ന്യൂയോർക്ക് : പി. ടി. പൗലോസ് എന്ന അക്ഷരസ്നേഹിയുടെ വിയോഗത്തിലൂടെ നമുക്ക് നഷ്ടമാകുന്നത് സത്യസന്ധനായ ഒരെഴുത്തുകാരനെയാണ്. അതോടൊപ്പംതന്നെ പ്രഗത്ഭനായ ഒരു നടനെയും, നാടക സംവിധായകനെയും ധീരനായ ഒരു പത്രപ്രവർത്തകനെയുമാണ്.
ജീവിതത്തിലും എഴുത്തിലും തന്റെ നിലപാടുകളിൽ ഉറച്ചുനിന്ന വ്യക്തിത്വത്തിനുടമയാണ് പി. ടി. തന്റെ എഴുത്തിലൂടെ അദ്ദേഹം സൗമ്യമായി കലഹിച്ചു, ശാന്തനായി ഗർജിച്ചു, തനിക്കു മുന്നിൽ കണ്ട അനീതികളോട് മുഖം നോക്കാതെ പ്രതികരിച്ചു. അപ്രിയ സത്യങ്ങൾക്കു നേരെ വിരൽ ചൂണ്ടി. അപ്പോഴും ആരോടും പരിഭവിക്കാതെ, സൗഹൃദങ്ങളെ ചേർത്തു നിർത്തുന്നതിൽ ഈ എഴുത്തുകാരൻ ഏറെ ശ്രദ്ധിച്ചു.
പി. ടി. പൗലോസ് എന്ന എഴുത്തുകാരനെ ആദ്യം കാണുന്നതും പരിചയപ്പെടുന്നതും ന്യൂയോർക്ക് സർഗ്ഗവേദിയുടെ ഒത്തുകൂടലുകളിലാ യിരുന്നു. സർഗ്ഗവേദിയുടെ പ്രവർത്തകരിൽ ഒരാളായ അദ്ദേഹം അവിടുത്തെ സജീവ സാന്നിധ്യമായിരുന്നു. ആരവങ്ങളില്ലാതെ, നിശബ്ധനായി, പി. ടി. തന്റെ റോളുകൾ ഏറ്റം ഭംഗിയായി ചെയ്തു. ലാനയുടെ മീറ്റിങ്ങുകളിലെ അദ്ദേഹത്തിന്റെ സൗമ്യസാന്നിദ്ധ്യവും ഉജ്ജ്വലമായ പ്രഭാഷണങ്ങളും നമുക്ക് പരിചിതമാണ്.
കഥകളും, നാടകങ്ങളും, ലേഖനങ്ങളുമായി 6 പുസ്തകങ്ങൾ രചിച്ച പി. ടി. പൗലോസ് പ്രഗത്ഭനായ ഒരു നടനും, നാടക സംവിധായകനും, പത്രപ്രവർത്തകനുമായിരുന്നു. തന്റെ സ്നേഹ സൗഹൃദങ്ങളെക്കുറിച്ചും നാടകത്തെക്കുറിച്ചും 25 വർഷത്തെ കൽക്കട്ട ജീവിതത്തെക്കുറിച്ചും സംസാരിച്ച പൗലോസിന്റെ വാക്കുകൾക്ക് ആഴവും വ്യാപ്തിയും വാചാലതയും ഏറെയായിരുന്നു. നൊമ്പരപ്പെടുത്തുന്ന ജീവിതാനുഭങ്ങളെക്കുറിച്ചും നാടകീയ സമാനമായ ജീവിതത്തെക്കുറിച്ചും വിവരിക്കുമ്പോൾ ഈ മനുഷ്യൻ ഒരു അസാമാന്യമായ താപസ്സ നിസ്സംഗതയും കൈവരിച്ചിരുന്നു.
ലിറ്റററി അസോസിയേഷൻ ഓഫ് നോർത്ത് അമേരിക്കയുടെ (ലാന) മെമ്പറും സജീവ പ്രവർത്തകനും ആയിരുന്ന പ്രിയ പൗലോസിന്റെ നിര്യാണത്തിൽ ലാനയുടെ അഗാധമായ ദുഃഖം രേഖപ്പെടുത്തുന്നു. പി. ടി. പൗലോസിന്റെ കുടുംബാംഗങ്ങളുടെ വേദനയിൽ ലാനാ കുടുംബാംഗങ്ങളും പങ്കുചേരുന്നു.
അദ്ദേഹത്തോടുള്ള ആദര സൂചകമായി അനുശോചന മീറ്റിംഗ് ഇന്ന് വൈകുന്നേരം 8 PM CST/ 9PM EST സൂം വഴി കൂടുന്നു. എല്ലാവരുടെയും സാന്നിദ്ധ്യ സഹകരണം ഉണ്ടാകണമെന്ന് അഭ്യർത്ഥിക്കുന്നു. സൂം മീറ്റിംഗ് ഐ. ഡി. 880 4102 2780. കൂടുതൽ വിവരങ്ങൾ ലാന പ്രസിഡൻ്റ് ശാമുവേൽ യോഹന്നാനിൽ നിന്നും (+1 214 435 0124) ലഭിക്കും.
തയ്യാറാക്കിയത്:
ലാനാ എക്സിക്യൂട്ടീവ് ബോർഡിനുവേണ്ടി
നിർമല ജോസഫ് – സെക്രട്ടറി +1 347 204 0062
