വിനോദ സഞ്ചാര മേഖലയെ അടിമുടി പരിഷ്‌കരിക്കും: മന്ത്രി പി എ മുഹമ്മദ് റിയാസ്.
കണ്ണൂർ: വിനോദ സഞ്ചാര മേഖലയെ ആധുനീകരിച്ച് അടിമുടി പരിഷ്‌കരിക്കുകയാണ് ലക്ഷ്യമെന്ന് ടൂറിസം വകുപ്പ് മന്ത്രി പി എ മുഹമ്മദ് റിയാസ് പറഞ്ഞു. ചെറുപുഴയിൽ സ്‌നോഫോറസ്റ്റ് ഇക്കോ ടൂറിസം സൊസൈറ്റി ഓഫീസിന്റെ ഉദ്ഘാടനം നിർവഹിച്ച് സംസാരിക്കുകയായിരുന്നു മന്ത്രി. വിനോദസഞ്ചാര മേഖലയിൽ സാധ്യമായ ആധുനിക രീതികൾ അവലംബിക്കും. കാരവൻ ടൂറിസം, വെഡിംഗ് ടൂറിസം, റിവഞ്ച് ടൂറിസം തുടങ്ങിയ നൂതന സാധ്യതകളെല്ലാം പരീക്ഷിക്കണമെന്ന് മന്ത്രി പറഞ്ഞു. തദ്ദേശ സ്ഥാപനങ്ങളുമായി ചേർന്ന് നടപ്പാക്കുന്ന ഡെസ്റ്റിനേഷൻ ചലഞ്ചിന് കണ്ണൂർ ജില്ലയിൽ നിന്നും മികച്ച പ്രതികരണമാണ് ലഭിച്ചത്. ഇക്കോ ടൂറിസം സൊസൈറ്റികളുമായി ചേർന്ന് തദ്ദേശ സ്ഥാപനങ്ങൾ പ്രവർത്തിക്കണം. വിനോദ സഞ്ചാര മേഖലയിലെ പ്രധാന പ്രശ്‌നങ്ങളായ ശുചിത്വം, പരിപാലനം എന്നിവ പരിഗണിച്ചു കൊണ്ട് മുന്നോട്ടു പോകണമെന്നും മന്ത്രി പറഞ്ഞു.
