മിൽട്ടൺ : യുകെയിലെ മിൽട്ടൺ കീൻസ് നഗരത്തിൽ പ്രമുഖ മലയാളി ഡോക്ടറായ അച്ചാമ്മ ജോൺ കൊല്ലപ്പെട്ട സംഭവത്തിൽ ഭർത്താവിനെ ബ്രിട്ടീഷ് പോലീസ് കസ്റ്റഡിയിലെടുത്തു. തിരുവനന്തപുരം മെഡിക്കൽ കോളേജിലെ മുൻ വിദ്യാർത്ഥിനിയായിരുന്ന അച്ചാമ്മ ജോൺ യുകെയിൽ പ്രശസ്ത Histopathologist ആയി പ്രവർത്തിച്ചു വരികയായിരുന്നു. സ്കിൻ കാൻസർ രംഗത്തെ വിദഗ്ധയായി അവർ അറിയപ്പെട്ടിരുന്നു.
ഞായറാഴ്ച വൈകുന്നേരം മിൽട്ടൺ കീൻസിലെ Woolverton പ്രദേശത്തെ East Moore Drive ലുള്ള ദമ്പതികളുടെ വസതിയിൽ നിന്നാണ് അടിയന്തര സഹായത്തിനായുള്ള സന്ദേശം പോലീസിന് ലഭിച്ചത്. സ്ഥലത്തെത്തിയ ഉദ്യോഗസ്ഥർ അച്ചാമ്മ ജോണിനെ മരിച്ച നിലയിൽ കണ്ടെത്തി. സംഭവസ്ഥലത്തുണ്ടായിരുന്ന 58 കാരനായ ഭർത്താവിനെ തുടർന്ന് അറസ്റ്റ് ചെയ്യുകയായിരുന്നു.
എൻഎച്ച്എസിൽ (NHS) ഏറെ പ്രിയങ്കരിയായ ഡോക്ടറായിരുന്നു അച്ചാമ്മ ജോൺ. ഔദ്യോഗിക ജീവിതത്തിൽ വലിയ നേട്ടങ്ങൾ കൈവരിച്ചിരുന്നെങ്കിലും കുടുംബജീവിതത്തിൽ ദമ്പതികൾക്കിടയിൽ അസ്വാരസ്യങ്ങൾ നിലനിന്നിരുന്നുവെന്നാണ് റിപ്പോർട്ടുകൾ. ഞായറാഴ്ച വൈകുന്നേരം ഉണ്ടായ കടുത്ത തർക്കമാണ് കൊലപാതകത്തിലേക്ക് നയിച്ചതെന്നാണു പ്രാഥമിക നിഗമനം.
മിൽട്ടൺ കീൻസിലെ പ്രാദേശിക ദേവാലയ പ്രവർത്തനങ്ങളിൽ സജീവമായിരുന്ന ദമ്പതികൾ പൊതുവേ മലയാളി സമൂഹത്തിൽ നിന്ന് അകന്ന് ജീവിച്ചിരുന്നതായും വിവരമുണ്ട്. പ്രതിയെ വിശദമായി ചോദ്യം ചെയ്തുവരികയാണെന്നും അച്ചാമ്മ ജോണിന്റെ പോസ്റ്റ്മോർട്ടവും ഇൻക്വസ്റ്റ് നടപടികളും പുരോഗമിക്കുകയാണെന്നും ബ്രിട്ടീഷ് പോലീസ് അറിയിച്ചു.
