പറക്കും പക്ഷിയെ പ്രണയിക്കുന്നവർ – ലിൻഡ അലക്സാണ്ടർ

Spread the love

ആസ്വാദനം.

 

 

അബ്ദുൾ പുന്നയൂർക്കുളത്തിന്റെ ‘പറക്കും പക്ഷിയെ പ്രണയിക്കുന്നവർ’ തികച്ചും വ്യത്യസ്തമായ ഒരു നോവലാണ്. കഥയിലെ ഷാഫി ദൗർഭാഗ്യവാനായ ഒരു കഥാപാത്രമാണ്. അവനവനെയും രണ്ടു ജീവിതപങ്കാളികളെയും അവർ ജീവിച്ചിരുന്ന സാഹചര്യങ്ങളെയും തിരിച്ചറിയാൻ കഴിയാതെ വന്നതാണ് ഷാഫിക്ക് പറ്റിയ അബദ്ധo. അത് മനസ്സിലാക്കി വരുമ്പോഴേക്കും ജീവിതം കൈയിൽ നിന്നും വിട്ടുപോകുന്നു! സ്വന്തം മടിയിലേക്ക് വച്ച് നീട്ടിയ സ്വപ്നതുല്യമായ ജീവിതം അപ്പോഴേക്കും ഷാഫി വളരെ വിദൂരതയിലേക്ക് സഞ്ചരിച്ചു കഴിഞ്ഞിരുന്നു.

സിന്ധ്യയെ രത്നങ്ങളിൽ രത്നമായും സാബിയെ ഉരച്ചു മിനുസ്സപ്പെടുത്തി തിളങ്ങിയേക്കാവുന്ന രത്നമായി മാറ്റിയാലും, ഇവർ രണ്ടും കഥാനായകനു നഷ്ടപ്പെടുകയാണ്.

ഷാഫി തക്കതായ കാരണമില്ലാതെ സിന്ധ്യയെ ഡിവോഴ്സ് ചെയ്യുന്നു. അങ്ങനെയാണെങ്കിൽ അതേ തുലാസിൽ തന്നെ തൂക്കുകയാണെങ്കിൽ സാബി ഷാഫിയെ സ്നേഹിക്കാതിരിക്കുന്നത് ഒരു പ്രത്യേക കാരണങ്ങൾ കൂടാതെയാണെന്ന് വേണമെങ്കിൽ സമർത്ഥിക്കാം. ഒന്നുകൂടെ വ്യക്‌തമാക്കുകയാണെങ്കിൽ ഷാഫി ചെയ്‌ത പ്രവൃത്തി തന്നെ വേറൊരു രൂപത്തിൽ സാബി ചെയ്യുന്നു. ഇത് മനുഷ്യസ്വഭാവത്തിലടങ്ങിയിട്ടുള്ള വൈചിത്ര്യമെന്നതിൽ ആണ് – പെൺ എന്ന വേർതിരിവ് ചെയ്യാതിരിക്കുന്നതാണ് നല്ലത്.

റിട്ടയർമെന്റ് കഴിയുമ്പോൾ മാനസികമായും ശാരീരികമായും വളരെ സമ്മർദ്ദമനുഭവിക്കുന്ന ഒരാൾക്ക് എത്ര ശ്രമിച്ചാലും ജീവിതം തിരിച്ചു പിടിക്കൽ അപ്രായോഗികമാണ്. ആ നിലക്ക് ഷാഫി നഴ്‌സിംഗ് ‌ഹോമിലെ അന്തേവാസിയാകുമ്പോൾ മകൻ മുസ്തഫയുടെ സന്ദർശനം അദ്ദേഹത്തിനു അല്പം ആശ്വാസം പകരുന്നതായി തോന്നുന്നു.

സിന്ധ്യ തൊലിയുടെ നിറത്തിലൊ, വളർന്നു വന്ന സാഹചര്യങ്ങളിലെ വ്യത്യാസങ്ങളിലൊ, ജാതിമത പൊരുത്തക്കേടുകളിലൊ, അസഹിഷ്ണുതയില്ലാതെ നല്ലൊരു ജീവിതം നയിക്കാൻ ആഗ്രഹിച്ചിരുന്ന വ്യക്‌തിയാണ്.

സാബി ഈ നോവലിൽ തന്റെ സ്വകാര്യത സംരക്ഷിക്കാൻ തീവ്രമായി ശ്രമിക്കുന്നവളും വിട്ടുവീഴ്ചക്ക് തയ്യാറില്ലാത്തവളുമായി കാണപ്പെടുന്നു. ഷാഫിയുടെ ആന്തരിക സംഘർഷങ്ങളെ സാബി കാതോർക്കുന്നതായോ, അയാളുടെ മൗനങ്ങളെ അറിയുന്നതായോ കാണുന്നില്ല! അവളുടെ സമീപനരീതികളിൽ നിന്നും നിർബന്ധബുദ്ധിയിൽ നിന്നും മാറിയാലേ ജീവിതം സുഗമവും സാരസമ്പുഷ്ടവുമാകൂ എന്നവൾ ചിന്തിക്കുന്നില്ല.

സാബി, മദ്യം മാരകവും നിഷിദ്ധവുമാണെന്ന് ഉറച്ചു വിശ്വസിക്കുന്ന ചുറ്റുപാടിലാണ് വളർന്നത്. അവൾ മദ്യപാനത്തെ നിശിതമായി വെറുക്കുന്നു. ഒരു സോഷ്യൽ ഡ്രിങ്കു പോലും അവളുടെ ചിന്തക്കതീതമാണ്. സോഷ്യൽ ഡ്രിങ്കിങ് ലോകത്തുടനീളം പരക്കെ അംഗീകരിക്കപ്പെട്ട ഒരു വസ്തുതയാണെന്ന കാര്യo സാബി മനസ്സിലാക്കുവാൻ ആഗ്രഹിക്കുന്നതേയില്ല. സാബി നോവലിലുടനീളം മദ്യത്തിനെതിരായ ന്യായവാദങ്ങളും തെളിവുകളും നിരത്തുന്നു. അവൾ കുടിക്കുന്നവരെ കണ്ടിരുന്നത്, അവർ കുടുംബത്തെയും സമൂഹത്തെയും നശിപ്പിക്കുന്നവരായിട്ടാണ്. കൗൺസലിങ്ങിൽ സാബിക്ക് അശേഷം താല്പര്യമില്ല!

ഒന്നാഞ്ഞു ശ്രമിച്ചാൽ പരിഹരിക്കപ്പെടാവുന്ന കുടുംബപ്രശ്നങ്ങളുടെ ഒരു ദർപ്പണമായി ഈ നോവലിനെ കാണാo.

ജീവിതം പലതും ചോദിക്കാതെ തന്നെ മുന്നിലേക്ക് വച്ച് നീട്ടിയിട്ടും അതിനെ സ്വീകരിക്കാൻ ശ്രദ്ധിക്കാത്ത കഥാനായകൻ.

ഭാര്യാഭർതൃബന്ധങ്ങളിൽ പ്രശ്നങ്ങൾ വന്നാൽ പോലും സഹചാരിയെ ഉൾക്കൊള്ളാനുള്ള ഒരു വ്യത്യസ്‌തതലo ഉണ്ടായിരിക്കണം. അത് മനസ്സിലാക്കാൻ കഴിയാത്ത ഷാഫിക്ക് തന്റെ സ്വർഗ്ഗതുല്യമായ ബന്ധങ്ങൾ തകരുക മാത്രമല്ല, ആ ബന്ധം വിട്ടുപോയിട്ടുo അയാൾ അതിൽ ബന്ധനസ്ഥനാകേണ്ടി വരുന്നു!

പറുദീസയിൽ നിന്ന് നീർക്കയത്തിലേക്ക്…!

നോവലിന്റെ അവസാനഭാഗത്ത് സാബിയുടെ മനോഭാവത്തിലും പ്രവൃത്തിയിലുമുണ്ടായ മാറ്റം ശരിയായി മനസ്സിലാക്കുവാൻ സാധിക്കയില്ല എന്ന സത്യത്തിലേക്ക് വായനക്കാരെ കൊണ്ടുപോകുന്നു. തികച്ചും അകക്കാമ്പുള്ള ഒരു നോവലാണ് ‘പറക്കും പക്ഷിയെ പ്രണയിക്കുന്നവർ’.

.

Leave a Reply

Your email address will not be published. Required fields are marked *