എഡ്മൺട്ടൺ : ആൽബർട്ടയിൽ 65 വയസും അതിൽ കൂടുതലുമുള്ള സജീവ ജീവനക്കാർക്ക് (active employees) ലഭിക്കുന്ന ആരോഗ്യ ആനുകൂല്യങ്ങളിൽ നിർണായക മാറ്റവുമായി പ്രവിശ്യാ സർക്കാർ. 2026 ഒക്ടോബർ 1 മുതൽ പ്രാബല്യത്തിൽ വരുന്ന പുതിയ നിയമപ്രകാരം, പ്രായത്തിന്റെ പേരിൽ ജീവനക്കാരുടെ മരുന്ന്, വിപുലമായ ആരോഗ്യപരിരക്ഷ (extended health benefits) എന്നിവ കമ്പനികൾക്ക് അവസാനിപ്പിക്കാനോ കുറയ്ക്കാനോ ഇനി കഴിയില്ല.
ഇതോടൊപ്പം, ഇതുവരെ പല ആരോഗ്യചെലവുകളും ആദ്യം വഹിച്ചിരുന്ന സർക്കാർ പദ്ധതികൾക്ക് പകരം, തൊഴിലുടമകളുടെ സ്വകാര്യ ഗ്രൂപ്പ് ഇൻഷുറൻസ് പദ്ധതികളായിരിക്കും ആദ്യം ചെലവ് വഹിക്കേണ്ടത്. സർക്കാർ പദ്ധതികൾ ഇനി “payer of last resort” എന്ന നിലയിൽ, സ്വകാര്യ ഇൻഷുറൻസ് പര്യാപ്തമല്ലാത്ത സാഹചര്യങ്ങളിൽ മാത്രമേ ശേഷിക്കുന്ന ചെലവുകൾ ഏറ്റെടുക്കൂ.
ഈ മാറ്റം മൂലം തൊഴിലുടമകളുടെ ആരോഗ്യബെനിഫിറ്റ് ചെലവ് വർധിക്കാനിടയുണ്ടെന്നാണ് ഇൻഷുറൻസ് മേഖലയിലെ വിലയിരുത്തൽ. ചില കണക്കുകൾ പ്രകാരം ആരോഗ്യ-മരുന്ന് ക്ലെയിമുകളിൽ 2 മുതൽ 5 ശതമാനം വരെ വർധനവുണ്ടാകാമെന്നാണ് വിലയിരുത്തുന്നത്.
