പരമ്പരാഗത ഐ ടി സേവനങ്ങൾക്കപ്പുറം ഭാവി സാങ്കേതികതകളിലേക്ക് കേരളത്തിന്റെ ഐ ടി മേഖലയെ നയിക്കുക എന്ന ലക്ഷ്യത്തോടെ ടെക് കേരളം എന്ന ബ്രാൻഡ് അവതരിപ്പിക്കുകയാണെന്ന് വിവരസാങ്കേതികവിദ്യ, നിർമിത ബുദ്ധി, ഭാവി സാങ്കേതികവിദ്യ വകുപ്പ് മന്ത്രി പി കെ കുഞ്ഞാലിക്കുട്ടി. സംസ്ഥാനത്തെ ടെക്നോളജി മേഖലയെ ഏകോപിപ്പിക്കുന്ന ‘ടെക് കേരളം’ ബ്രാൻഡും ഐ ടി പാർക്ക് അഫിലിയേഷൻ പദ്ധതിയും ടെക് കേരളം പോർട്ടലും ടെക്നോപാർക്ക് ട്രാവൻകൂർ ഹാളിൽ നടന്ന ചടങ്ങിൽ മന്ത്രി ഉദ്ഘാടനം ചെയ്തു.
സെമികോൺ കേരളം കൺസോർഷ്യം, മേക്കർ ഹബ് എന്നിവയും ചടങ്ങിൽ പ്രഖ്യാപിച്ചു. ടെക്നോപാർക് ഫേസ് ത്രീ ക്യാമ്പസ്സിൽ രണ്ട് ലക്ഷം ചതുരശ്ര അടി വിസ്തീർണമുള്ള പ്രീ ഫാബ്രിക്കേറ്റഡ് കെട്ടിടത്തിന്റെ നിർമാണോദ്ഘാടനവും മന്ത്രി നിർവഹിച്ചു. ടെക്നോപാർക് ഫേസ് വണ്ണിൽ തുടങ്ങുന്ന പദ്ധതിക്കായി ടെക്നോപാർക്കും കാസ്പിയൻ ടെക് പാർക്ക്‌സും തമ്മിൽ ധാരണാപത്രം കൈമാറി.
പരമ്പരാഗതമായി സർക്കാരിൻറെ കീഴിലുള്ള ഐ ടി പാർക്കുകളെ മാത്രം കേന്ദ്രീകരിച്ച് നിലകൊണ്ട ഐ ടി മേഖലയെ വിപുലീകരിക്കുക എന്ന ലക്ഷ്യത്തോടെയാണ് ഐ ടി പാർക്‌സ് അഫീലിയേഷൻ പദ്ധതി ആരംഭിക്കുന്നത്. സ്വകാര്യ കമ്പനികൾക്കും കോ വർക്കിങ് സ്‌പേസുകൾക്കും സ്വകാര്യ ടെക്ക് പാർക്കുകൾക്കും സർക്കാർ ഐ ടി പാർക്കുകളുടെ അഫീലിയേഷൻ നേടിയെടുക്കാൻ സാധിക്കും. ബ്രാൻഡിങ്, മാർക്കറ്റിങ്, മെൻറർഷിപ്പ്, നെറ്റ്‌വർക്കിങ് എന്നിവയിലെല്ലാം സർക്കാരിന്റെ പിന്തുണയും ഐ ടി തൊഴിൽ മേളകളിൽ പങ്കെടുക്കാനുള്ള അവസരവും ഇതിലൂടെ കൈവരുന്നു.
