കേരളത്തിന്റെ സാംസ്കാരിക മേഖലയെ പ്രോജ്വലമാക്കിയ അപൂർവ വ്യക്തിത്വമായിരുന്നു സൂര്യ കൃഷ്ണമൂർത്തിയെന്ന് എഐസിസി ജനറൽ സെക്രട്ടറി കെ.സി. വേണുഗോപാൽ എംപി അനുശോചിച്ചു.
എഴുത്തും പ്രസംഗവും നാടകവും സംഗീതവും നൃത്തവും സിനിമയും തുടങ്ങി കലയുടെ വിവിധ മേഖലകളെ ഒരുമിപ്പിച്ച സാംസ്കാരിക ജീവിതമായിരുന്നു അദ്ദേഹത്തിന്റേത്. 1977ൽ അദ്ദേഹം തുടക്കമിട്ട ‘സൂര്യ’ എന്ന സാംസ്കാരിക പ്രസ്ഥാനം ഇന്ന് നാൽപ്പതിലേറെ രാജ്യങ്ങളിൽ സാന്നിധ്യമറിയിക്കുന്നതിലൂടെ അദ്ദേഹത്തിന്റെ കലാദർശനത്തിന്റെ ആഴവും വ്യാപ്തിയും വ്യക്തമാക്കുന്നു.
മിത്തുകളും ഇതിഹാസങ്ങളും സാമൂഹിക വിഷയങ്ങളും ഉൾപ്പെടെ വൈവിധ്യമാർന്ന പ്രമേയങ്ങളെ പുതിയ കലാഭാവങ്ങളിലൂടെ അവതരിപ്പിച്ച അദ്ദേഹം, ലോകപ്രശസ്തരായ നിരവധി കലാകാരന്മാരെ കേരളത്തിന്റെ വേദികളിലെത്തിക്കുകയും ചെയ്തു. കലാസാംസ്കാരിക രംഗത്തെ അദ്ദേഹത്തിന്റെ സംഭാവനകൾ ശ്രദ്ധേയമായിരുന്നു.
പദവികളും പുരസ്കാരങ്ങളും അംഗീകാരങ്ങളും ഏറെയുണ്ടായപ്പോഴും കലയെ കേവലം വാണിജ്യവത്കരണത്തിന് വിട്ടുകൊടുക്കാതെ അതിന്റെ ഔന്നത്യവും ഗൗരവവും കാത്തുസൂക്ഷിക്കാൻ അദ്ദേഹം എന്നും ശ്രദ്ധിച്ചു. വേദികളിൽ വിസ്മയം സൃഷ്ടിക്കുന്നതിനൊപ്പം പുതുതലമുറയിലെ കലാകാരന്മാർക്ക് അവസരങ്ങളും പ്രോത്സാഹനവും നൽകാനും അദ്ദേഹത്തിന് കഴിഞ്ഞു.
സൂര്യ കൃഷ്ണമൂർത്തിയുടെ വിയോഗം കേരളത്തിന്റെ സാംസ്കാരിക രംഗത്തിന് നഷ്ടമാണെന്ന് കെസി വേണുഗോപാൽ പറഞ്ഞു.
