ലണ്ടൻ : മക്കളെ സന്ദർശിക്കാനും കുറച്ചുകാലം അവരോടൊപ്പം കഴിയാനുമായി യുകെയിലെത്തിയ ചാലക്കുടി സ്വദേശി കെ.വി. ആന്റണി (76) അസുഖബാധിതനായി മരണപ്പെട്ടു. വടക്കേ ചാലക്കുടി കൈതാരത്ത് വീട്ടിൽ കെ.വി. ആന്റണിയാണ് യുകെയിലെ ഡെവൺ ടോർബെ ആശുപത്രിയിൽ അന്തരിച്ചത്.
ശരീരവേദനയും അസ്വസ്ഥതയും അനുഭവപ്പെട്ടതിനെ തുടർന്ന് ജൂലൈ 25-ന് അദ്ദേഹത്തെ ആശുപത്രിയിൽ പ്രവേശിപ്പിച്ചു. നടത്തിയ പരിശോധനയിൽ ഗുരുതരമായ ബാക്ടീരിയൽ അണുബാധ, ന്യൂമോണിയ, സെപ്സിസ് (Sepsis) എന്നിവ സ്ഥിരീകരിച്ചു. വിദഗ്ധ ചികിത്സയും മരുന്നുകളും നൽകിയെങ്കിലും ആരോഗ്യനില അതിവേഗം വഷളാവുകയും തുടർന്ന് അവയവങ്ങൾ പ്രവർത്തനരഹിതമാകുകയും ചെയ്തതായി കുടുംബം അറിയിച്ചു.
മരണസമയത്ത് ഭാര്യയും മക്കളും ഉൾപ്പെടെയുള്ള കുടുംബാംഗങ്ങൾ അദ്ദേഹത്തിനൊപ്പമുണ്ടായിരുന്നു.
ഭാര്യ: എൽസി ആന്റണി (ഞാറളേലി പറക്ക). മക്കൾ: സിന്റോ, ബ്രിന്റോ, റിന്റോ (യുകെ). മരുമക്കൾ: റെറ്റി, ട്രീസ, പ്രീതി.
മൃതദേഹം നിയമനടപടികൾ പൂർത്തിയാക്കിയ ശേഷം നാട്ടിലെത്തിക്കും. സംസ്കാരം വടക്കേ ചാലക്കുടി സെന്റ് ജോസഫ്സ് പള്ളി സെമിത്തേരിയിൽ നടക്കും. സംസ്കാരത്തിന്റെ തീയതിയും സമയവും പിന്നീട് അറിയിക്കുമെന്ന് കുടുംബാംഗങ്ങൾ അറിയിച്ചു.
