കൊച്ചി: ഓഹരിയാക്കി മാറ്റാൻ കഴിയാത്ത കടപ്പത്രങ്ങളുടെ (എൻസിഡി) വില്പനയിലൂടെ ഏഷ്യൻ ഡെവലപ്മെന്റ് ബാങ്കിൽനിന്നും (എഡിബി) 100 മില്യൺ യുഎസ് ഡോളർ (ഏകദേശം 916 കോടി രൂപ) സമാഹരിക്കാനൊരുങ്ങി രാജ്യത്തെ പ്രമുഖ ഭവന വായ്പാ സ്ഥാപനമായ മോത്തിലാൽ ഓസ്വാൾ ഹോം ഫിനാൻസ്. ഭവന നിർമാണത്തിനായി അപേക്ഷിക്കുന്ന സ്ത്രീകൾക്ക് കുറഞ്ഞ നിരക്കിൽ സാമ്പത്തിക സേവനം ഉറപ്പാക്കുന്നതിന്റെ ഭാഗമായാണ് നടപടി. ഹരിതചട്ടങ്ങൾ പാലിച്ച് നിർമിക്കുന്ന പരിസ്ഥിതി സൗഹാർദ പാർപ്പിടങ്ങൾക്കായി ആകെ തുകയുടെ 10 ശതമാനം വിനിയോഗിക്കുമെന്നും കമ്പനി അറിയിച്ചു. രാജ്യത്തെ ഇടത്തരം കുടുംബങ്ങളുടെ വീടെന്ന സ്വപ്നം സഫലീകരിക്കാൻ ഉതകുന്ന, നിർണായക പങ്കാളിത്തമാണ് ഏഷ്യൻ ഡെവലപ്മെന്റ് ബാങ്കുമായി നടത്തുന്നതെന്ന് മോത്തിലാൽ ഓസ്വാൾ ഹോം ഫിനാൻസ് ലിമിറ്റഡ് എംഡിയും സിഇഒയുമായ സുകേഷ് ഭോവൽ പറഞ്ഞു. ഗ്രാമീണ മേഖലയിലെയും ചെറു പട്ടണങ്ങളിലെയും ആളുകൾക്ക് താങ്ങാവുന്ന ഭവന വായ്പാ സേവനം നൽകുന്നതോടൊപ്പം പരിസ്ഥിതി സൗഹൃദ നിർമാണ രീതികളെ പ്രോത്സാഹിപ്പിക്കുന്നതിന് ഫണ്ട് ഉപയോഗപ്പെടുത്തുമെന്നും അദ്ദേഹം കൂട്ടിച്ചേർത്തു.
Julie John
