ഓസ്റ്റിൻ, ടെക്സാസ് : ടെക്സാസ് സംസ്ഥാനത്തിന്റെ ആരോഗ്യപരിപാലന രംഗത്തെ നിർണായക പ്രവർത്തനങ്ങളിൽ വീണ്ടും പങ്കാളിയാകാൻ ഇന്ത്യൻ-അമേരിക്കൻ വൈദ്യനായ സുരേന്ദ്ര വർമയെ ഗവർണർ ഗ്രെഗ് അബോട്ട് വീണ്ടും നിയമിച്ചു. ടെക്സാസ് മെഡിക്കൽ ബോർഡിന്റെ (TMB) ഡിസ്ട്രിക്ട് ത്രീ റിവ്യൂ കമ്മിറ്റി അംഗമായാണ് അദ്ദേഹത്തെ പുനർനിയമിച്ചിരിക്കുന്നത്.
ഡോക്ടർമാരെയും മറ്റ് ആരോഗ്യപ്രവർത്തകരെയും സംബന്ധിച്ച പരാതികൾ, അന്വേഷണങ്ങൾ, അച്ചടക്കനടപടികൾ എന്നിവ പരിശോധിച്ച് ടെക്സാസ് മെഡിക്കൽ ബോർഡിന് ശുപാർശകൾ നൽകുന്ന സുപ്രധാന സമിതിയാണ് ഡിസ്ട്രിക്ട് ത്രീ റിവ്യൂ കമ്മിറ്റി. സംസ്ഥാനത്തെ മെഡിക്കൽ ലൈസൻസിംഗ് മാനദണ്ഡങ്ങൾ, പ്രൊഫഷണൽ പെരുമാറ്റം, രോഗികളുടെ സുരക്ഷ എന്നിവ ഉറപ്പാക്കുന്നതിലും ഈ സമിതിക്ക് പ്രധാന പങ്കുണ്ട്.
ഡോ. വർമ മുൻപ് ടെക്സാസ് മെഡിക്കൽ ബോർഡിലും, ഡിസ്ട്രിക്ട് ത്രീ റിവ്യൂ കമ്മിറ്റിയിലും, കൂടാതെ ടാസ്ക് ഫോഴ്സ് ഓൺ ഇൻഫെക്ഷ്യസ് ഡിസീസ് പ്രിപെയർഡ്നസ് ആൻഡ് റെസ്പോൺസ് എന്ന പ്രത്യേക സമിതിയിലും ഗവർണറുടെ നിയമനത്തിലൂടെ സേവനം അനുഷ്ഠിച്ചിട്ടുണ്ട്.
പുതുതായി പുനർനിയമിക്കപ്പെട്ട സഹഅംഗമായ ഷാരൺ കാർക്കൊപ്പം ഡോ. വർമ 2032 ജനുവരി 15 വരെ ഈ പദവിയിൽ തുടരും.
ലബ്ബോക്കിൽ താമസിക്കുന്ന ഡോ. സുരേന്ദ്ര വർമ നിലവിൽ ടെക്സസ് ടെക് യൂണിവേഴ്സസിറ്റി ഹെൽത്ത് സയൻസ് സെന്ററിൽ ഗ്രാജുവേറ്റ് മെഡിക്കൽ എജ്യുക്കേഷന്റെ എക്സിക്യൂട്ടീവ് അസോസിയേറ്റ് ഡീനായും മെഡിക്കൽ വിദ്യാഭ്യാസ വിഭാഗത്തിലെ എൻഡോവ്ഡ് ചെയറായും സേവനം ചെയ്യുന്നു.
അമേരിക്കൻ പീഡിയാട്രിക് സൊസൈറ്റി, സൊസൈറ്റി ഫോർ പീഡിയാട്രിക് റിസർച്ച്, എൻഡോക്രൈൻ സൊസൈറ്റി എന്നിവയിലെ അംഗമാണ് അദ്ദേഹം. കൂടാതെ അമേരിക്കൻ ഡയബറ്റിക് അസ്സോസിയേഷന്റെ മുൻ പ്രസിഡന്റായും പ്രവർത്തിച്ചിട്ടുണ്ട്.
ഇന്ത്യയിലെ യൂണിവേഴ്സസിറ്റി ഓഫ് ലക്നൗയിൽ നിന്ന് ബിരുദ പഠനം പൂർത്തിയാക്കിയ അദ്ദേഹം കിംഗ് ജോർജ് മെഡിക്കൽ യൂണിവേഴ്സസിറ്റിയിൽ നിന്ന് എം.ബി.ബി.എസ്, എം.ഡി (പീഡിയാട്രിക്സ്) ബിരുദങ്ങളും നേടിയിട്ടുണ്ട്.
