ലണ്ടൻ/ലെസ്റ്റർ: യുകെയിലെ ലെസ്റ്ററിൽ പാർക്ക് ചെയ്തിരുന്ന വാനിനുള്ളിൽ പുരുഷന്റെ മൃതദേഹം കണ്ടെത്തിയ സംഭവത്തിൽ അന്വേഷണം ഊർജിതമാക്കി. മേയ് 27-ന് വൈകുന്നേരം ഗാർഡൻ സ്ട്രീറ്റിലെ കാർ പാർക്കിൽ കിടന്നിരുന്ന വെള്ള ഫോർഡ് ട്രാൻസിറ്റ് വാനിനുള്ളിലാണ് മൃതദേഹം കണ്ടെത്തിയത്.
വാഹനത്തിന്റെ അവസ്ഥയിൽ സംശയം തോന്നിയ ഒരാൾ പോലീസിനെ വിവരമറിയിച്ചതിനെ തുടർന്ന് നടത്തിയ പരിശോധനയിലാണ് മൃതദേഹം കണ്ടെത്തിയത്. തുടർന്ന് നടത്തിയ അന്വേഷണത്തിൽ വാനിന്റെ രജിസ്റ്റർ ചെയ്ത ഉടമയുമായി ബന്ധപ്പെട്ട വിവരങ്ങൾ ശേഖരിച്ച പോലീസ്, ലണ്ടനിലെ ഹൗൺസ്ലോയിൽ നിന്ന് 39-കാരിയായ ഒരു സ്ത്രീയെ കൊലപാതക സംശയത്തിൽ അറസ്റ്റ് ചെയ്തു.
അറസ്റ്റിന് പിന്നാലെ കേസ് മെട്രോപൊളിറ്റൻ പോലീസ് ഏറ്റെടുത്ത് ഹൗൺസ്ലോയിലെ ഒരു വീട്ടിൽ ക്രൈം സീൻ പ്രഖ്യാപിച്ച് വിശദമായ അന്വേഷണം ആരംഭിച്ചു. മരണപ്പെട്ട വ്യക്തിയുടെ തിരിച്ചറിയൽ നടപടികളും ബന്ധുക്കളെ കണ്ടെത്താനുള്ള ശ്രമങ്ങളും തുടരുകയാണ്.
സംഭവവുമായി ബന്ധപ്പെട്ട വിവരങ്ങൾ കൈവശമുള്ളവർ അന്വേഷണസംഘവുമായി ബന്ധപ്പെടണമെന്ന് പോലീസ് അഭ്യർഥിച്ചു.
