അത്യാധുനിക പരിശോധനകൾ ലഭ്യമാക്കുന്ന ‘സ്പെഷ്യാലിറ്റി ഹിന്ദ്ലാബ്സ്’ കേന്ദ്രങ്ങൾക്കും ‘എച്ച്എൽഎൽ ഹോം ഹെൽത്ത് കെയർ’ സേവനങ്ങൾക്കും തുടക്കമായി
*തിരുവനന്തപുരം*: താങ്ങാനാവുന്ന വിലയിൽ ഉയർന്ന ഗുണമേന്മയുള്ള മരുന്നുകളും മെഡിക്കൽ ഉപകരണങ്ങളും ലഭ്യമാക്കി ജനശ്രദ്ധനേടിയ ‘അമൃത്’ ഫാർമസി ശൃംഖലയുടെ വിപുലീകരിച്ച പുതിയ പതിപ്പായ ‘അമൃത് പ്ലസ്’ ഫാർമസി ശൃംഖലയ്ക്ക് തുടക്കമിട്ട് കേന്ദ്ര ആരോഗ്യ-കുടുംബക്ഷേമ മന്ത്രാലയത്തിന് കീഴിലുള്ള മിനിരത്ന പൊതുമേഖലാ സ്ഥാപനമായ എച്ച്എൽഎൽ ലൈഫ്കെയർ ലിമിറ്റഡ് (എച്ച്എൽഎൽ). വിവിധയിനം മരുന്നുകൾ, മെഡിക്കൽ ഉപകരണങ്ങൾ, സപ്ലിമെന്റുകൾ, ലൈഫ് സ്റ്റൈൽ – വെൽനസ് ഉൽപ്പന്നങ്ങൾ എന്നിവയുടെ സമഗ്രമായ ശേഖരമാണ് ‘അമൃത് പ്ലസ്’ ഫാർമസികളിൽ ഒരുക്കിയിരിക്കുന്നത്.
ഗോവയിൽ നടന്ന ചടങ്ങിൽ എച്ച്എൽഎൽ ചെയർപേഴ്സണും മാനേജിംഗ് ഡയറക്ടറുമായ ഡോ. അനിത തമ്പി പുതിയ ഫാർമസി ശൃംഖലയുടെ ഉദ്ഘാടനം നിർവഹിച്ചു. ജനപ്രീതിയും വിശ്വാസ്യതയുമുള്ള എച്ച്എൽഎല്ലിന്റെ ‘അമൃത്’ ഫാർമസികളുടെ അടിസ്ഥാന ലക്ഷ്യങ്ങളായ താങ്ങാനാവുന്ന വില, ഉയർന്ന ഗുണമേന്മ എന്നീ മൂല്യങ്ങൾ ഉറപ്പുനൽകുന്നതിനൊപ്പം, മെഡിക്കൽ റീട്ടെയിൽ രംഗത്ത് ഉപഭോക്താക്കൾക്ക് കൂടുതൽ മികച്ച സേവനങ്ങളും അത്യാധുനിക സൗകര്യങ്ങളുമാണ് ‘അമൃത് പ്ലസ്’ വാഗ്ദാനം ചെയ്യുന്നത്.
അത്യാധുനിക സൗകര്യങ്ങളുള്ള ‘സ്പെഷ്യാലിറ്റി ഹിന്ദ്ലാബ്സ്’ ഡയഗ്നോസ്റ്റിക് സെന്ററുകളുടെയും വീട്ടിൽ ചികിത്സ ഉറപ്പാക്കുന്ന ‘എച്ച്എൽഎൽ ഹോം ഹെൽത്ത് കെയർ സർവീസസ്’ സേവനങ്ങളുടെയും ഉദ്ഘാടനം ഡോ. അനിത തമ്പി
നിർവഹിച്ചു. ജീനോമിക്സ്, നെക്സ്റ്റ് ജനറേഷൻ സീക്വൻസിങ്, മോളിക്യുലാർ ഡയഗ്നോസ്റ്റിക്സ് തുടങ്ങിയ അത്യാധുനികവും സങ്കീർണ്ണവുമായ പരിശോധനാ സൗകര്യങ്ങളാണ് സ്പെഷ്യാലിറ്റി ഹിന്ദ്ലാബ്സിലൂടെ ലഭ്യമാക്കുക.
ആശുപത്രികളിൽ നേരിട്ടെത്താൻ ബുദ്ധിമുട്ടുന്നവർക്ക് ഹോം ഹെൽത്ത് കെയർ പദ്ധതിയിലൂടെ വിദഗ്ദ്ധരായ നഴ്സുമാരുടെ സേവനം, ശസ്ത്രക്രിയ കഴിഞ്ഞവർക്കുള്ള പരിചരണം, ഫിസിയോതെറാപ്പിയും പുനരധിവാസവും, വയോജന പരിപാലനം എന്നിവ വീടുകളിൽ ലഭിക്കും. വിട്ടുമാറാത്ത രോഗങ്ങളാൽ ബുദ്ധിമുട്ടുന്നവർക്കുള്ള പ്രത്യേക ശുശ്രൂഷകൾ, പരിശോധനകൾ, ടെലി കൺസൾട്ടേഷൻ സംവിധാവും ഇതിന്റെ ഭാഗമാണ്.
നവി മുംബൈ ഖാർഘറിലെ ഹിന്ദ്ലാബ്സ് റഫറൻസ് ലബോറട്ടറിക്ക്, ആഗോളതലത്തിൽ ലബോറട്ടറി മെഡിസിൻ രംഗത്തെ ഏറ്റവും ഉന്നത ബഹുമതിയായ ‘ക്യാപ് അക്രെഡിറ്റേഷൻ’ ലഭിച്ചതായി എച്ച്എൽഎൽ അധികൃതർ അറിയിച്ചു. ഒഡീഷ സർക്കാരുമായി സഹകരിച്ച് പാനികോയ്ലിയിൽ ട്രോമ കെയർ സെന്റർ സ്ഥാപിക്കുമെന്നും ചടങ്ങിൽ പ്രഖ്യാപിച്ചു. എല്ലാവിധ ആധുനിക സംവിധാനങ്ങളുമുള്ള സമഗ്രമായ ട്രോമ കെയർ കേന്ദ്രമായി ഇതിനെ ഘട്ടംഘട്ടമായി വികസിപ്പിക്കാനാണ് കമ്പനി ലക്ഷ്യമിടുന്നത്.
എച്ച്എൽഎൽ ഡയറക്ടർമാരായ അജിത് എൻ. (മാർക്കറ്റിംഗ്), പി. രമേഷ് (ഫിനാൻസ്), ബെന്നി ജോസഫ് (ടെക്നിക്കൽ ആൻഡ് ഓപ്പറേഷൻസ്) എന്നിവരും ചടങ്ങിൽ പങ്കെടുത്തു.
Photo caption: ‘അമൃത് പ്ലസ്’ ഫാർമസി ശൃംഖലയുടെ ഉദ്ഘാടനം എച്ച്എൽഎൽ ചെയർപേഴ്സണും മാനേജിംഗ് ഡയറക്ടറുമായ ഡോ. അനിത തമ്പി നിർവഹിക്കുന്നു. എച്ച്എൽഎൽ ഡയറക്ടർമാരായ അജിത് എൻ. (മാർക്കറ്റിംഗ്), പി. രമേഷ് (ഫിനാൻസ്), ബെന്നി ജോസഫ് (ടെക്നിക്കൽ ആൻഡ് ഓപ്പറേഷൻസ്) എന്നിവർ സമീപം.
Vishnuprasad K P
