ഇടലിപ്പാറക്കുടി (ഇടുക്കി), ജൂലൈ 29: കേരളത്തിലെ ഏറ്റവും സഞ്ചാരസൗകര്യം കുറഞ്ഞ ആദിവാസി മേഖലയായ ഇടമലക്കുടിയിലെ മുതുവാൻ വിഭാഗം സ്ത്രീകളുടെ ആരോഗ്യവും അന്തസ്സും സാമൂഹിക സാമ്പത്തിക പുരോഗതിയും ലക്ഷ്യമിട്ട് എക്സ്പീരിയൻ ടെക്നോളജീസിന്റെ സാമൂഹിക പ്രതിബദ്ധതാ വിഭാഗമായ എക്സ്പീരിയൻ ഫൗണ്ടേഷൻ, പ്രോജക്ട് ഇടം, EDEM (Edamalakudi Development and Empowerment Mission)-എന്നപേരിൽ നടപ്പാക്കുന്ന പദ്ധതിയുടെ ഭാഗമായി സ്ഥാപിച്ച രണ്ടാമത്തെ വനിതാ ശാക്തീകരണ കേന്ദ്രം (Women’s Empowerment Centre ,WEC) ചൊവ്വാഴ്ച ഇടലിപ്പാറക്കുടിയിൽ ജില്ലാ കളക്ടർ ഉദ്ഘാടനം ചെയ്തു.
കേന്ദ്രം ഉദ്ഘാടനം ചെയ്തത് ഇടുക്കി ജില്ലാ കളക്ടർ ശ്രീ. ദിനേശൻ ചെറുവത്ത് IAS ആണ്. ദേവികുളം റവന്യൂ ഡിവിഷണൽ ഓഫീസർ ശ്രീമതി ആര്യ വി. എം. IAS ചടങ്ങിൽ മുഖ്യാതിഥിയായി പങ്കെടുത്തു. എക്സ്പീരിയൻ ടെക്നോളജീസ് ചീഫ് ഓപ്പറേറ്റിംഗ് ഓഫീസറും എക്സ്പീരിയൻ ഫൗണ്ടേഷൻ മാനേജിംഗ് ട്രസ്റ്റിയുമായ ശ്രീ. സുരേഷ് വി. പി. ചടങ്ങിൽ അധ്യക്ഷത വഹിച്ചു. ചടങ്ങിൽ പൂർത്തിയായ വനിതാ ശാക്തീകരണ കേന്ദ്രത്തിന്റെ രേഖകൾ മൂന്നാർ ഡിവിഷണൽ ഫോറസ്റ്റ് ഓഫീസർ ശ്രീ. സാജു വർഗീസ് IFS-ന് ശ്രീ. സുരേഷ് വി. പി. കൈമാറി. ഭൂമിയുടെ പരിപാലകരായ വനം വകുപ്പിന് പൂർത്തിയായ ഈ സൗകര്യം ഔപചാരികമായി കൈമാറുന്നതിന്റെ പ്രതീകമായിരുന്നു ഇത്.
കേരളത്തിലെ ഒറ്റപ്പെട്ട ആദിവാസി പ്രദേശങ്ങളിലൊന്നിൽ സ്ത്രീശാക്തീകരണത്തിനായുള്ള എക്സ്പീരിയൻ ഫൗണ്ടേഷന്റെ പ്രവർത്തനങ്ങളിൽ മറ്റൊരു സുപ്രധാന നാഴികക്കല്ലായാണ് ഈ സംരംഭം വിലയിരുത്തപ്പെടുന്നത്.
അധ്യക്ഷ പ്രസംഗത്തിൽ ശ്രീ. സുരേഷ് വി. പി. എക്സ്പീരിയൻ ഫൗണ്ടേഷന്റെ സുസ്ഥിരവും സമൂഹകേന്ദ്രിതവുമായ വികസന പ്രതിബദ്ധത വീണ്ടും ഉറപ്പിച്ചു.
“മുതുവാൻ സമൂഹം നേരിടുന്ന പ്രത്യേക വെല്ലുവിളികൾ മനസ്സിലാക്കിയ ശേഷമാണ് പ്രോജക്ട് EDEM രൂപകൽപ്പന ചെയ്തത്. വനിതാ ശാക്തീകരണ കേന്ദ്രം ഒരു അടിസ്ഥാന സൗകര്യ പദ്ധതിയായി മാത്രം അല്ല, സ്ത്രീകൾക്ക് ആരോഗ്യവും ശുചിത്വവും മെച്ചപ്പെടുത്താനും, പുതിയ കഴിവുകൾ വികസിപ്പിക്കാനും, പരമ്പരാഗത കരകൗശലരീതികൾ സംരക്ഷിക്കാനും, കൂടുതൽ സ്വയംപര്യാപ്തത നേടാനും കഴിയുന്ന സുരക്ഷിതവും ഒപ്പം സാംസ്കാരികമായി അനുയോജ്യവുമായ ഇടമായിട്ടാണ് രൂപകൽപ്പന ചെയ്തിരിക്കുന്നത്. ഈ സംരംഭം യാഥാർത്ഥ്യമാക്കുന്നതിൽ പൂർണ്ണ പിന്തുണ നൽകിയ ജില്ലാ ഭരണകൂടത്തിനും വനം, റവന്യൂ വകുപ്പുകൾക്കും ഇടമലക്കുടിയിലെ ജനങ്ങൾക്കും ഞങ്ങൾ ഹൃദയപൂർവ്വം നന്ദി പറയുന്നു,” അദ്ദേഹം പറഞ്ഞു.
തേൻപാറക്കുടിയിൽ ഇക്കഴിഞ്ഞ മെയ് 25 ന് ഉദ്ഘാടനം ചെയ്യപ്പെട്ട ആദ്യ കേന്ദ്രത്തിന് പിന്നാലെ, പ്രോജക്ട് EDEM-ന്റെ കീഴിൽ പൂർത്തിയാകുന്ന രണ്ടാമത്തെ വനിതാ ശാക്തീകരണ കേന്ദ്രമാണ് ഇടലിപ്പാറക്കുടിയിലേത്.
ശ്രീ. സുരേഷ് തുടർന്നു, പരിമിതമായ റോഡ് സൗകര്യവും ദുർഘടമായ ഭൂപ്രകൃതിയും വെല്ലുവിളികൾ ഉയർത്തിയ പ്രദേശത്താണ് ഈ വനിതാ ശാക്തീകരണ കേന്ദ്രം യാഥാർഥ്യമായത്. പദ്ധതിയുടെ വിജയത്തിനായി ആത്മാർഥമായി സഹകരിച്ച എക്സ്പീരിയൻ ടെക്നോളജീസിന്റെ നേതൃത്വത്തിനും എക്സ്പീരിയൻ ഫൗണ്ടേഷൻ അംഗങ്ങൾക്കും അദ്ദേഹം നന്ദി രേഖപ്പെടുത്തി. സഹാനുഭൂതി, ധാർമികത, മികവ് എന്നീ എക്സ്പീരിയന്റെ അടിസ്ഥാന മൂല്യങ്ങളെ മുറുകെപ്പിടിച്ചുള്ള അവരുടെ കൂട്ടായ പരിശ്രമമാണ് ഈ പദ്ധതി വിജയകരമായി പൂർത്തിയാക്കാൻ വഴിയൊരുക്കിയതെന്നും, സമൂഹത്തോടുള്ള എക്സ്പീരിയന്റെ ഉത്തരവാദിത്തബോധത്തിന്റെ സാർഥകമായ പ്രതിഫലനമാണ് ഈ സംരംഭമെന്നും അദ്ദേഹം പറഞ്ഞു.
ചടങ്ങിൽ മൂന്നാർ റേഞ്ച് ഫോറസ്റ്റ് ഓഫീസർ ശ്രീ. ബിജു എസ്, ഡെപ്യൂട്ടി റേഞ്ച് ഫോറസ്റ്റ് ഓഫീസർ ശ്രീ. അഭിലാഷ്, ഇടമലക്കുടി ഗ്രാമപഞ്ചായത്ത് പ്രസിഡന്റ് ശ്രീ. ബിനു, ഇടമലക്കുടി ഗ്രാമപഞ്ചായത്ത് സെക്രട്ടറി ശ്രീ. സജി, വില്ലേജ് ഓഫീസർ ശ്രീ. ശ്യാം, കൂടാതെ മുതുവാൻ സമൂഹത്തിലെ നേതാക്കളും ഒപ്പം വിവിധ ഉന്നതികളിൽ നിന്നുള്ള നൂറുകണക്കിന് മുതുവാൻ സമൂഹാംഗങ്ങളും പങ്കെടുത്തു.
ഇടമലക്കുടിയുടെ സമഗ്ര വികസനം ലക്ഷ്യമിട്ട് എക്സ്പീരിയൻ ഫൗണ്ടേഷൻ നടപ്പാക്കുന്ന മുഖ്യ പദ്ധതിയാണ് പ്രോജക്ട് EDEM (Edamalakudi Development and Empowerment Mission). വനിതാ ശാക്തീകരണം, വിദ്യാഭ്യാസം, ആരോഗ്യപരിപാലനം, അടിസ്ഥാന സാമൂഹിക സൗകര്യങ്ങളുടെ വികസനം, സുസ്ഥിര ഉപജീവനമാർഗങ്ങൾ എന്നിവയ്ക്ക് മുൻഗണന നൽകുന്നതോടൊപ്പം, തദ്ദേശീയ മുതുവാൻ സമൂഹത്തിന്റെ സാംസ്കാരിക സ്വത്വവും പാരമ്പര്യവും സംരക്ഷിക്കുന്നതിനും പദ്ധതി പ്രാധാന്യം നൽകുന്നു. സമൂഹത്തോടൊപ്പം കൈകോർത്ത്, അവരെ പങ്കാളികളാക്കിക്കൊണ്ട്, സുസ്ഥിരവും സമൂഹകേന്ദ്രീകൃതവുമായ വികസനം സാധ്യമാക്കുകയെന്ന എക്സ്പീരിയൻ ഫൗണ്ടേഷന്റെ ദീർഘകാല പ്രതിബദ്ധതയുടെ പ്രതിഫലനമാണ് ഈ പദ്ധതി.
Rumi Pandey
