സിപിഎം ഇരട്ടവോട്ട് ചേര്ത്ത് തെരഞ്ഞെടുപ്പ് അട്ടിമറിക്കുന്നുവെന്ന് രാജസ്ഥാന് മുന് മുഖ്യമന്ത്രി അശോക് ഗെഹ്ലോട്ട്. തിരുവനന്തപുരത്ത് ഹോട്ടല് വിവാന്തയില് മാധ്യമങ്ങളോട് സംസാരിക്കുക ആയിരുന്നു അദ്ദേഹം. മറ്റു സംസ്ഥാനങ്ങളില് ബിജെപിയുടെ വോട്ട് ചോരിപോലെയാണ് കേരളത്തില് സിപിഎം നടത്തുന്ന ഇത്തരം നടപടികള്.ബിജെപിയുടെയും സിപിഎമ്മിന്റെയും ജനാധിപത്യ വിരുദ്ധമുഖമാണ് ഇതിലൂടെ തെളിയുന്നത്. പരാജയഭീതി കാരണമാണ് ഇത്തരത്തില് വ്യാജ രേഖകള് ഉണ്ടാക്കി ഇരട്ടവോട്ടിന് ശ്രമിക്കുന്നതെന്നും അശോക് ഗെഹ്ലോട്ട് പറഞ്ഞു.
തിരഞ്ഞെടുപ്പ് പ്രവര്ത്തനങ്ങളെ അട്ടിമറിക്കുന്നതിനായി സിപിഎമ്മിന്റെ നേതൃത്വത്തില് പയ്യന്നൂര്, കല്ല്യാശേരി എന്നിവിടങ്ങളിലെ വോട്ടര് പട്ടികയില് വ്യാപകമായി ഇരട്ടവോട്ടുകള് ചേര്ക്കുന്നുണ്ടെന്നും ഇത് സംബന്ധിച്ച് വിശദമായ അന്വേഷണം നടത്തണമെന്നും ആവശ്യപ്പെട്ട് എഐസിസി ജനറല് സെക്രട്ടറി ദീപാദാസ് മുന്ഷി,കെപിസിസി വൈസ് പ്രസിഡന്റ് പാലോട് രവി, കെപിസിസി തിരഞ്ഞെടുപ്പ് നിരീക്ഷണ സമിതി കണ്വീനര് എംകെ റഹ്മാന് എന്നിവര് മുഖ്യ തിരഞ്ഞെടുപ്പ് കമ്മീണര്ക്ക് നേരിട്ട് പരാതി നല്കി.
സംസ്ഥാനത്തിന്റെ വിവിധ മണ്ഡലങ്ങളില് ഇത്തരത്തിലുള്ള പ്രവര്ത്തനം സിപിഎമ്മിന്റെ നേതൃത്വത്തില് നടക്കുന്നുണ്ട്.പയ്യന്നൂരിലെ സ്വതന്ത്ര സ്ഥാനാര്ത്ഥി വി.കുഞ്ഞികൃഷ്ണന് ഇതുസംബന്ധിച്ച് രേഖാമൂലം റിട്ടേണിംഗ് ഓഫീസര്ക്ക് പരാതി നല്കിയിരിക്കുകയാണ്. ഇത് ഗൗരവമുള്ളതാണ്.
പയ്യന്നൂര്, കല്യാശേരി ഉള്പ്പെടെ നിരവധി മണ്ഡലങ്ങളിലെ ഇരട്ട വോട്ട് തെരഞ്ഞെടുപ്പ് ഫലത്തെ ബാധിക്കും. തിരഞ്ഞെടുപ്പ് പ്രക്രിയയുടെയും വോട്ടര് പട്ടികയുടെയും വിശ്വാസ്യതയെ ചോദ്യം ചെയ്യുന്ന നടപടിയാണിത്. ഇത് അന്വേഷിച്ച് നടപടി സ്വീകരിക്കാത്ത പക്ഷം അത് യഥാര്ത്ഥ വോട്ടര്മാരുടെ അവകാശം നിഷേധിക്കുന്നതിന് ഇടയാക്കും. ഇതിന് പിന്നില് വലിയ ഗൂഢാലോചനയുണ്ട്. വോട്ടര്പട്ടിക ഡാറ്റ കൈകാര്യം ചെയ്യുന്നവരുടെ പങ്ക് ഇതിന് പിന്നിലുണ്ടെന്നും കോണ്ഗ്രസ് ആരോപിച്ചു.
