വാഷിംഗ്ടൺ : യുഎസിൽ കൃത്യമായ രേഖകളില്ലാതെ അനധികൃതമായി താമസിച്ച് ട്രക്ക് ഓടിച്ചിരുന്ന 30 ഇന്ത്യൻ പൗരന്മാർ യുഎസ് ബോർഡർ പട്രോൾ വിഭാഗത്തിന്റെ പിടിയിലായി. അരിസോണയിലെ യുമാ സെക്ടറിൽ മെയ് 11 മുതൽ 15 വരെ യുഎസ് കസ്റ്റംസ് ആൻഡ് ബോർഡർ പ്രൊട്ടക്ഷൻ നടത്തിയ “ഓപ്പറേഷൻ ചെക്ക് മേറ്റ്’ എന്ന പ്രത്യേക പരിശോധനയിലാണ് ഇവർ അറസ്റ്റിലായത്. പിടിയിലായ ഇന്ത്യക്കാരെ ഉടൻ തന്നെ നാട്ടിലേക്ക് നാടുകടത്തുമെന്ന് യുഎസ് ഇമിഗ്രേഷൻ അധികൃതർ അറിയിച്ചു.
വലിയ കൊമേഴ്സ്യൽ ട്രക്കുകൾ കേന്ദ്രീകരിച്ച് നടത്തിയ പരിശോധനയിൽ ആകെ 52 പേരാണ് അറസ്റ്റിലായത്. ഇതിൽ ട്രക്ക് ഡ്രൈവർമാരായ 36 പേരിൽ 30 പേരും ഇന്ത്യൻ പൗരന്മാരാണെന്ന് അധികൃതർ സ്ഥിരീകരിച്ചു. മെക്സിക്കോ, എൽ സാൽവദോർ, റഷ്യ എന്നീ രാജ്യങ്ങളിൽ നിന്നുള്ളവരാണ് പിടിയിലായ മറ്റുള്ളവർ.
അറസ്റ്റിലായ ഭൂരിഭാഗം ഇന്ത്യക്കാരുടെയും പക്കൽ മുൻപ് ലഭിച്ച തൊഴിൽ അനുമതി രേഖകൾ ഉണ്ടായിരുന്നുവെങ്കിലും അവയുടെ കാലാവധി കഴിഞ്ഞിരുന്നു. കാലിഫോർണിയ, ന്യൂയോർക്ക്, വാഷിംഗ്ടൺ തുടങ്ങിയ വിവിധ യുഎസ് സംസ്ഥാനങ്ങളിൽ നിന്ന് നിയമവിരുദ്ധമായി സംഘടിപ്പിച്ച കൊമേഴ്സ്യൽ ഡ്രൈവിംഗ് ലൈസൻസുകൾ ഉപയോഗിച്ചാണ് ഇവർ ട്രക്കുകൾ ഓടിച്ചിരുന്നത്. പരിശോധനയിൽ ചിലരുടെ പക്കൽ യാതൊരുവിധ രേഖകളും കണ്ടെത്താനായില്ല.
പൊതുസുരക്ഷ മുൻനിർത്തി അനധികൃത ഡ്രൈവർമാരെ റോഡുകളിൽ നിന്ന് ഒഴിവാക്കുന്നതിന്റെ ഭാഗമായാണ് യുഎസ് കർശന നടപടി സ്വീകരിച്ചത്. ഫെഡറൽ ഇമിഗ്രേഷൻ നിയമപ്രകാരം അറസ്റ്റിലായ ഡ്രൈവർമാർക്കെതിരെയുള്ള നിയമനടപടികൾ പൂർത്തിയായി വരികയാണെന്നും ഇവരെ ഉടൻ ഇന്ത്യയിലേക്ക് തിരിച്ചയക്കുമെന്നും യുഎസ് അധികൃതർ വ്യക്തമാക്കി.
