കൊച്ചി: 2026 മാർച്ച് 31 ന് അവസാനിച്ച സാമ്പത്തിക വർഷത്തെ നാലാംപാദത്തിൽ ഫെഡറൽ ബാങ്കിന്റെ മൊത്തം ബിസിനസ് 5,78,503.76 കോടി രൂപയായി ഉയർന്നു. വാർഷിക അറ്റാദായം 4,117.32 കോടി രൂപയായി. നാലാംപാദത്തിലെ മാത്രം അറ്റാദായം 20.93 ശതമാനം വളർച്ചയോടെ 1,259.10 കോടി രൂപയിലെത്തി.
“വളർച്ച ലക്ഷ്യം വച്ച് ആസൂത്രണം ചെയ്ത പദ്ധതികൾ പ്രകാരം കാര്യക്ഷമതയുള്ള പ്രവർത്തനം നടത്താൻ ഞങ്ങൾക്ക് സാധിച്ചു എന്നതാണ് നാലാം പാദ ഫലങ്ങളിൽ നിന്ന് വ്യക്തമാവുന്നത്,” ബാങ്കിന്റെ എംഡിയും സി ഐ ഒയുമായ കെ വി എസ് മണിയൻ പറഞ്ഞു. “റീട്ടെയ്ൽ നിക്ഷേപങ്ങളിൽ ശ്രദ്ധയൂന്നിക്കൊണ്ടും ചെലവേറിയ നിക്ഷേപങ്ങൾ കുറച്ചുകൊണ്ടും നിക്ഷേപസമാഹരണ രംഗത്ത് ഞങ്ങൾ വരുത്തിയ മാറ്റങ്ങൾ മികച്ച വളർച്ചയ്ക്ക് കാരണമായി. കാസാ, പ്രവാസിനിക്ഷേപങ്ങളിൽ ഒരേസമയം 1 ലക്ഷം കോടി രൂപ എന്ന നാഴികക്കല്ല് കടക്കാൻ സാധിച്ചത് നിക്ഷേപസമാഹരണത്തിലെ ഞങ്ങളുടെ ആസൂത്രണം വിജയിക്കുന്നതിന്റെ തെളിവാണ്.
വായ്പാരംഗത്തെ ചുവടുമാറ്റങ്ങൾ ഒരു ഇടക്കാല പ്രതിഭാസം മാത്രമാണ്. തെരഞ്ഞെടുത്ത മേഖലകളിൽ മികച്ച വളർച്ച നേടാൻ ഞങ്ങൾക്ക് സാധിക്കുന്നുണ്ട്. വെൽത് പ്ലാറ്റ്ഫോം പ്രവർത്തനക്ഷമമായതും ആസ്തി മേലുള്ള ലാഭം, അറ്റപലിശ മാർജിൻ എന്നിവ പ്രീ കട്ട് ലെവലിൽ എത്തിയതും വളർച്ചയുടെ അടുത്ത പടവിലേക്ക് എത്താൻ ഞങ്ങളെ പിന്തുണയ്ക്കും,” കെ വി എസ് മണിയൻ കൂട്ടിച്ചേർത്തു.
ബാങ്കിന്റെ മൊത്തം ബിസിനസ് 4.54 ശതമാനം വര്ധിച്ച് 5,78,503.76 കോടി രൂപയിലെത്തി. മൂന്നാംപാദത്തിൽ 2,97,795.82 കോടി രൂപയായിരുന്ന നിക്ഷേപം 5.41 ശതമാനം വർദ്ധനവോടെ 3,13,909.39 കോടി രൂപയായി.
വായ്പാ വിതരണത്തിലും ബാങ്കിന് മികച്ച വളർച്ച കൈവരിക്കാൻ സാധിച്ചു. ആകെ വായ്പ മൂന്നാംപാദത്തിലെ 2,58,910.16 കോടി രൂപയില് നിന്ന് 2,68,369.03 കോടി രൂപയായി വര്ധിച്ചു. 3.65 ശതമാനമാണ് വളർച്ചാനിരക്ക്. പ്രവാസിനിക്ഷേപം 7.04 ശതമാനം പാദവാർഷിക വർദ്ധനവോടെ 1,02,619.69 കോടി രൂപയായി ഉയർന്നു.
വായ്പകളുടെ 1.62 ശതമാനമാണ് ബാങ്കിന്റെ മൊത്ത നിഷ്ക്രിയ ആസ്തി. അറ്റനിഷ്ക്രിയ ആസ്തി 0.20% ശതമാനവും. വരുമാനവും ചെലവും തമ്മിലുള്ള അനുപാതം 47.28 ശതമായത് ബാങ്കിന്റെ പ്രവർത്തന കാര്യക്ഷമതയ്ക്ക് തെളിവായി. 87.07 ശതമാനം ആണ് നീക്കിയിരുപ്പ് അനുപാതം. നാലാംപാദത്തിൽ ബാങ്ക് 39 പുതിയ ശാഖകൾ തുറന്നു.
Athulya K R
