ടി.വി.ഇബ്രാഹിം എം.എല്.എ ഉന്നയിച്ച ശ്രദ്ധക്ഷണിക്കലിന് മുഖ്യമന്ത്രി നല്കിയ മറുപടി (23/06/2026).
അടിസ്ഥാന സൗകര്യ വികസനത്തിലും വിഭവങ്ങളുടെ വിതരണത്തിലും സന്തുലിതാവസ്ഥ ഉറപ്പാക്കി എല്ലാവര്ക്കും സര്ക്കാര് സേവനങ്ങളും വികസന ഫലങ്ങളും തുല്യമായി ലഭ്യമാക്കി സാമൂഹ്യനീതിയോട് കൂടിയ സാമ്പത്തിക വളര്ച്ച ഉറപ്പാക്കുന്ന വികസന കാഴ്ചപ്പാടാണ് സര്ക്കാര് മുന്നോട്ട് വയ്ക്കുന്നത്. ഈ കാര്യത്തില് വിദ്യാഭ്യാസം, ആരോഗ്യം, ഗതാഗതം തുടങ്ങിയ സമസ്ത മേഖലകളിലും ജനസംഖ്യ, പിന്നാക്കാവസ്ഥ, ഭൂമിശാസ്ത്രപരമായ പ്രത്യേകതകള്, അടിസ്ഥാന സൗകര്യങ്ങളുടെ അഭാവം തുടങ്ങിയവ സമഗ്രമായി പരിഗണിച്ചുകൊണ്ടുള്ള നയസമീപനം സ്വീകരിക്കും
വിഭവങ്ങളുടെ അസുന്തുലിതമായ വിതരണം മൂലമുണ്ടാകുന്ന പ്രാദേശിക അസമത്വങ്ങള് പരിഹരിക്കുന്നതിന് അനുയോജ്യമായ പ്രായോഗിക നടപടികള് സര്ക്കാര് സ്വീകരിക്കുന്നതാണ്. കാസര്കോഡ്, വയനാട്, ഇടുക്കി, കുട്ടനാട് പാക്കേജുകള് കാര്യക്ഷമമായി നടപ്പാക്കുകയും വികസനക്ഷേമ പ്രവര്ത്തനങ്ങളിലും അടിസ്ഥാന സൗകര്യ വികസനത്തിലും, ആരോഗ്യ-വിദ്യാഭ്യാസ രംഗത്തും മലബാര് ഉള്പ്പെടെയുള്ള പ്രദേശങ്ങള്ക്കും തീരദേശ മലയോര മേഖലയിലെ ജനസമൂഹത്തിനും പര്യാപ്തമായ വിഹിതം ഉറപ്പാക്കുകയും ചെയ്യുന്നതാണ്.
ആദിവാസി സമൂഹങ്ങളുടെ വിദ്യാഭ്യാസ പുരോഗതി, ഗവേഷണം, നൈപുണ്യ വികസനം, സാമൂഹ്യസാമ്പത്തിക പരിവര്ത്തനം എന്നിവ ലക്ഷ്യമാക്കി വയനാട് ട്രൈബല് സര്വകലാശാലയും തദ്ദേശീയ വിജ്ഞാന മേഖലയുമെന്ന പ്രധാന സംരംഭവും സര്ക്കാര് വിഭാവനം ചെയ്തിട്ടുണ്ട്. ഇത് വയനാട് ഉള്പ്പെടെയുള്ള പിന്നാക്ക ജില്ലകളിലെ വിദ്യാഭ്യാസ-ഗവേഷണ സാധ്യതകള്ക്ക് പുതിയ ദിശ നല്കുന്നതാണ്.
അംഗം ഉന്നയിച്ച ആശങ്കകള് സര്ക്കാര് ഗൗരവമായി ഉള്ക്കൊള്ളുന്നു. പുതിയ ജില്ലകളും, താലൂക്കുകളും രൂപീകരിക്കുന്നതിന്റൈ ആവശ്യകതയെ കുറിച്ച് പഠിക്കുന്നതിന് കമ്മീഷനെ നിയോഗിക്കുന്ന കാര്യം സര്ക്കാര് പരിശോധിച്ചു വരികയാണ്. ജില്ലാതല വികസന അസമത്വം കുറയ്ക്കുകയും, ജനസംഖ്യയും പിന്നാക്കാവസ്ഥയും പരിഗണിച്ചുള്ള വിഭവവിതരണം ഉറപ്പാക്കുകയും, മലബാര് ഉള്പ്പെടെയുള്ള സേവന ക്ഷാമമുള്ള പ്രദേശങ്ങള്ക്ക് പ്രത്യേക പരിഗണന നല്കുകയും ചെയ്യുന്ന നടപടികള് സ്വീകരിയ്ക്കാന് സര്ക്കാര് പ്രതിജ്ഞാബദ്ധമാണ്.
