എസ്കലേറ വനിതോത്സവം 26 ഉദ്ഘാടനം
തിരുവനന്തപുരം: ഈ നാലര വര്ഷത്തിനുള്ളില് വനിത വികസന കോര്പറേഷന് വഴി മൂന്നര ലക്ഷത്തോളം വനിതകള്ക്ക് പ്രത്യക്ഷമായോ പരോക്ഷമായോ തൊഴില് നല്കിയതായി ആരോഗ്യ വനിത ശിശുവികസന വകുപ്പ് മന്ത്രി വീണാ ജോര്ജ്. ജീവിതത്തില് പ്രതിസന്ധി വരുമ്പോള് തളര്ന്ന് പോകേണ്ടതില്ല. ആരും ഒറ്റയ്ക്കാണെന്ന ചിന്ത വേണ്ട. സന്തോഷത്തോടെ, ആത്മവിശ്വാസത്തോടെ, ആത്മാഭിമാനത്തോടെ ജീവിക്കാന് കഴിയും. അതിനെതിരെ നില്ക്കുന്ന വ്യക്തികളെ ഒന്നിച്ച് ചെറുത്ത് തോല്പ്പിക്കാമെന്നും മന്ത്രി വ്യക്തമാക്കി. എസ്കലേറെ ദി വിമെന് ഫെസ്റ്റ് 2026 ഉദ്ഘാടനം ചെയ്ത് സംസാരിക്കുകയായിരുന്നു മന്ത്രി.
വനിതകളുടെ ഉത്സവമാണ് എസ്കലേറ വനിതോത്സവം. രണ്ട് വര്ഷമായി വലിയ ജനപങ്കാളിത്തത്തോടെ എസ്കലേറ നടത്തുന്നുണ്ട്. വനിതകള്ക്ക് സംരംഭങ്ങള് തുടങ്ങാന് വനിത വികസന കോര്പറേഷന് ഒപ്പം ഉണ്ട്. ലോണ് നല്കുക മാത്രമല്ല കണ്സള്ട്ടന്സി സേവനം ഉള്പ്പെടെ നല്കുന്നുണ്ട്. ഇത്തരത്തില് സംരംഭത്തിലേക്ക് വന്ന കേരളത്തിലെ വിവിധ സ്ഥലങ്ങളില് നിന്നുള്ള വനിതകളുടെ കൂട്ടായ്മ കൂടിയാണിത്. മറ്റുള്ളവര്ക്ക് പ്രചോദനമാകാന് കൂടിയാണ് ഈ മേള സംഘടിപ്പിക്കുന്നത്.
ഈ കാലഘട്ടത്തില് വനിതകളുടേയും കുട്ടികളുടേയും ക്ഷേമവും ശാക്തീകരണവും ഉറപ്പാക്കാന് വനിത ശിശു വികസന വകുപ്പ് നിരവധി പദ്ധതികള് നടപ്പിലാക്കി വരുന്നു. വകുപ്പിന്റെ വൈഫര്ക്കേഷന് നടത്തി. ജെന്ഡര് ബജറ്റ് അവതരിപ്പിച്ചു. സ്ത്രീകളുടേയും കുട്ടികളുടേയും ആരോഗ്യത്തില് മികച്ച മുന്നേറ്റമാണ് കേരളം നടത്തിയത്. സ്ത്രീകളുടെ സാമ്പത്തിക ശാക്തീകരണത്തിനായും വലിയ പരിശ്രമം നടത്തിയതായി മന്ത്രി വ്യക്തമാക്കി.
ഉന്നത വിദ്യാഭ്യാസ വകുപ്പ് മന്ത്രി ആര് ബിന്ദു സമ്മാനദാനം നിര്വഹിച്ചു. വനിത വികസന കോര്പറേഷന് മത്സര വിജയികള്, പാര്വ്വതരോഹകയായ ബിന്ദു ഒഎന് തുടങ്ങിയവര്ക്കാണ് സമ്മാനം വിതരണം ചെയ്തത്.
വികെ പ്രശാന്ത് എംഎല്എ അധ്യക്ഷത വഹിച്ച ചടങ്ങില് വനിത കമ്മീഷന് അധ്യക്ഷ പി സതീദേവി, വനിത ശിശു വികസന വകുപ്പ് പ്രിന്സിപ്പല് സെക്രട്ടറി ഡോ. ഷര്മിള മേരി ജോസഫ്, വനിത ശിശു വികസന വകുപ്പ് ഡയറക്ടര് ഹരിത വി കുമാര്, മുന് ഐപിഎസ് ഓഫീസര് ബി സന്ധ്യ, പ്ലാനിംഗ് ബോര്ഡ് മെമ്പര് മിനി സുകുമാരന്, ടോണി ജോസ് (ഐഡിഐബി ബാങ്ക്), ബീനാ പോള്, ഡയറക്ടര് ബോര്ഡ് അംഗങ്ങളായ ഗ്രേസ് എംഡി, ഷീബ ലിയോണ്, ആര് ഗിരിജ, പെണ്ണമ്മ തോമസ് എന്നിവര് പങ്കെടുത്തു. വനിത വികസന വകുപ്പ് ചെയര്പേഴ്സണ് കെസി റോസക്കുട്ടി സ്വാഗതവും മാനേജിംഗ് ഡയറക്ടര് ബിന്ദു വിസി നന്ദിയും രേഖപ്പെടുത്തി.
