മക്കിനി (ടെക്സാസ്) : ടെക്സാസിലെ മക്കിനി നാഷണൽ എയർപോർട്ടിൽ (McKinney National Airport) നിന്ന് ആദ്യമായി വാണിജ്യ വിമാനസർവീസുകൾ ആരംഭിക്കുന്നതായി അവേലോ എയർലൈൻസ് (Avelo Airlines) പ്രഖ്യാപിച്ചു. ഇതോടെ കോളിൻ കൗണ്ടിയുടെ ചരിത്രത്തിലെ ആദ്യ സ്ഥിരം കൊമേഴ്സ്യൽ വിമാനസർവീസിന് തുടക്കമാകും.
ആദ്യഘട്ടത്തിൽ അഞ്ച് നോൺസ്റ്റോപ്പ് ലക്ഷ്യസ്ഥാനങ്ങളിലേക്കാണ് സർവീസ് ആരംഭിക്കുന്നത്. നെവാഡയിലെ ലാസ് വെഗാസിനും (Las Vegas) ഫ്ലോറിഡയിലെ ഫോർട്ട് ലോഡർഡെയിൽ (Fort Lauderdale), ഫോർട്ട് മയേഴ്സ് (Fort Myers), ഓർലാൻഡോ (Orlando), ടാംപ (Tampa) എന്നീ നാല് നഗരങ്ങളിലേക്കുമാണ് നേരിട്ടുള്ള സർവീസുകൾ.
ചില റൂട്ടുകളിൽ ആഴ്ചയിൽ രണ്ട് സർവീസുകളും, കൂടുതൽ ആവശ്യക്കാർ പ്രതീക്ഷിക്കുന്ന റൂട്ടുകളിൽ ആഴ്ചയിൽ അഞ്ച് സർവീസുകളും ഉണ്ടായിരിക്കും. പുതിയ യാത്രാ ടെർമിനൽ പ്രവർത്തനം ആരംഭിക്കുന്നതോടൊപ്പം നവംബർ 11 മുതൽ സർവീസുകൾ ആരംഭിക്കുമെന്നാണ് കമ്പനി അറിയിച്ചിരിക്കുന്നത്.
184 സീറ്റുകളുള്ള ബോയിങ് 737-800 വിമാനങ്ങളാണ് സർവീസിനായി വിന്യസിക്കുന്നത്. പുതിയ സർവീസിലൂടെ നൂറിലധികം പ്രാദേശിക തൊഴിലവസരങ്ങൾ സൃഷ്ടിക്കപ്പെടുമെന്നും അധികൃതർ അറിയിച്ചു.
