കൊച്ചി: ഓൺലൈൻ ഷോപ്പിംഗ് രംഗത്ത് വിപ്ലവകരമായ മാറ്റവുമായി പ്രമുഖ ഇ-കൊമേഴ്സ് പ്ലാറ്റ്ഫോമായ ഫ്ലിപ്കാർട്ട്. കാർഡ് പേയ്മെന്റുകൾ കൂടുതൽ ലളിതവും സുരക്ഷിതവുമാക്കുന്നതിനായി ബയോമെട്രിക് ഓതന്റിക്കേഷൻ സംവിധാനം ഫ്ലിപ്കാർട്ട് അവതരിപ്പിച്ചു.
രാജ്യത്തെ പ്രമുഖ സ്വകാര്യ ബാങ്കായ ആക്സിസ് ബാങ്ക്, പ്രമുഖ ഫിൻടെക് പ്ലാറ്റ്ഫോമായ പേയു (PayU) എന്നിവയുമായി സഹകരിച്ചാണ് ഈ പുതിയ സുരക്ഷാ സംവിധാനം നടപ്പിലാക്കുന്നത്. ഇതോടെ കാർഡ് വഴിയുള്ള പണമിടപാടുകൾക്ക് എസ്എംഎസ് ഒടിപിക്ക് പകരം വിരലടയാളമോ ഫെയ്സ് ഐഡിയോ ഉപയോഗിച്ച് നിമിഷങ്ങൾക്കുള്ളിൽ സുരക്ഷിതമായി ഓതന്റിക്കേഷൻ പൂർത്തിയാക്കാം. ആൻഡ്രോയിഡ്, ഐഒഎസ് പ്ലാറ്റ്ഫോമുകളിൽ ഒരുപോലെ ഈ സേവനം ലഭ്യമാണ്.
നിലവിൽ ഓൺലൈൻ പേയ്മെന്റ് രംഗത്ത് വലിയ വെല്ലുവിളിയായി മാറിക്കൊണ്ടിരിക്കുന്ന സിം സ്വാപ്പിംഗ്, ഒടിപി അധിഷ്ഠിത സാമ്പത്തിക തട്ടിപ്പുകൾ എന്നിവയ്ക്ക് വലിയൊരു പരിധിവരെ തടയിടാൻ ഈ ബയോമെട്രിക് സംവിധാനത്തിലൂടെ സാധിക്കുമെന്ന് ഫ്ലിപ്കാർട്ട് പേയ്മെന്റ്സ് ആൻഡ് സൂപ്പർകോയിൻസ് വിഭാഗം വൈസ് പ്രസിഡന്റ് ഗൗരവ് അറോറ പറഞ്ഞു. എസ്എംഎസ് വരാൻ വൈകുന്നതുമൂലം ഇടപാടുകൾ പരാജയപ്പെടുന്ന സാഹചര്യം ഒഴിവാക്കാനും കൂടുതൽ വേഗത്തിൽ പേയ്മെന്റുകൾ നടത്താനും ഉപഭോക്താക്കൾക്ക് ഇതിലൂടെ സാധിക്കുമെന്നും അദ്ദേഹം കൂട്ടിച്ചേർത്തു.
Anu Maria Thomas
