കൊച്ചി: ദേശീയപാതാ നിർമാണം, പശ്ചാത്തല സൗകര്യ വികസനം എന്നിവയിൽ തന്ത്രപ്രധാന സഹകരണത്തിനൊരുങ്ങി പൊതുമേഖലാ എണ്ണക്കമ്പനിയായ ഭാരത് പെട്രോളിയം കോർപറേഷൻ ലിമിറ്റഡ് (ബിപിസിഎൽ). മേഖലയിലെ മുൻനിര കമ്പനികളായ ടിക്കി ടാർ ഇൻഡസ്ട്രീസ്, ഷെൽ ഗ്യാസ് ബിവി എന്നീ കമ്പനികളുമായിട്ടാണ് ബിപിസിഎൽ കരാറിലെത്തിയത്. കേന്ദ്ര സർക്കാരിന്റെ ഭാരത് മാല പരിയോജന പോലുള്ള അടിസ്ഥാന വികസന പദ്ധതികൾ കൂടുതൽ കാര്യക്ഷമമാക്കുകയും റോഡ്, റൺവേ നിർമാണ മേഖലയെ ആധുനികവൽക്കരിക്കുകയുമാണ് സഹകരണത്തിലൂടെ ലക്ഷ്യമിടുന്നത്. രാജ്യത്തെ അടിസ്ഥാന സൗകര്യ മേഖലയിൽ വലിയ വികസനം ഉറപ്പാക്കുന്ന പങ്കാളിത്തത്തിലൂടെ, പോളിമർ മോഡിഫൈഡ് ബിറ്റുമിൻ (പിഎംബി), ക്രമ്പ് റബർ മോഡിഫൈഡ് ബിറ്റുമിൻ (സിആർഎംബി) ബിറ്റുമിൻ എമൽഷനുകൾ തുടങ്ങിയ മൂല്യവർധിത ബിറ്റുമിൻ ഉത്പന്നങ്ങളുടെ വിപണനം ഉറപ്പാക്കും. കാലാവസ്ഥ മാറ്റങ്ങളെ പ്രതിരോധിക്കാൻ പര്യാപ്തമായതും കൂടുതൽ കാലം ഈടുനിൽക്കുന്നതുമായ ഇത്തരം ബിറ്റുമിൻ ഉത്പന്നങ്ങൾ റോഡുകൾ, റൺവേകൾ എന്നിവയുടെ നിർമാണത്തിന് വ്യാപകമായി ഉപയോഗിക്കാറുണ്ട്.
പരിസ്ഥിതി മലിനീകരണം കുറയ്ക്കുന്നതിനും ഉത്പന്ന നിർമാണ സമയത്തെ അവശിഷ്ടങ്ങൾ പുനരുപയോഗം ചെയ്യുന്ന രീതിയിൽ പുത്തൻ സാങ്കേതികവിദ്യ നടപ്പിലാക്കുമെന്നും ബിപിസിഎൽ അറിയിച്ചു. ഇതിനായി ഷെൽ ഗ്യാസ് ബിവിയുടെ ആധുനിക സാങ്കേതിക പരിജ്ഞാനവും ഗവേഷണ മികവും പ്രയോജനപ്പെടുത്തും. ബിപിസിഎല്ലിന്റെ വിപുലമായ വിതരണ സംവിധാനങ്ങൾക്കുപുറമെ, രാജ്യത്തെ തന്ത്രപ്രധാനമായ ആറ് ഇടങ്ങളിലുള്ള ടിക്കി ടാറിന്റെ ലോജിസ്റ്റിക് ശൃംഖലയും ഒത്തുചേരുന്നതോടെ വൻകിട പദ്ധതികൾ കൃത്യസമയത്തിനുള്ളിൽ പൂർത്തീകരിക്കാനാകും. രാജ്യത്തിന്റെ പശ്ചാത്തല വികസനം അതിവേഗത്തിലാണ് പുരോഗമിക്കുന്ന ഘട്ടത്തിൽ തന്ത്രപ്രധാനമായ പങ്കാളിത്തമാണ് ടിക്കി ടാർ ഇൻഡസ്ട്രീസ്, ഷെൽ ഗ്യാസ് ബിവി കമ്പനികളുമായി നടത്തുന്നതെന്ന് ബിപിസിഎൽ ചെയർമാനും മാനേജിങ് ഡയറക്ടറുമായ സഞ്ജയ് ഖന്ന അഭിപ്രായപ്പെട്ടു. പതിറ്റാണ്ടുകളായി വിവിധ മേഖലകളിൽ മികവ് തെളിയിച്ച സ്ഥാപനങ്ങളുടെ കൂട്ടായ സംരംഭമാണ് യാഥാർഥ്യമായതെന്ന് ടിടിഎസ്ഐപിൽ ചെയർമാനും ഷെൽ ഏവിയേഷൻ പ്രസിഡന്റുമായ രമൺ ഓജ പറഞ്ഞു.
Anu Maria Thomas
