രാഷ്ട്രനിര്‍മാണത്തില്‍ ഏറ്റവും വലിയ പങ്ക് വഹിക്കാന്‍ കഴിയുന്ന സമൂഹം യുവജനങ്ങളാണെന്ന് ചടങ്ങിലെ മുഖ്യാതിഥിയും സംവിധായകനും നടനുമായ ബേസില്‍ ജോസഫ് പറഞ്ഞു. ദേശീയ സമ്മതിദായക ദിനാഘോഷത്തിന്റെ പത്തനംതിട്ട ജില്ലാതല ഉദ്ഘാടനം ചടങ്ങില്‍ ഓണ്‍ലൈനായി പങ്കെടുത്ത് സംസാരിക്കുകയായിരുന്നു അദ്ദേഹം.
നമ്മുടെ ഭരണകര്‍ത്താക്കളാരെന്ന് തീരുമാനിക്കാനുള്ള അവസരം നമുക്കാണ്. അതിന് ജാതിയോ മതമോ രാഷ്ട്രീയ പാര്‍ട്ടിയോ ഒന്നും അടിസ്ഥാനമാകരുത്. എല്ലാത്തിനും ഉപരിയായി അവര്‍ ഈ സമൂഹത്തിന് എന്താണ് ചെയ്യാന്‍ പോകുന്നതെന്ന് ചിന്തിക്കണം. ജനാധിപത്യത്തിന്റെ ഏറ്റവും വലിയ ശക്തിയായ സമ്മതിദാനാവകാശം കൃത്യമായി ഉപയോഗിക്കണമെന്നും അദ്ദേഹം പറഞ്ഞു. നമ്മള്‍ ചെയ്യുന്ന ഓരോ വോട്ടിനും നമ്മുടെ സമൂഹത്തില്‍ വലിയ മാറ്റങ്ങള്‍ വരുത്താന്‍ ശക്തിയുള്ളതാണെന്ന് മനസിലാക്കണമെന്നും ബേസില്‍ ജോസഫ് പറഞ്ഞു. വിദ്യാര്‍ഥികളുടെ ചോദ്യങ്ങള്‍ക്കും ബേസില്‍ ജോസഫ് മറുപടി നല്‍കി.
