കൊച്ചി: ആഗോള ഊർജ വിപണിയിലെ അനിശ്ചിതത്വങ്ങൾക്കും എണ്ണവിലയിലെ വലിയ ചാഞ്ചാട്ടങ്ങൾക്കുമിടയിലും 2025-26 സാമ്പത്തിക വർഷത്തിലും അവസാന പാദത്തിലും മികച്ച സാമ്പത്തിക-പ്രവർത്തന നേട്ടം കൈവരിച്ച് ഭാരത് പെട്രോളിയം കോർപ്പറേഷൻ ലിമിറ്റഡ് (ബിപിസിഎൽ). ഈ സാമ്പത്തിക വർഷത്തിൽ കമ്പനിയുടെ സംയോജിത അറ്റാദായത്തിൽ 93.78 ശതമാനത്തിന്റെ വൻ വർധനവാണ് രേഖപ്പെടുത്തിയത്.
മുൻ വർഷത്തെ 13,337 കോടി രൂപയിൽ നിന്ന് കമ്പനിയുടെ സംയോജിത അറ്റാദായം 25,843 കോടി രൂപയായി ഉയർന്നു. ഇതേ കാലയളവിൽ കമ്പനിയുടെ തനത് അറ്റാദായത്തിലും വൻ കുതിച്ചുചാട്ടമാണുണ്ടായത്. മുൻ വർഷത്തെ 13,275 കോടി രൂപയിൽ നിന്ന് 75.54 ശതമാനം വർധനവോടെ തനത് അറ്റാദായം 23,303 കോടി രൂപയിലെത്തി.
2025-26ൽ കമ്പനിയുടെ ചരിത്രത്തിലെ ഏറ്റവും ഉയർന്ന എണ്ണ ശുദ്ധീകരണ തോതും വിൽപനയുമാണ് രേഖപ്പെടുത്തിയത്. റിഫൈനറികളിലെ ഉൽപ്പാദനം 117 ശതമാനം ശേഷി വിനിയോഗത്തോടെ 40.51 മില്യൺ മെട്രിക് ടണ്ണിൽ നിന്നും 41.15 മില്യൺ മെട്രിക് ടണ്ണായി ഉയർത്തി. ഇതേ കാലയളവിൽ കമ്പനിയുടെ മൊത്തം വിൽപന റെക്കോർഡ് നേട്ടമായ 55.72 മില്യൺ മെട്രിക് ടണ്ണിലെത്തി.
ബിപിസിഎല്ലിന്റെ തനത് പ്രവർത്തനലാഭം (EBITDA) 51.51 ശതമാനം വർധിച്ച് 40,582 കോടി രൂപയായി. മുൻവർഷം ഇത് 26,785 കോടി രൂപയായിരുന്നു. കമ്പനിയുടെ സംയോജിത പ്രവർത്തനലാഭവും 57.08 ശതമാനം ഉയർച്ചയോടെ 29,030 കോടി രൂപയിൽ നിന്ന് 45,601 കോടി രൂപയായി വർധിച്ചു. ഇതേസമയം, സംയോജിത പ്രവർത്തന വരുമാനം 4.46 ശതമാനം വർധിച്ച് 5,00,517 കോടി രൂപയിൽ നിന്ന് 5,22,820 കോടി രൂപയിലെത്തി. ബിപിസിഎല്ലിന്റെ തനത് പ്രവർത്തന വരുമാനം മാത്രം 5,22,668 കോടി രൂപയാണ്.
സാമ്പത്തിക വർഷത്തിന്റെ അവസാന പാദത്തിലും (ജനുവരി–മാർച്ച്) റെക്കോർഡ് ഉൽപ്പാദന നേട്ടമാണ് കമ്പനി കൈവരിച്ചത്. ഈ കാലയളവിൽ റിഫൈനറികളുടെ ശേഷിയുടെ 118 ശതമാനം വിനിയോഗിച്ച് 10.40 മില്യൺ മെട്രിക് ടൺ എണ്ണ ശുദ്ധീകരിച്ചു. നാലാം പാദത്തിലെ ആഭ്യന്തര വിപണിയിലെ വിൽപന 3.28 ശതമാനം വളർച്ചയോടെ 13.86 മില്യൺ മെട്രിക് ടണ്ണിലുമെത്തി.
മികച്ച സാമ്പത്തിക അച്ചടക്കത്തിലൂടെയും മൂലധന മാനേജ്മെന്റിലൂടെയും കടബാധ്യതകൾ ഗണ്യമായി കുറയ്ക്കാൻ ബിപിസിഎല്ലിന് സാധിച്ചു. കമ്പനിയുടെ തനത് കടം-ഓഹരി അനുപാതം 2025 മാർച്ച് 31-ലെ 0.29-ൽ നിന്ന് 2026 മാർച്ച് 31 ആയപ്പോഴേക്കും 0.11 ആയി മെച്ചപ്പെട്ടു.
Athulya K R
