ഇസാഫ് ബാലജ്യോതി ക്ലബ്ബിന്റെ ‘കാവൽ- തൂഫാൻ’ സംസ്ഥാനതല ലഹരിവിരുദ്ധ ക്യാംപെയിന് തുടക്കമായി.
തൃശൂർ: നാടിനെ കാർന്നുതിന്നുന്ന ലഹരിയുടെ വിപത്തിനെ പ്രതിരോധിക്കാനുള്ള ആദ്യപാഠങ്ങൾ സ്കൂളുകളിൽനിന്നും ആരംഭിക്കണമെന്ന് ജില്ലാ പോലീസ് മേധാവി നകുൽ രാജേന്ദ്ര ദേശ്മുഖ്. ലഹരി മാഫിയകളുടെ പിടിയിൽനിന്നും വിദ്യാർത്ഥികളെ മോചിപ്പിക്കുകയെന്ന ലക്ഷ്യവുമായി ഇസാഫ് ബാലജ്യോതി ആരംഭിച്ച ‘കാവൽ- തൂഫാൻ’ ലഹരിവിരുദ്ധ ക്യാംപെയിന്റെ സംസ്ഥാനതല ഉദ്ഘാടനം സെന്റ് മേരീസ് ലൂർദ് യു പി സ്കൂളിൽ നിർവഹിക്കുകയായിരുന്നു അദ്ദേഹം. നമ്മുടെ കുട്ടികളുടെ മേൽ ഒരു കരിനിഴൽപോലെ ലഹരിയുടെ ഭീഷണി ഉയരുന്നുണ്ട്. ഇതിനെ തിരിച്ചറിഞ്ഞ് കൂട്ടായ പ്രതിരോധം തീർക്കണം. ലഹരി മാഫിയകളുടെ നീക്കത്തെ ഒരു കൊടുങ്കാറ്റുപോലെ തടയണമെന്നും അതിനായി സമൂഹത്തിന്റെയാകെ സഹകരണം ആവശ്യമാണെന്നും അദ്ദേഹം പറഞ്ഞു. ലഹരിവിരുദ്ധ സന്ദേശം ഉയർത്തിപ്പിടിച്ച് സ്കൂളുകളിലൂടെ സഞ്ചരിക്കുന്ന പ്രചാരണ വാഹനത്തിന്റെ ഫ്ലാഗ്ഓഫും അദ്ദേഹം നിർവഹിച്ചു. സ്കൂൾ മാനേജർ ഫാ. ജോസ് വള്ളൂരാൻ അധ്യക്ഷത വഹിച്ച ചടങ്ങിൽ ഇസാഫ് ബാങ്ക് എംഡിയും സിഇഒയുമായ ഡോ. കെ പോൾ തോമസ്, ഇസാഫ് ഫൗണ്ടേഷൻ എക്സിക്യുട്ടീവ് ഡയറക്ടർ മെറീന പോൾ എന്നിവർ മുഖ്യാതിഥികളായി. ജനതയുടെ സ്വപ്നങ്ങളെ ഇല്ലാതാക്കാൻ കെൽപ്പുള്ള മാരക വിഷമാണ് ലഹരിയെന്നും ഇതിനെതിരെയുള്ള ബോധവൽക്കരണം ചെറിയ ക്ലാസ്സുകളിൽനിന്ന് ആരംഭിക്കണമെന്നും ഡോ. കെ പോൾ തോമസ് പറഞ്ഞു.
‘കാവൽ- തൂഫാൻ’ ക്യാംപെയിന്റെ ആദ്യഘട്ടമായി തൃശൂർ, പാലക്കാട്, മലപ്പുറം, കോഴിക്കോട്, വയനാട്, ഇടുക്കി ജില്ലകളിലെ 26 സ്കൂളുകളിൽ പ്രത്യേക പ്രചാരണ വാഹനം പര്യടനം നടത്തും. ജില്ലാ നാർക്കോട്ടിക്സ് സെൽ, എൻഎസ്എസ് യൂണിറ്റ് എന്നിവരുടെ സഹകരണത്തോടെ സ്കൂളുകളിൽ ലഹരിവിരുദ്ധ ബോധവൽക്കരണ പരിപാടികൾ സംഘടിപ്പിക്കും. സംസ്ഥാനതലത്തിൽ ഇസാഫ് ബാലജ്യോതി ക്ലബ്ബിന്റെ മേൽനോട്ടത്തിൽ പരിപാടികൾ നടത്തും. സർക്കാർ നടപ്പാക്കുന്ന ഓപ്പറേഷൻ തൂഫാൻ പദ്ധതിയുമായി സഹകരിച്ചാണ് ക്യാംപെയിൻ സംഘടിപ്പിക്കുന്നത്. ചടങ്ങിൽ തൃശൂർ സിറ്റി നാർക്കോട്ടിക്സ് സെൽ വിഭാഗം എസിപി ഷിബു പി, ഇസാഫ് ഫൗണ്ടേഷൻ അസിസ്റ്റന്റ് ഡയറക്ടർ വിൻ വിൽസൺ പി, സെന്റ് മേരീസ് കോളേജ് അസിസ്റ്റന്റ് പ്രൊഫസർ ആഗ്ന ടെന്നി, ഇസാഫ് ബാങ്ക് സസ്റ്റൈനബിൾ ബാങ്കിങ് ഹെഡ് സന്ധ്യ സുരേഷ്, പിആർഒ വർഗീസ് കോശി, ഇസാഫ് ഫൗണ്ടേഷൻ പ്രോഗ്രാംസ് മാനേജർ ജോർജ് എം പി, സെന്റ് മേരീസ് ലൂർദ് യു പി സ്കൂൾ ഹെഡ്മാസ്റ്റർ ബെന്നി കെ എ, ലൂർദ് മെട്രോപൊളിറ്റൻ കത്തീഡ്രൽ ട്രസ്റ്റി റോഷൻ ഡേവിസ് പുതുക്കാടൻ എന്നിവർ സംസാരിച്ചു.
Photo Caption; ഇസാഫ് ബാലജ്യോതി ക്ലബ്ബിന്റെ ‘കാവൽ- തൂഫാൻ’ സംസ്ഥാനതല ലഹരിവിരുദ്ധ ക്യാംപെയ്ൻ ഉദ്ഘാടനത്തിനുശേഷം ജില്ലാ പോലീസ് മേധാവി നകുൽ രാജേന്ദ്ര ദേശ്മുഖ്, ഇസാഫ് ബാങ്ക് എംഡിയും സിഇഒയുമായ ഡോ. കെ പോൾ തോമസ്, ഇസാഫ് ഫൗണ്ടേഷൻ എക്സിക്യുട്ടീവ് ഡയറക്ടർ മെറീന പോൾ എന്നിവർ കുട്ടികളോടൊപ്പം.
Ajith V Raveendran
Senior Account Executive | PR
