കൊച്ചി : പ്രവാസികൾക്കും വിദേശ നിക്ഷേപകർക്കും ലളിതമായ മാർഗത്തിലൂടെ ഇന്ത്യൻ ഓഹരി വിപണിയിൽ നിക്ഷേപിക്കുന്നതിന് പുതിയ ഡിജിറ്റൽ സംവിധാനം ഏർപ്പെടുത്തി രാജ്യത്തെ മുൻനിര സാമ്പത്തിക സേവനദാതാക്കളായ ഡിഎസ്പി അസറ്റ് മാനേജേഴ്സ്. ഡിഎസ്പി ഇക്വിറ്റി ഓപ്പർചുണിറ്റി ഫണ്ട്സ് എന്ന പേരിൽ അവതരിപ്പിച്ച നിക്ഷേപ മാർഗം അബുദാബി ഗ്ലോബൽ മാർക്കറ്റിലാണ് അവതരിപ്പിച്ചത്. അസറ്റ് മാനേജ്‌മന്റ് രംഗത്തെ ആഗോള കമ്പനിയായ നിയോവിഷൻ വെൽത്ത് മാനേജ്‌മന്റുമായി സഹകരിച്ച് അവതരിപ്പിച്ച ഫണ്ടിൽ യു എസ് ഡോളറിൽ നിക്ഷേപിക്കാമെന്നതാണ് പ്രത്യേകത. ഇതിനായി പ്രത്യേക എൻആർഐ, എൻആർഒ അക്കൗണ്ടുകൾ, പാൻകാർഡ് എന്നിവയുടെ ആവശ്യമില്ല. ഫണ്ടിൽ നിക്ഷേപിക്കുന്നതും മറ്റു നടപടിക്രമങ്ങളും ഓൺലൈനായി പൂർത്തിയാക്കാം. വലുറ.എഐ (valura.AI) എന്ന ആർട്ടിഫിഷ്യൽ ഇന്റലിജൻസ് പ്ലാറ്റ്‌ഫോമാണ് ഇതിനാവശ്യമായ സാങ്കേതിക പിന്തുണ നൽകുന്നത്.
റീട്ടെയ്ൽ വിഭാഗങ്ങളിൽ കുറഞ്ഞത് 100 ഡോളറാണ് നിക്ഷേപിക്കേണ്ടത്. നിക്ഷേപകരുടെ തുക ഡിഎസ്പി അസറ്റ് മാനേജേഴ്സ് കൈകാര്യം ചെയ്യുന്ന ലാർജ് ആൻഡ് മിഡ് ക്യാപ് ഫണ്ടുകളിലാണ് നിക്ഷേപിക്കുക. വൻകിട കമ്പനികളിലും വളർച്ച പ്രതീക്ഷിക്കുന്നവയിലും നിക്ഷേപിക്കുന്നതിനുള്ള അവസരമാണിതെന്നും രാജ്യത്തെ ഓഹരി വിപണിയിലേക്ക് വിദേശ നിക്ഷേപകർക്ക് ലളിതമായി കടന്നുവരുന്നതിനുള്ള സാഹചര്യമൊരുക്കുകയാണ് ലക്ഷ്യമിടുന്നതെന്നും ഡിഎസ്പി അസറ്റ് മാനേജേഴ്സ് ഇന്റർനാഷണൽ ബിസിനസ് മേധാവി ജയ് കോത്താരി പറഞ്ഞു.
Julie John
