കൊച്ചി: ഇന്ത്യയിലെ മുൻനിര ഹരിത ഊർജ്ജ കമ്പനിയും എസിഎംഇ (ACME) ഗ്രൂപ്പിന്റെ ഉപകമ്പനിയായ ‘എസിഎംഇ ഗ്രീൻ മോളിക്യൂൾസ് ബിസിനസ്’, പ്രമുഖ ജാപ്പനീസ് സ്ഥാപനമായ മിത്സുബിഷി ഗ്യാസ് കെമിക്കൽ കമ്പനിയുമായി ദീർഘകാല വിതരണ കരാറിൽ ഒപ്പുവെച്ചു. കരാർ പ്രകാരം എസിഎംഇ പ്രതിവർഷം ഒരു ലക്ഷം ടൺ ഗ്രീൻ മെഥനോൾ മിത്സുബിഷിക്ക് ലഭ്യമാക്കും. ഏകദേശം 1 ബില്യൺ യു.എസ് ഡോളർ മൂല്യമുള്ളതാണ് ഈ ദീർഘകാല കരാർ.
യൂറോപ്യൻ യൂണിയന്റെ കർശനമായ പരിസ്ഥിതി മാനദണ്ഡങ്ങൾ പാലിക്കുന്ന ‘ഗ്രീൻ മെഥനോൾ’ വിതരണത്തിനായി ഒരു ഇന്ത്യൻ കമ്പനി ഒപ്പുവെക്കുന്ന ആദ്യ കരാറാണിതെന്ന്
എസിഎംഇ അധികൃതർ അറിയിച്ചു. പരിസ്ഥിതി മലിനീകരണം കുറഞ്ഞ ഇത്തരം ഇന്ധനങ്ങളുടെ ഉത്പാദനത്തിലും വിതരണത്തിലും ഇന്ത്യ കൈവരിക്കുന്ന വലിയ നേട്ടമായും ഈ കരാറിനെ വിലയിരുത്തുന്നു. കപ്പലുകളിൽ സാധാരണ ഉപയോഗിക്കാറുള്ള ഹെവി ഫ്യുവൽ ഓയിൽ (HFO), മറൈൻ ഗ്യാസ് ഓയിൽ (MGO) തുടങ്ങിയ പരമ്പരാഗത ഇന്ധനങ്ങൾക്ക് പകരമായി കൂടുതൽ സ്വീകാര്യത നേടിക്കൊണ്ടിരിക്കുന്ന ഹരിത ഇന്ധനമാണ് ഗ്രീൻ മെഥനോൾ.
ആഗോളതലത്തിൽ ഗ്രീൻ മെഥനോൾ ബിസിനസ് വ്യാപിപ്പിക്കാനുള്ള എസിഎംഇ ഗ്രൂപ്പിന്റെ ശ്രമങ്ങളിലെ സുപ്രധാന നാഴികക്കല്ലാണ് ഈ കരാറെന്ന് എസിഎംഇ ഗ്രീൻ മോളിക്യൂൾസ് ബിസിനസ് സിഇഒ അനിൽ തപാരിയ പറഞ്ഞു. ഈ രംഗത്തെ പ്രമുഖരായ മിത്സുബിഷി ഗ്യാസ് കെമിക്കലുമായി കൈകോർക്കുന്നതിലൂടെ കപ്പൽ, വ്യോമയാന മേഖലകളിൽ ഹരിത ഇന്ധനങ്ങളുടെ ഉത്പാദനവും ഉപയോഗവും വർധിപ്പിക്കാൻ സാധിക്കുമെന്നും അദ്ദേഹം വ്യക്തമാക്കി. ആഗോള ഹരിത ഊർജ്ജ വിപണിയുടെ വളർച്ചയ്ക്ക് എസിഎംഇയുമായുള്ള സഹകരണം വലിയ കരുത്താകുമെന്ന് മിത്സുബിഷി ഗ്യാസ് കെമിക്കൽ ഗ്രീൻ എനർജി & കെമിക്കൽസ് ബിസിനസ് സെക്ടർ മാനേജിങ് എക്സിക്യൂട്ടീവ് ഓഫീസർ ഹിഡേയാക്കി അകാസെ പറഞ്ഞു.
Athulya K R
