കൊച്ചി: ശ്രീറാം ഗ്രൂപ്പിന് കീഴിലുള്ള മുൻനിര ധനകാര്യ സ്ഥാപനമായ ശ്രീറാം ഫിനാൻസിന്റെ പുതുക്കിയ സ്ഥിരനിക്ഷേപ പലിശ നിരക്കുകൾ പ്രഖ്യാപിച്ചു. പുതുക്കിയ നിരക്ക് പ്രകാരം, വിവിധ കാലയളവിലേക്കുള്ള സ്ഥിരനിക്ഷേപങ്ങൾക്ക് 6.85 ശതമാനം മുതൽ 7.50 ശതമാനം വരെ പലിശ ലഭിക്കും. 60 മാസത്തെ നിക്ഷേപങ്ങൾക്കാണ് ഉയർന്ന പലിശയായ 7.50 ശതമാനം ലഭിക്കുക. 60 വയസിനു മുകളിലുള്ള മുതിർന്ന പൗരന്മാരുടെ സ്ഥിര നിക്ഷേപങ്ങളിൽ 0.50 ശതമാനം അധിക പലിശ ലഭിക്കും. നിക്ഷേപങ്ങൾ പുതുക്കുന്നവർക്കും അധിക പലിശ ലഭിക്കും. സ്ത്രീ നിക്ഷേപകരുടെ പലിശ നിരക്കിൽ 0.05 ശതമാനത്തിന്റെ അധിക പലിശയും ഏർപ്പെടുത്തിയിട്ടുണ്ട്. കാലാവധി പൂർത്തീകരിച്ച് പുതുക്കുന്ന എല്ലാ സ്ഥിരനിക്ഷേപങ്ങൾക്കും വാർഷിക നിരക്കിൽ 0.15 ശതമാനത്തിന്റെ അധിക നേട്ടമുണ്ടാകും. 10 കോടി രൂപ വരെയുള്ള നിക്ഷേപങ്ങൾക്കാണ് ഈ പലിശനിരക്ക് ലഭിക്കുക. നിക്ഷേപ പദ്ധതികൾക്കനുസരിച്ച് പലിശ നിരക്കുകളിൽ മാറ്റം വരും. ഒരു വർഷം മുതൽ നാലു വർഷം വരെയുള്ള ഫിക്സഡ് ഇൻവസ്റ്റ്മെന്റ് പ്ലാനുകൾക്കും 6.85 ശതമാനം മുതൽ 7.50 ശതമാനം വരെ പലിശ ഏർപ്പെടുത്തിയിട്ടുണ്ട്. മുൻനിര ധനകാര്യ സ്ഥാപനങ്ങളിൽ ഏറ്റവും വിശ്വാസയോഗ്യമായ സ്ഥിരനിക്ഷേപ പദ്ധതിയാണ് ശ്രീറാം ഫിനാൻസിന്റേത്. വിവിധ റേറ്റിംഗ് ഏജൻസികളായ ക്രിസിൽ, ഐസിആർഎ, ഇന്ത്യ റേറ്റിംഗ്സ് ആൻഡ് റിസർച്, കെയർ റേറ്റിംഗ്സ് എന്നിവയുടെ AAA/സ്റ്റേബിൾ റേറ്റിംഗും ശ്രീറാം ഫിനാൻസിന്റെ സ്ഥിരനിക്ഷേപ പദ്ധതികൾക്കുണ്ട്. നിരക്കുകൾ മെയ് 6 മുതൽ പ്രാബല്യത്തിൽ വരുമെന്ന് ശ്രീറാം ഫിനാൻസ് അറിയിച്ചു.
Anu Maria Thomas
