന്നിവയ്ക്കായി സൗകര്യമൊരുക്കും. അങ്ങനെ സാമ്പത്തിക പ്രവര്‍ത്തനം മെച്ചപ്പെടുത്തുന്നതിനുള്ള ശ്രമങ്ങളുണ്ടാകണം. അതോടൊപ്പം വിനോദസഞ്ചാര മേഖലയുടെ വലിയ സാധ്യതകളും വിനിയോഗിക്കും.

ഹെലികോപ്ടറിന്റെ എഗ്രിമെന്റിന്റെ കാര്യത്തില്‍ ആലോചിച്ച് തീരുമാനമെടുക്കും.ഈ മാസം പത്തൊന്‍പതിന് ആ കമ്പനിയുമായുള്ള എഗ്രിമെന്റ് തീര്‍ന്നു. മാത്രമല്ല വലിയ ഒരു തുകയാണതെന്ന് ആക്ഷേപമുണ്ടായിരുന്നു. ഇരുപത്തിയഞ്ച് മണിക്കൂര്‍ യാത്ര ചെയ്യണം. പോലീസും ഡിസാസ്റ്റര്‍ മാനേജ്മെന്റും ഇത് അത്യാവശ്യമാണെന്ന് പറഞ്ഞിട്ടുണ്ട്. ഇതിന്റെ പൈസ പകുതിയാക്കി കുറയ്ക്കാന്‍ പറ്റുമോ എന്നാണ് ആലോചിക്കുന്നത്. അവയവങ്ങള്‍ കൊണ്ടുപോകാനും അത്യാവശ്യ കാര്യങ്ങളള്‍ക്കും വേണ്ടി വരും. പോലീസിന് ഈ സൗകര്യം വേണമെന്ന് കേന്ദ്ര ഗവണ്‍മെന്റ് നിര്‍ദേശവമുണ്ട്. പക്ഷേ ഇത്രയും പൈസ അനാവശ്യമാണെന്ന് എനിക്ക് തോന്നി. എണ്‍പത് ലക്ഷം രൂപയാണ് ഒരു മാസം വേണ്ടത്. ആറു മാറത്തെ പണം ഈ സര്‍ക്കാരാണ് കൊടുക്കേണ്ടത്. ഒരു വര്‍ഷം പത്ത് കോടിയോളം രൂപ വേണ്ടി വരും. പൈസ കുറയ്ക്കുന്നതിനുള്ള ഓപ്ഷന്‍സ് ആലോചിച്ച് കൊണ്ടിരിക്കുകയാണ്. അല്ലെങ്കില്‍ പഴയ എഗ്രിമെന്റ് തുടര്‍ന്നാല്‍ മതിയായിരുന്നല്ലോ. നമ്മള്‍ എല്ലാ വഴിക്കും ഗവണ്‍മെന്റ് ചെലവുകള്‍ കുറച്ചു കൊണ്ടു വരാനാണ് ശ്രമിക്കുന്നത്. നമ്മുടെ എക്കണോമിക്ക് മോഡല്‍ എന്നുള്ളത് അനാവശ്യമായ ചെലവുകള്‍ കുറയ്ക്കുക. രണ്ടാമാതായി ഖജനാവിലെ പണം പലവഴിക്ക് ചെലവാക്കാനാണ് ശ്രമിക്കുന്നത്. ഓണത്തിന് ഒരു പരീക്ഷണം നടത്തി, അത് കൊണ്ട് വരുമാനം വര്‍ധിച്ചു. ഹെലികോപ്ടറിന്റെ എഗ്രിമെന്റിന്റെ കാര്യത്തില്‍ ആലോചിച്ച് തീരുമാനമെടുക്കും.

വെള്ളപ്പൊക്ക ദുരിതാശ്വാസം വിതരണം ചെയ്യാത്തത് ഫീല്‍ഡ് വെരിഫിക്കേഷന്‍ നടക്കാത്തതല്ല, പരിശോധന നടക്കാത്തതാണ്. പൈസ കൃത്യമായി എല്ലായിടത്തേക്കും അനുവദിച്ചിട്ടുണ്ട്. ആലപ്പുഴ ജില്ലയ്ക്കും പത്തനംതിട്ട ജില്ലയ്ക്കും പണം അനുവദിച്ചിട്ടുണ്ട്. പണം ജില്ലാ കളക്ടര്‍മാരുടെ അക്കൗണ്ടിലുണ്ട്. പലയിടത്തും അനര്‍ഹരായ ആളുകള്‍ വലിയ ആവശ്യങ്ങള്‍ ഉന്നയിക്കുകയാണ്. ആ സാഹചര്യത്തില്‍ സൂക്ഷ്മമായ പരിശോധന നടത്തണം. റവന്യൂ വകുപ്പിന്റെ നേതൃത്വത്തില്‍ സൂക്ഷ്മ പരിശോധന നടത്തും. അര്‍ഹരായവര്‍ക്ക് പണം കൊടുക്കും. ജില്ലാ കളക്ടര്‍മാര്‍ ആവശ്യപ്പെട്ട തുക അവരുടെ അതത് അക്കൗണ്ടിലേക്ക് അനുവദിച്ചിട്ടുണ്ട്. ഇനിയും കൂടുതല്‍ ആവശ്യപ്പെട്ടാല്‍ അനുവദിക്കും. ഗവണ്‍മെന്റിന്റെ ഭാഗത്ത് നിന്ന് വീഴ്ചയില്ല. അനര്‍ഹരായ പലരും പണം മേടിച്ചെടുക്കാന്‍ ശ്രമിക്കുന്നുണ്ട്. ഇക്കാര്യത്തില്‍ സൂക്ഷ്മമായ പരിശോധന വേണമെന്ന് റവന്യു വകുപ്പ് നിര്‍ദേശിച്ചതിന്റെ അടിസ്ഥാനത്തിലുള്ള ചെറിയ കാലതാമസമാണ് ഉണ്ടായിട്ടുള്ളത്. അര്‍ഹരായ ആര്‍ക്കും കിട്ടാതെ പോകില്ല. വീട്ടില്‍ വെള്ളം കയറിയ എല്ലാവര്‍ക്കും പണം ഉറപ്പായും കൊടുത്തിരിക്കും.

വൈദ്യുതി പ്രതിസന്ധി പരിഹരിക്കുന്നതിന് താല്‍ക്കാലിക അടിസഥാനത്തിലും ദീര്‍ഘകാല അടിസ്ഥാനത്തിലും കാര്യങ്ങള്‍ ചെയ്തു കൊണ്ടിരിക്കുകയാണ്. ഇന്ത്യയിലെ എല്ലാ സംസ്ഥാനങ്ങളിലും പവര്‍കട്ടുണ്ട്. പഞ്ചാബില്‍ പത്ത് മണിക്കൂറാണ് പവര്‍കട്ട്. തമിഴ്നാട്ടിലും കര്‍ണാടത്തിലും തുടങ്ങി എല്ലാ സംസ്ഥാനങ്ങളിലും പവര്‍ കട്ടുണ്ട്. നമ്മള്‍ നേരിടുന്ന് രണ്ട് മൂന്ന് പ്രശ്നങ്ങളാണ്. ദീര്‍ഘകാല കരാര്‍ ഇല്ലാതായി. ഇരുപത്തിയഞ്ച് വര്‍ഷത്തേക്ക് 465 മെഗാവാട്ട് വൈദ്യുതി ലഭിക്കുന്ന ദീര്‍ഘകാല കരാര്‍ കഴിഞ്ഞ ഗവണ്‍മെന്റ് റദ്ദാക്കി. പകരം എഗ്രിമെന്റ് വച്ചതുമില്ല. കേരളം പോലെയൊരു സംസഥാനത്തിന് ഒരു ലോംഗ് ടേം എഗ്രിമെന്റ് വേണമായിരുന്നു. ഇരുപത്തിയഞ്ച് വര്‍ഷത്തേക്കുള്ള ലോംഗ് ടേം എഗ്രിമെന്റ ഇല്ലാതായതാണ് ഒന്നാമത്തെ വലിയ വിഷയം. ഉപഭോഗം കൂടിയതാണ് രണ്ടാമത്തെ വിഷയം. കഴിഞ്ഞ വര്‍ഷം സെപ്റ്റംബറിലേക്കാള്‍ തൊളളായിരത്തി അമ്പതോളം മെഗാവാട്ട് വൈദ്യുതി ഉപഭോഗം ഈ സെപ്റ്റംബര്‍ ആയപ്പോള്‍ കൂടി. ഇത് മുന്‍കൂട്ടി കണ്ട് പ്ലാന്‍ ചെയ്യാന്‍ കഴിഞ്ഞില്ല. മൂന്നാമതായി വൈദ്യുതി മേടിക്കുന്നതായിരുന്നു അടുത്ത വഴി. പല സംസ്ഥാനങ്ങളിലും പ്രതിസന്ധിയുള്ളതിനാല്‍ പഴയത് പോലെ വൈദ്യുതി കിട്ടാനില്ല. 150 മെഗാവാട്ട് ഒഡീഷയില്‍ നിന്നും 150 മെഗാവാട്ട് ന്യൂക്ലിയര്‍ പവര്‍ കോര്‍പ്പറേഷനില്‍ നിന്നും 200 മെഗാവാട്ട് മറ്റ് പലയിടങ്ങളില്‍ നിന്നുമായി വാങ്ങിച്ചു. പിന്നെ മെയിന്റനന്‍സിനായി അടച്ചിട്ടിരുന്ന ഒരു ജനറേറ്റര്‍ പെട്ടെന്ന് മെയിന്റനന്‍സ് തീര്‍ത്ത് അതു വഴി 150 മെഗാവാട്ട് ഉത്പാദിപ്പിച്ചു. അങ്ങനെ 650 മെഗാവാട്ട് വൈദ്യുതി കിട്ടും. ഇന്ന് ന്യൂക്ലിയര്‍ പവര്‍ കോര്‍പ്പറേഷണന്‍ 150 മെഗാവാട്ട് വൈദ്യുതി കൂടി ലഭ്യമാക്കും. 4 രൂപ 65 പൈസയ്ക്കാണ് അത് കിട്ടിയത്. അങ്ങനെ ഒരു നിയന്ത്രണത്തിലേക്ക് കൊണ്ടു വരാന്‍ കഴിഞ്ഞിട്ടുണ്ട്. ഒക്ടോബര്‍ ഒന്ന് മുതല്‍ അടുത്ത മണ്‍സൂണ്‍ വരെയുള്ള ഒരു ലോംഗ് ടേം പോളിസി തയ്യാറാക്കുന്നതിന് നാളെ വിശാലമായ ഒരു യോഗം വിളിച്ചിട്ടുണ്ട്. വേണമെങ്കില്‍ ആറ് മാസത്തേയ്ക്ക് എഗ്രിമെന്റ് അല്ലെങ്കില്‍ ദീര്‍ഘകാലത്തേയക്ക് എഗ്രിമെന്റ് വയ്ക്കും. നമ്മുടെ സാമ്പത്തിക സ്ഥിതി അനുസരിച്ചാണ് വൈദ്യുതി വാങ്ങുന്നത്. 650 മെഗാവാട്ട് പുതിയതായി കൊണ്ടുവരാന്‍ പറ്റിയിട്ടുണ്ട്. പൂര്‍ണ്ണമായി പരിഹരിക്കാന്‍ കഴിയും.

ദേവസ്വം ബോര്‍ഡും സര്‍ക്കാരും തമ്മില്‍ തര്‍ക്കങ്ങളില്ല. മുഖ്യമന്ത്രിയുടെ അധ്യക്ഷതയില്‍ തന്നെ യോഗം ചേര്‍ന്ന് എന്തൊക്കെ കാര്യങ്ങള്‍ ചെയ്തുതീര്‍ക്കണം എന്ന കാര്യത്തില്‍ വ്യക്തത വരുത്തിയിട്ടുണ്ട്. ശബരിമലയില്‍ ദേവസ്വം ബോര്‍ഡ് മുന്‍കൂട്ടി ചെയ്യേണ്ട ചില കാര്യങ്ങളില്‍ ചെറിയൊരു കാലതാമസം വന്നിട്ടുണ്ട്. ദേവസ്വം ബോര്‍ഡിന്റെ കുറവ് അവരുടെ ശ്രദ്ധയില്‍ പെടുത്തിയിട്ടുണ്ട്. അത് കൃത്യമായി വിലയിരുത്തുന്നുണ്ട്. ശബരിമല സീസണ്‍ വരാന്‍ പോകുന്ന സമയത്ത് ദേവസ്വവും സര്‍ക്കാരും തമ്മില്‍ തര്‍ക്കിക്കാനൊന്നും പോകില്ല. ചിലകാര്യങ്ങളില്‍ ഇടനിലക്കാരുണ്ട്, അവരൊക്കെകൂടി ചില കളികള്‍ നടത്തുന്നുണ്ട് എന്ന് ദേവസ്വം ബോര്‍ഡ് പ്രസിഡന്റ് തന്നെ പറഞ്ഞിട്ടുണ്ടല്ലോ.

കേരളത്തിന്റെ ചരിത്രത്തില്‍ ഇന്നു വരെ കൊടുക്കാത്തത്ര തുകയാണ് ഈ ശബരിമല കാലത്തിനായി സര്‍ക്കാര്‍ അനുവദിച്ചത്. ശബരിമലയിലേയ്ക്ക് വിവിധ ഭാഗങ്ങളില്‍ നിന്ന് എത്തിച്ചേരാനുള്ള റോഡുകളുടെ പണിക്ക് അറുനൂറിലേറെ കോടി രൂപ സര്‍ക്കാര്‍ അനുവദിച്ചു. പമ്പയിലെ കഴിഞ്ഞ യോഗത്തില്‍ ചാലക്കയത്തുനിന്നു പോകുന്ന റോഡ് നന്നാക്കണമെന്ന് അവശ്യം ഉയര്‍ന്നിരുന്നു. അഞ്ച് കിലോമീറ്റര്‍ റോഡിന്റെ പണിയ്ക്കുള്ള നടപടികള്‍ അതിവേഗത്തിലാണ് പൂര്‍ത്തിയാക്കിയത്.

ഇത്രയേറെ തീര്‍ഥാടകര്‍ വരുന്ന ശബരിമലയില്‍ എന്ത് ആവശ്യമുണ്ടായാലും സര്‍ക്കാര്‍ എല്ലാത്തിനും തയ്യാറാണ്. തീര്‍ഥാടന കാലം പരാതികളില്ലാതെ കൊണ്ടുപോകണമെന്നാണ് സര്‍ക്കാര്‍ ആഗ്രഹിക്കുന്നത്. അതിനായി പോലീസിനും ഫയര്‍ഫോഴ്‌സിനും മാര്‍ഗനിര്‍ദേശം കൊടുത്തിട്ടുണ്ട്. ശബരിമലയുടെയും സമീപപ്രദേശങ്ങളുടെയും ചുമതലയുള്ള ജില്ലാ ജഡ്ജിയുമായി സംസാരിച്ചിട്ടുണ്ട്. അദ്ദേഹത്തെ ഇനി നേരിട്ടു കൂടി കാണുന്നുണ്ട്. ഞാന്‍ കൂടി പങ്കെടുക്കുന്ന പമ്പയിലെ യോഗത്തില്‍ മുന്‍യോഗത്തില്‍ എടുത്ത തീരുമാനങ്ങള്‍ സമയബന്ധിതമായി തീരുന്നുണ്ടോ എന്നത് പരിശോധിക്കും.

ശബരിമല സീസണിന്റെ തയ്യാറെടുപ്പുകള്‍ നടക്കുന്ന സമയത്ത് ദേവസ്വം ബോര്‍ഡിനെ മാറ്റാന്‍ സര്‍ക്കാരിന്റെ ഭാഗത്തുനിന്ന് ഒരു നീക്കവുമില്ല. ഈ സമയത്താണോ ബോര്‍ഡിനെ മാറ്റുന്നത്. നിലവിലുള്ള ഒരു ബോര്‍ഡ് അവിടെയുണ്ട്. ശബരിമലയുമായി ബന്ധപ്പെട്ട കാര്യങ്ങളിലെ ചുമതല അവര്‍ക്കാണ്. പ്രസാദ വിതരണം, അതിനുവേണ്ടി ടെണ്ടര്‍ വിളിക്കുക, സന്നിധാനവും പമ്പയുമൊക്കെ സജ്ജമാക്കുക, പോലീസിനും ഫയര്‍ഫോഴ്‌സിനും സൗകര്യങ്ങളൊരുക്കുക, ദേവസ്വം മരാമത്തിന്റെ ജോലികള്‍ ചെയ്യിക്കുക തുടങ്ങിയ ഒരുപാട് ഉത്തരവാദിത്തങ്ങള്‍ ദേവസ്വം ബോര്‍ഡിനുണ്ട്. അവ ഓരോന്നും പ്രത്യേകമായി എടുത്ത് ചര്‍ച്ച നടത്തിയിട്ടുണ്ട്. അവരതു കൃത്യമായി ചെയ്യണം. ഗവണ്‍മെന്റിന്റെ ഭാഗത്തുനിന്നു വേണ്ടതല്ലാം കൃത്യമായി ചെയ്യും.

തലസ്ഥാന നഗരമധ്യത്തില്‍ നിന്ന് മൃഗശാല മാറ്റുന്നതിനെപ്പറ്റി റൗണ്ട് ടേബിള്‍ കോണ്‍ഫറന്‍സില്‍ ഞാനാണ് ആഗ്രഹം പ്രകടിപ്പിച്ചത്. രണ്ട് കാരണങ്ങള്‍ കൊണ്ടാണ്. ഒന്ന് ആ മൃഗങ്ങളെ അവിടെ പാര്‍പ്പിക്കുന്നത് അവയോടുള്ള ക്രൂരതയാണ്. അവയുടെ ആവാസവ്യവസ്ഥയിലേയ്ക്ക് മാറ്റണം. പിന്നെ മ്യൂസിയം ഇരിക്കുന്ന ആ സ്ഥലം കണ്ണായ സ്ഥലമാണ്. അതില്‍ കണ്ണുവച്ചിട്ടുണ്ടെന്നത് സത്യമാണ്. ആ സ്ഥലം തിരുവനന്തപുരത്തിന് അഭിമാനകരമായ ഒരു സ്ഥലമായി മാറ്റാന്‍ വേണ്ടിയാണ് ആ കണ്ണ് വെച്ചിരിക്കുന്നത്. അല്ലാതെ ആര്‍ക്കെങ്കിലും വില്‍ക്കാന്‍ വേണ്ടിയല്ല.