നേഷൻ ഓഫ് ഇസ്ലാം’ മത-സാമൂഹിക പ്രസ്ഥാനത്തിന്റെ നേതാവ് ലൂയിസ് ഫറഖാന്റെ ഭാര്യ ഖദീജ ഫറഖാൻ (90) അന്തരിച്ചു. ശനിയാഴ്ചയായിരുന്നു അന്ത്യം. സംഘടനയുടെ ‘ഫസ്റ്റ് ലേഡി’ എന്നും ‘മദർ ഖദീജ’ എന്നും അവർ അറിയപ്പെട്ടിരുന്നു. 72 വർഷമായി ലൂയിസ് ഫറഖാന്റെ പങ്കാളിയായിരുന്നു. കറുത്തവർഗ്ഗക്കാരുടെ സ്വയംപര്യാപ്തതയ്ക്കായി വാദിക്കുന്ന ഈ പ്രസ്ഥാനത്തിന്റെ ചിക്കാഗോയിലുള്ള ആസ്ഥാനം കേന്ദ്രീകരിച്ചായിരുന്നു അവരുടെ പ്രവർത്തനം.
ബെറ്റ്സി റോസ് എന്ന പേരിൽ ജനിച്ച അവർ 1953 സെപ്റ്റംബർ 12-നാണ് ലൂയിസ് ഫറഖാനെ വിവാഹം കഴിക്കുന്നത്. ഒമ്പത് മക്കളുണ്ട്.
പ്രശസ്ത സിവിൽ റൈറ്റ്സ് നേതാവ് മാൽക്കം എക്സിന്റെ സ്വാധീനത്തിൽ ഭർത്താവ് പ്രസ്ഥാനത്തിൽ ചേർന്നതിന് പിന്നാലെ 1955-ലാണ് അവർ ഇസ്ലാം മതം സ്വീകരിക്കുന്നതും പേര് മാറ്റുന്നതും.
1997-ൽ ഫിലാഡൽഫിയയിൽ നടന്ന ‘മില്യൺ വുമൺ മാർച്ചി’ൽ അവർ പങ്കെടുത്തു സംസാരിച്ചിരുന്നു. “സ്ത്രീകളുടെ വളർച്ചയ്ക്കപ്പുറം ഒരു സമൂഹത്തിനും ഉയരാൻ കഴിയില്ല” എന്ന അവരുടെ വാക്കുകൾ ഏറെ ശ്രദ്ധേയമായിരുന്നു.
അവരുടെ നിര്യാണത്തിൽ വിവിധ സാമൂഹിക-സാംസ്കാരിക നേതാക്കൾ അനുശോചനം രേഖപ്പെടുത്തി. സംസ്കാര ചടങ്ങുകൾ പിന്നീട് അറിയിക്കുമെന്ന് സംഘടനയുടെ എക്സിക്യൂട്ടീവ് കൗൺസിൽ പ്രസ്താവനയിൽ അറിയിച്ചു.
