കൊച്ചി : സാധാരണ സാനിറ്ററി നാപ്കിനുകൾ ഉണ്ടാക്കുന്ന പരിസ്ഥിതി മലിനീകരണത്തിന് ശാശ്വത പരിഹാരമായി പൂർണമായും പരിസ്ഥിതി സൗഹൃദമായ ‘ഹാപ്പി ഡേയ്സ് എർത്ത്’ സാനിറ്ററി നാപ്കിൻ അവതരിപ്പിച്ച് കേന്ദ്ര ആരോഗ്യ കുടുംബക്ഷേമ മന്ത്രാലയത്തിന് കീഴിലുള്ള മിനിരത്ന പൊതുമേഖലാ സ്ഥാപനമായ എച്ച്എൽഎൽ ലൈഫ്കെയർ ലിമിറ്റഡ് (എച്ച്എൽഎൽ). പ്രകൃതിദത്ത അസംസ്കൃത വസ്തുക്കളാൽ നിർമ്മിച്ച ഈ നാപ്കിൻ, പരിസ്ഥിതിക്ക് ഒട്ടും തന്നെ ദോഷം വരുത്താത്ത രീതിയിൽ 100% മണ്ണിൽ ലയിച്ചുചേരുന്നു . മികച്ച കമ്പോസ്റ്റബിലിറ്റി പരിശോധന ഫലങ്ങളോടൊപ്പം, BIS ഗുണനിലവാരവും ഉറപ്പ് നൽകുന്നു.
‘ഹാപ്പി ഡേയ്സ് എർത്ത്’ സാനിറ്ററി നാപ്കിന്റെ 91 ശതമാനത്തിലധികവും
156 ദിവസത്തിനകം മണ്ണിൽ ലയിച്ചുചേരുമെന്ന് പഠനങ്ങളിലൂടെ വ്യക്തമാക്കുന്നു. 35 മില്ലിലിറ്റർ വരെ ആഗിരണശേഷിയുള്ളതായും ബിഐഎസ് മാനദണ്ഡങ്ങൾ പ്രകാരമുള്ള പരിശോധനയിൽ കണ്ടെത്തിയിട്ടുണ്ട്. ഉയർന്ന ആഗിരണശേഷിയും ലീക്കേജ് പ്രൂഫുമായ ‘ഹാപ്പി ഡേയ്സ് എർത്ത്’ സാനിറ്ററി നാപ്കിനുകൾ ചർമ്മത്തിന് ഒട്ടും അസ്വസ്ഥത ഉണ്ടാക്കില്ലെന്ന സവിശേഷത കൂടിയുണ്ട്.
‘ഹാപ്പി ഡേയ്സ് എർത്ത്’ നാപ്കിന്റെ ഉള്ളിലെ പ്രധാന ആഗിരണ ഭാഗം സെല്ലുലോസ് അധിഷ്ഠിത വസ്തുക്കൾക്കൊണ്ടും, മുകളിലെ പാളി സസ്യങ്ങളിൽ നിന്നുള്ള നാരുകൾകൊണ്ടുമാണ് നിർമ്മിച്ചിരിക്കുന്നത്. അതിനാൽ, സാധാരണ നാപ്കിനുകളിൽ ലീക്കേജ് തടയാൻ ഉപയോഗിക്കുന്ന പ്ലാസ്റ്റിക് ഫിലിമുകൾക്ക് പകരം മണ്ണിൽ ലയിക്കുന്ന കമ്പോസ്റ്റബിൾ വസ്തുക്കളാണ് ലീക്ക് പ്രൂഫ് പാളികളുടെ നിർമ്മാണത്തിനായി ഉപയോഗിച്ചിരിക്കുന്നത്. കൂടാതെ ഇതിലെ പാക്കേജിങ്ങ് സാമഗ്രികളും ജൈവവിഘടനത്തിന് വിധേയമാകുന്ന വസ്തുക്കൾ കൊണ്ടാണ് തയാറാക്കിയിട്ടുള്ളത്.
രാജ്യത്തെ സ്ത്രീകളുടെ ആരോഗ്യ സംരക്ഷണത്തിന് എന്നും മുൻഗണന നൽകുന്ന എച്ച്എൽഎൽ, ഗർഭനിരോധന ഗുളികകൾ, ഐയുഡി (IUD) ഉൾപ്പെടെയുള്ള ഗർഭനിരോധന ഉപാധികൾ, മെൻസ്ട്രൽ കപ്പുകൾ, സാനിറ്ററി നാപ്കിനുകൾ, വെൽനസ് ഉൽപ്പന്നങ്ങൾ തുടങ്ങിയ വിപുലമായ നിരയാണ് വനിതകൾക്കായി വിപണിയിൽ എത്തിക്കുന്നത്. പരിസ്ഥിതിക്ക് കോട്ടം തട്ടാത്തതും സുരക്ഷിതവുമായ ആർത്തവ ശുചിത്വ ഉൽപ്പന്നങ്ങൾ ജനങ്ങൾക്ക് ലഭ്യമാക്കാനുള്ള എച്ച്എൽഎല്ലിന്റെ പ്രതിബദ്ധതയുടെ ഭാഗമായാണ് ‘ഹാപ്പി ഡേയ്സ് എർത്ത്’ വികസിപ്പിച്ചെടുത്തതെന്ന് എച്ച്എൽഎൽ അധികൃതർ വ്യക്തമാക്കി.
സാധാരണ വിപണിയിൽ ലഭിക്കുന്ന സാനിറ്ററി നാപ്കിനുകൾ മികച്ച ആഗിരണശേഷിയും സുരക്ഷയും നൽകുമെങ്കിലും, അവയുടെ സംസ്കരണമാണ് പ്രധാന വെല്ലുവിളി. നൂറുകണക്കിന് വർഷങ്ങൾ കഴിഞ്ഞാലും ഇവ മണ്ണിൽ ദ്രവിക്കാതെ അവശേഷിക്കും. ഇത് വൻതോതിൽ പ്ലാസ്റ്റിക് മാലിന്യങ്ങൾക്കും മൈക്രോപ്ലാസ്റ്റിക് മലിനീകരണത്തിനും കാരണമാകുന്നതിനൊടൊപ്പം നഗരങ്ങളിലും ഗ്രാമങ്ങളിലും ഒരുപോലെ വലിയ മാലിന്യസംസ്കരണ പ്രതിസന്ധിയാണ് സൃഷ്ടിക്കുന്നത്. ഇതിനൊരു മികച്ച പരിഹാരമായാണ് ‘ഹാപ്പി ഡേയ്സ് എർത്ത്’ വികസിപ്പിച്ചിരിക്കുന്നതെന്ന് അധികൃതർ കൂട്ടിച്ചേർത്തു.
Anju V Nair
