ഓസ്റ്റിൻ: ടെക്സാസിൽ കൊമേഴ്സ്യൽ ഡ്രൈവർ ലൈസൻസ് (CDL) നേടുന്നതിനുള്ള എഴുത്തുപരീക്ഷകൾ ഇനി മുതൽ ഇംഗ്ലീഷിൽ മാത്രം നടത്തുമെന്ന് ടെക്സാസ് ഡിപ്പാർട്മെന്റ് ഓഫ് പബ്ലിക് സേഫ്റ്റി (DPS) അറിയിച്ചു. ഇതുവരെ ലഭ്യമായിരുന്ന സ്പാനിഷ് ഭാഷാ ഓപ്ഷൻ പിൻവലിച്ചിരിക്കുകയാണ്. കൂടാതെ പരീക്ഷകളിൽ വിവർത്തകരുടെ സേവനവും അനുവദിക്കില്ല.
ഫെഡറൽ ഇംഗ്ലീഷ് പ്രാവീണ്യ മാനദണ്ഡങ്ങളുമായി സംസ്ഥാന നടപടിക്രമങ്ങൾ പൊരുത്തപ്പെടുത്തുന്നതിനായാണ് ഈ മാറ്റമെന്ന് അധികൃതർ വ്യക്തമാക്കി. ട്രക്കിംഗ് മേഖലയിലെ സുരക്ഷയും ആശയവിനിമയ ശേഷിയും വർധിപ്പിക്കാനാണ് തീരുമാനമെന്ന് അനുകൂലികൾ പറയുമ്പോൾ, കുടിയേറ്റ തൊഴിലാളികൾക്ക് ഇത് കൂടുതൽ വെല്ലുവിളികൾ സൃഷ്ടിക്കുമെന്ന് വിമർശകർ ചൂണ്ടിക്കാട്ടുന്നു.
