ഹൂസ്റ്റണ്‍ : പന്ത്രണ്ടിനും പതിനാലിനും ഇടയില്‍ പ്രായമുള്ള മകള്‍ക്കൊപ്പം കിടന്നുറങ്ങിയിരുന്ന മാതാവിനെ നിരവധി തവണ വെടിവച്ചു കൊലപ്പെടുത്തിയ യുവതി അറസ്റ്റില്‍ .
ഹൂസ്റ്റണ്‍ ഹാരിസ് കൗണ്ടിയില്‍ ഫെബ്രു. 5 ശനിയാഴ്ചയായിരുന്നു സംഭവം .
ജാര്‍മീസ് സ്ട്രീറ്റിലെ അപ്പാര്‍ട്ട്‌മെന്റ് കോംപ്ലക്‌സില്‍ ശനിയാഴ്ച രാവിലെ എത്തിയ ബ്രിട്ടണി ബ്രൗണ്‍ (33) എന്ന യുവതിയാണ് കിടക്കയില്‍ കിടന്നിരുന്ന എറിക്ക ഹാളിന് നേരെ വെടിയുതിര്‍ത്തത് .
സംഭവം അറിഞ്ഞു സ്ഥലത്ത് എത്തിയ പോലീസ് വെടിയേറ്റ് മരിച്ചു കിടന്നിരുന്ന മാതാവിനോടൊപ്പം പെണ്‍കുട്ടി ഉറക്കം നടിച്ച് കിടന്നിരുന്നതായാണ് കണ്ടത് . മാതാവിന് നിരവധി തവണ വെടിയേറ്റിട്ടും കുട്ടിക്ക് ഒന്നും സംഭവിച്ചില്ല എന്നത് അദ്ഭുതമാണെന്ന് പോലീസ് പറഞ്ഞു . മാതാവിന്റെ കൂടുതല്‍ വിവരങ്ങള്‍ പോലീസ് വെളിപ്പെടുത്തിയിട്ടില്ല .
വെടിവച്ച പ്രതിയെന്ന് സംശയിക്കുന്ന ബ്രിട്ടണി മയക്കു മരുന്ന് കൈവശം വെക്കല്‍ , ക്രെഡിറ്റ് കാര്‍ഡ് തട്ടിപ്പ് തുടങ്ങിയ നിരവധി കേസ്സുകളില്‍ പ്രതിയാണ് .
ഇവര്‍ക്കെതിരെ കൊലപാതക കുറ്റം ചാര്‍ജ് ചെയ്തു ഹാരിസ് കൗണ്ടി ജയിലിലടച്ചു . 200000 ഡോളര്‍ ജാമ്യത്തുക നിശ്ചയിച്ചിട്ടുണ്ട് .
ബ്രിട്ടണിയെ നാളെ ഫെബ്രു. 8 ചൊവ്വാഴ്ച കോടതിയില്‍ ഹാജരാക്കുമെന്ന് പോലീസ് പറഞ്ഞു .
