കൊച്ചി: ലൈഫ് ഇൻഷുറൻസ് എടുക്കേണ്ടതിന്റെ പ്രാധാന്യം പൊതുജനങ്ങളെ ബോധവൽക്കരിക്കുന്നതിന്റെ ഭാഗമായി കോമിക് ബുക്ക് സീരിസ് അവതരിപ്പിച്ച് ഇൻഷുറൻസ് റെഗുലേറ്ററി ആൻഡ് ഡവലപ്മെന്റ് അതോറിറ്റി ഓഫ് ഇന്ത്യ (ഐആർഡിഎഐ). സങ്കീർണമായ ഇൻഷുറൻസ് നടപടിക്രമങ്ങളെയും പദങ്ങളെയും ലളിതമായി ആളുകളിലേക്കെത്തിക്കുകയാണ് ബുക്ക് അവതരിപ്പിക്കുന്നതിലൂടെ ലക്ഷ്യമിടുന്നത്. രാജ്യത്തെ പ്രമുഖ ലൈഫ് ഇൻഷുറൻസ് കമ്പനികളുടെ മേധാവികൾ പങ്കെടുത്ത ചടങ്ങിൽ ഐആർഡിഎഐ ചെയർമാൻ അജയ് സേഥ് പുസ്തകം പ്രകാശനം ചെയ്തു. വിവാഹിതരായ സ്ത്രീകളുടെ സ്വത്തവകാശത്തെക്കുറിച്ചും പ്രീമിയം അടയ്ക്കാൻ കഴിയാത്ത സാഹചര്യങ്ങളിൽ താത്കാലിക പരിരക്ഷ നല്കുന്നതിനെക്കുറിച്ചും പോളിസികളിൽ അധികമായി ചേർക്കാവുന്ന ക്രിട്ടിക്കൽ ഇൽനെസ് റൈഡറിനെക്കുറിച്ചും ആളുകൾക്ക് ഏറ്റവും വേഗത്തിൽ മനസ്സിലാക്കാവുന്ന രീതിയിലാണ് പുസ്തകമുള്ളത്. ഇൻഷുറൻസ് അഡ്വൈസർ സുപ്രിയ എന്ന കഥാപാത്രത്തിലൂടെയാണ് ഇൻഷുറൻസ് സംബന്ധമായ മുഴുവൻ കാര്യങ്ങളും വിശദീകരിക്കുന്നത്. അപ്രതീക്ഷിതമായ സാമ്പത്തിക ആവശ്യങ്ങൾ പരിഹരിക്കുന്നതിന് രാജ്യത്തെ ഓരോ കുടുംബങ്ങളെയും പര്യാപ്തമാക്കുകയാണ് ‘ഇൻഷുറൻസ് ഫോർ ഓൾ’ ക്യാംപെയിന്റെ ലക്ഷ്യമെന്ന് ഇൻഷുറൻസ് അഡ്വൈസറി കമ്മിറ്റി- ലൈഫ് ചെയർപേഴ്സൺ കമലേഷ് റാവു പറഞ്ഞു. സാമ്പത്തിക ആസൂത്രണത്തിന്റെ പ്രധാന ഭാഗമാക്കി ഇൻഷുറൻസിനെ മാറ്റാനും, ജനങ്ങൾക്കിടയിൽ കൂടുതൽ വിശ്വാസ്യത വളർത്താനും ഐആർഡിഎഐയുമായി ഒന്നിച്ച് പ്രവർത്തിക്കുമെന്ന് ലൈഫ് ഇൻഷുറൻസ് കൗൺസിൽ സെക്രട്ടറി ജനറൽ ആദിത്യ ഗുപ്ത അഭിപ്രായപ്പെട്ടു. ചടങ്ങിൽ ഇന്ത്യ ഫസ്റ്റ് ലൈഫ് ഇൻഷുറൻസ് എംഡിയും സിഇഒയുമായ ഋഷഭ് ഗാന്ധി, പിഎൻബി മെറ്റ്ലൈഫ് എംഡിയും സിഇഒയുമായ സമീർ ബൻസാൽ, ലൈഫ് ഇൻഷുറൻസ് കൗൺസിൽ എംഡി ദൊരൈസാമി എന്നിവർ പങ്കെടുത്തു.
Photo Caption: രാജ്യത്തെ പ്രമുഖ ലൈഫ് ഇൻഷുറൻസ് കമ്പനികളുടെ മേധാവികൾ പങ്കെടുത്ത ചടങ്ങിൽ ഐആർഡിഎഐ ചെയർമാൻ അജയ് സേഥ് പുസ്തകം പ്രകാശനം ചെയ്യുന്നു.
Athulya K R
