തൃശൂർ: കോവിഡ് മഹാമാരിക്കാലത്ത് മാതാപിതാക്കളെ നഷ്ടമായ കുട്ടികളുടെ തുടർ വിദ്യാഭ്യാസത്തിന് ജോയ്ആലുക്കാസ് ഫൗണ്ടേഷൻ നടപ്പിലാക്കിയ ‘ജോയ് ഓഫ് ഹോപ്’ വിദ്യാഭ്യാസ സ്കോളർഷിപ്പ് ലഭിച്ച വിദ്യാർത്ഥികളുടെ സംഗമം തൃശ്ശൂരിൽ നടത്തി. ജോയ്ആലുക്കാസ് ഗ്രൂപ്പ് ചെയർമാനും മാനേജിങ് ഡയറക്ടറുമായ ഡോ. ജോയ് ആലുക്കാസ് അധ്യക്ഷത വഹിച്ച ചടങ്ങിൽ പ്രശസ്ത മജീഷ്യനും മോട്ടിവേഷണൽ സ്പീക്കറുമായുമായ ഗോപിനാഥ് മുതുകാട് മുഖ്യാതിഥിയായി. സ്കോളർഷിപ് കരസ്ഥമാക്കിയതിനുശേഷം എസ് എസ് എൽ സി, പ്ലസ് ടു പരീക്ഷകളിൽ ഉന്നതവിജയം നേടിയ 24 വിദ്യാർത്ഥികളെ അദ്ദേഹം ആദരിച്ചു.
ഏതു പ്രതിസന്ധിയെയും തരണം ചെയ്ത് വിദ്യാഭ്യാസം നേടാനുള്ള അവകാശവും അവസരവും മുഴുവൻ കുട്ടികൾക്കും ഒരുക്കിനൽകണമെന്ന ചിന്തയിൽനിന്നാണ് ജോയ് ഓഫ് ഹോപ് പദ്ധതി ആരംഭിച്ചതെന്ന് ഡോ. ജോയ് ആലുക്കാസ് പറഞ്ഞു. ജീവിതത്തിൽ താങ്ങായി നിൽക്കുന്ന മാതാപിതാക്കളെ നഷ്ടമാകുകയെന്നത് തീരാദുഖമാണ്. ആ നോവിന് പൂർണ പരിഹാരമാകില്ലെങ്കിലും, കുട്ടികളുടെ ഭാവിക്കുവേണ്ടി വിദ്യാഭ്യാസ ധനസഹായമൊരുക്കുക എന്ന മഹത്തരമായ കർത്തവ്യം പൂർത്തീകരിക്കാൻ ഞങ്ങൾക്കായി. സ്കോളർഷിപ്പ് കരസ്ഥമാക്കിയ വിദ്യാർത്ഥികളുടെ വിദ്യാഭ്യാസ പുരോഗതി ഏറെ സന്തോഷം നൽകുന്നതാണ്. തുടർന്നും, അർഹരായ കൂടുതൽ വിദ്യാർത്ഥികളെ കണ്ടെത്തി സ്കോളർഷിപ് നൽകുമെന്നും ഡോ. ജോയ് ആലുക്കാസ് പറഞ്ഞു.
2023ൽ കളക്ടറായിരുന്ന കൃഷ്ണതേജ ഐഎഎസിന്റെ നേതൃത്വത്തിലാണ് ജോയ് ഓഫ് ഹോപ് പദ്ധതി ആരംഭിച്ചത്. 2.5 കോടി രൂപയിലധികം ചെലവിട്ട പദ്ധതിയിലൂടെ മുന്നൂറിലധികം വിദ്യാർത്ഥികൾ സ്കോളർഷിപ് നേടി. ഗുണഭോക്താക്കളായ കുട്ടികളും രക്ഷിതാക്കളും അതിഥികളും ഉൾപ്പെടെ നിരവധിപേർ സംഗമത്തിൽ പങ്കെടുത്തു.
Photo Caption:
‘ജോയ് ഓഫ് ഹോപ്’ വിദ്യാഭ്യാസ സ്കോളർഷിപ്പ് നേടിയവരുടെ സംഗമം ജോയ്ആലുക്കാസ് ഗ്രൂപ്പ് ചെയർമാനും മാനേജിംഗ് ഡയറക്ടർമായ ഡോ. ജോയ് ആലുക്കാസ് ഉദ്ഘാടനം ചെയ്യുന്നു. മജീഷ്യനും മോട്ടിവേഷണൽ സ്പീക്കറുമായ ഗോപിനാഥ് മുതുകാട്, ജോയ്ആലുക്കാസ് ഗ്രൂപ്പ് ഡയറക്ടർ ജോളി ജോയ് ആലുക്കാസ്, എക്സിക്യൂട്ടീവ് ഡയറക്ടർ തോമസ് മാത്യു, ഡയറക്ടർ എൽസ ജോയ് ആലുക്കാസ്, സ്കോളർഷിപ്പിന് അർഹരായ വിദ്യാർഥി പ്രതിനിധികൾ എന്നിവർ സമീപം.
Julie John
