ടൊറന്റോ : കാനഡയിലെ ഒന്റാറിയോ പ്രവിശ്യയിലെ വോൺ (Vaughan) നഗരത്തിലുള്ള ഒരു അമ്യൂസ്മെന്റ് പാർക്കിൽ യുവതിക്കെതിരെ ലൈംഗികാതിക്രമം നടത്തിയെന്ന കേസിൽ ഇന്ത്യൻ വംശജനായ 19-കാരനെ യോർക്ക് റീജിയണൽ പൊലീസ് അറസ്റ്റ് ചെയ്തു. പ്രതിക്കെതിരെ ലൈംഗികാതിക്രമം (Sexual Assault), ലൈംഗിക ഇടപെടൽ (Sexual Interference) എന്നീ കുറ്റങ്ങളാണ് ചുമത്തിയിരിക്കുന്നത്.
ബ്രാംപ്ടൺ സ്വദേശിയായ ജുഗാഡ് ധാമി (Jugaad Dhami) എന്ന യുവാവാണ് അറസ്റ്റിലായത്. മേയ് 25-ന് സുഹൃത്തുക്കൾക്കൊപ്പം പാർക്കിലെത്തിയ യുവതി ഒരു റൈഡിൽ കയറുന്നതിനിടെ സുരക്ഷാ പരിശോധനയുടെ ഭാഗമായി പ്രതി നടത്തിയ പ്രവർത്തനത്തിനിടെയാണ് ലൈംഗികാതിക്രമം നടന്നതെന്നാണ് അന്വേഷണ സംഘത്തിന്റെ കണ്ടെത്തൽ.
സംഭവത്തിൽ കൂടുതൽ ഇരകൾ ഉണ്ടായിരിക്കാമെന്ന സംശയത്തെ തുടർന്ന് പ്രതിയുടെ ചിത്രം യോർക്ക് റീജിയണൽ പൊലീസ് പൊതുജനങ്ങൾക്കായി പുറത്തുവിട്ടിട്ടുണ്ട്. സമാനമായ അനുഭവം ഉണ്ടായവർ മടിക്കാതെ പോലീസിനെ സമീപിക്കണമെന്നും, ലൈംഗിക കുറ്റകൃത്യങ്ങൾക്ക് കാലപരിധിയില്ലാത്തതിനാൽ വർഷങ്ങൾ കഴിഞ്ഞാലും പരാതി നൽകാൻ കഴിയുമെന്നും അധികൃതർ അറിയിച്ചു
