പഴയ നിയമങ്ങൾ, ചട്ടങ്ങൾ എന്നിവ കാലാനുസൃതമായി പരിഷ്കരിക്കും
* ഡിജിറ്റൽ, എഐ സഹായത്തോടെ സേവനങ്ങൾ, നടപടിക്രമങ്ങൾ എന്നിവ ലളിതവും സുതാര്യവുമാക്കും
* പദ്ധതി വികസനത്തിന്റെ പുരോഗതിയും സർക്കാരിന്റെ സ്വത്തുവിവരശേഖരണവും അറിയാൻ സമ്പൂർണ ഡിജിറ്റൽ പ്ലാറ്റുഫോമുകൾ
തിരുവനന്തപുരം: ഭരണ നടപടിക്രമങ്ങളെ കാലോചിതമായി പരിഷ്കരിക്കുന്നതിന്റെയും പൊതുജനസേവനങ്ങളെ കാര്യക്ഷമമാക്കുന്നതിന്റെയും ഭാഗമായി ഭരണസംവിധാനത്തെ ആധുനികവത്ക്കരിക്കാനൊരുങ്ങി സർക്കാർ. ഡിജിറ്റൽ സാങ്കേതികവിദ്യയുടെ സഹായത്തോടെ ഭരണനടപടികൾ ലളിതമാക്കുക, പദ്ധതി നിർവഹണം വേഗത്തിലാക്കുക, സർക്കാർ ആസ്തികളുടെ കാര്യക്ഷമമായ പരിപാലനം, പൊതുജനസേവനങ്ങളുടെ സമയബന്ധിതമായ പൂർത്തീകരണം എന്നിവ ലക്ഷ്യമിട്ടാണ് ഭരണപരിഷ്കാരങ്ങൾ നടപ്പിലാക്കുന്നത്. കാലഹരണപ്പെട്ട നടപടിക്രമങ്ങളും നിയമങ്ങളും പരിശോധിച്ച് ആവശ്യമായ മാറ്റങ്ങൾ വരുത്തുന്നതിനൊപ്പം, സാങ്കേതികവിദ്യയുടെ സഹായത്തോടെ സേവനങ്ങൾ വേഗത്തിലാക്കാനും വിവിധ വകുപ്പുകളുടെ പ്രവർത്തനങ്ങൾ ഏകോപിപ്പിക്കാനും ലക്ഷ്യമിടുന്നുണ്ട്. ഇതിന്റെ ഭാഗമായി ജൂലൈയിൽ മാത്രം നിരവധി പരിഷ്കാര നടപടികൾക്ക് ഉത്തരവായതായി സർക്കാർ അറിയിച്ചു.
*കോഡിനേഷൻ ആൻഡ് പ്രോഗ്രാം മാനേജ്മെന്റ് ഡിവിഷൻ (സിപിഎംഡി):* ബജറ്റ് പ്രഖ്യാപനങ്ങളും സർക്കാരിന്റെ മുൻഗണന പദ്ധതികളും സമയബന്ധിതമായി നടപ്പാക്കുന്നതിന് ചീഫ് സെക്രട്ടറി തലത്തിൽ കോഡിനേഷൻ ആൻഡ് പ്രോഗ്രാം മാനേജ്മെന്റ് ഡിവിഷൻ (സിപിഎംഡി) രൂപീകരിച്ചു. പദ്ധതികളുടെ പുരോഗതി വിലയിരുത്തുക, തടസങ്ങൾ നീക്കി വകുപ്പുകൾ തമ്മിലുള്ള ഏകോപനം സാധ്യമാക്കുക എന്നിവയാണ് സിപിഎംഡിയുടെ ചുമതല.
*ബിസിനസ് പോളിസി ആൻഡ് പ്രോസസ് റീഎഞ്ചിനീയറിംഗ് സെൽ (ബിപിപിആർ):* സർക്കാരിന്റെ ബിസിനസ് പോളിസി ഉൾപ്പെടുന്ന പബ്ലിക് സർവീസസ് ആക്ട് പ്രകാരമുള്ള ചട്ടങ്ങൾ, കാര്യനിർവഹണ നയങ്ങൾ, അഡ്മിനിസ്ട്രേറ്റീവ്- ധനകാര്യ മാനുവലുകൾ എന്നിവ കാലോചിതമായി പരിഷ്കരിക്കുന്നതിന്റെ ഭാഗമായി ബിസിനസ് പോളിസി ആൻഡ് പ്രോസസ് റീഎഞ്ചിനീയറിംഗ് സെൽ രൂപീകരിച്ചു. നിർമിത ബുദ്ധിയുടെ (എഐ) സഹായത്തോടെ നയങ്ങളും ചട്ടങ്ങളും പരിഷ്കരിക്കുകയാണ് ബിപിപിആർ സെല്ലിന്റെ ചുമതല. അനാവശ്യ നിയമ നൂലാമാലകളിൽനിന്നും പൊതുജനങ്ങളെ സംരക്ഷിക്കുകയാണ് ഇതിലൂടെ സർക്കാർ ലക്ഷ്യമിടുന്നത്.
ഒരേ സേവനത്തിന് ഒന്നിലധികം തവണ രേഖകൾ സമർപ്പിക്കുന്നതിനുള്ള ബുദ്ധിമുട്ടുകൾ ഒഴിവാക്കുന്നതിനായി സർക്കാർ ഓഫീസുകളിൽ ‘വൺസ് ഒൺലി (ഒരിക്കൽ മാത്രം)’ ഡാറ്റ ഷെയറിങ് സംവിധാനം നടപ്പാക്കും. ഡിജിലോക്കർ പോലുള്ള ആധുനിക ക്ലൗഡ് പ്ലാറ്റുഫോമുകൾ മുഖേനയാണ് ഈ സംവിധാനം നടപ്പാക്കുക.
*വിവര വിശകലനത്തിനും സേവന കാര്യക്ഷമതയ്ക്കും വേഗം, പ്ലാൻസ്പേസ് 20, സമ്പത്ത് ഓൺലൈൻ പോർട്ടലുകൾ:* ഭൂമിയേറ്റെടുക്കൽ, പദ്ധതി നിർവഹണം, ആസ്തി കൈകാര്യം എന്നിവയ്ക്ക് ഡിജിറ്റൽ പ്ലാറ്റുഫോമുകൾ ആരംഭിക്കാനും തീരുമാനമായിട്ടുണ്ട്. 18 മുതൽ 24 മാസം വരെ കാലതാമസമുണ്ടായിരുന്ന ഭൂമിയേറ്റെടുക്കൽ നടപടികളെ കൂടുതൽ കാര്യക്ഷമമാക്കി 3-4 മാസത്തിനുള്ളിൽ തീർപ്പാക്കാനുള്ള പുതിയ സംവിധാനമാണ് ‘വേഗം’ (VEGAM) പോർട്ടലിലൂടെ ഒരുക്കുന്നത്. സർക്കാർ പദ്ധതികൾക്ക് ആവശ്യമായ ഭൂമിയുടെ ഏറ്റെടുക്കൽ നടപടികൾ വേഗത്തിലാക്കാൻ സഹായിക്കുന്നതാണ് പദ്ധതി. പദ്ധതികളുടെ പുരോഗതി സമയാസമയങ്ങളിൽ ഉറപ്പാക്കുന്നതിന് ‘പ്ലാൻസ്പേസ് 20’ എന്നപേരിൽ പ്രൊജക്റ്റ് രജിസ്റ്റർ നടപ്പാക്കും. ആവർത്തിച്ചുള്ള പദ്ധതികൾ ഒഴിവാക്കാനും അനുവദിക്കുന്ന തുക കൃത്യമായി വിനിയോഗിക്കാനും സർക്കാരിനെ സഹായിക്കുന്നതാണ് പ്ലാൻസ്പേസ് 20. പൂർത്തീകരിച്ച പദ്ധതികളുടെ മുഴുവൻ വിവരങ്ങളും സംസ്ഥാന പൊതു ആസ്തി രജിസ്റ്ററിലേക്ക് കൈമാറ്റം ചെയ്യപ്പെടും. കേന്ദ്രത്തിന്റെ പിഎം ഗതി ശക്തി പദ്ധതിയുടെ മാതൃകയിലാണ് പ്ലാൻസ്പേസ് 20 സംസ്ഥാനത്ത് നടപ്പാക്കുക. സംസ്ഥാനത്തിന്റെ ഉടമസ്ഥതയിലുള്ള ഭൂമി, കെട്ടിടങ്ങൾ, യന്ത്രസാമഗ്രികൾ തുടങ്ങിയ ആസ്തികളുടെ വിവരങ്ങൾ ലഭ്യമാക്കുന്നതിനായി സമ്പത്ത് പോർട്ടൽ വികസിപ്പിക്കും. ഭൗമശാസ്ത്ര വിവരങ്ങളുടെ അടിസ്ഥാനത്തിലുള്ള ഏകീകൃത ഡിജിറ്റൽ രജിസ്റ്ററായിരിക്കും ഇതെന്നും സർക്കാർ അറിയിച്ചു.
Thanks & Regards
Athulya Raj K R
