കൊച്ചി: ബ്രസീലിയൻ സംയുക്ത സംരംഭമായ ഐബിവി ബ്രസീൽ പെട്രോളിയോ ലിമിറ്റഡിൽ (ഐബിവി) വീഡിയോകോണിനുണ്ടായിരുന്ന ഓഹരിപങ്കാളിത്തം പൂർണമായും സ്വന്തമാക്കി രാജ്യത്തെ മുൻനിര പൊതുമേഖലാ എണ്ണക്കമ്പനിയായ ഭാരത് പെട്രോളിയം കോർപറേഷൻ ലിമിറ്റഡ് (ബിപിസിഎൽ). ആഗോള ഊർജ മേഖലയിലെ സാന്നിധ്യം ശക്തിപ്പെടുത്തുന്നതിന്റെ ഭാഗമായാണ് നടപടി. ബിപിസിഎല്ലിന്റെ എണ്ണ പര്യവേഷണ വിഭാഗമായ ഭാരത് പെട്രോറിസോഴ്സസ് ലിമിറ്റഡിന്റെ (ബിപിആർഎൽ) നേതൃത്വത്തിലാണ് ഏറ്റെടുക്കൽ പൂർത്തിയാക്കിയത്. നേരത്തെ, ഐബിവിയുടെ 65.40 ശതമാനം ഓഹരികളും ബിപിആർഎൽ സ്വന്തമാക്കിയിരുന്നു. ഏറ്റെടുക്കൽ പൂർത്തീകരിക്കുന്നതോടെ ബിപിആർഎല്ലിന്റെ പൂർണ നിയന്ത്രണത്തിലുള്ള അനുബന്ധ സ്ഥാപനമായി ബ്രസീൽ പെട്രോളിയോ ലിമിറ്റഡ് മാറും. ഓഹരി ഉടമകളുടെ മുൻഗണന അവകാശപ്രകാരമാണ് വിദേശ കമ്പനിയെ ഏറ്റെടുത്തത്. ബ്രസീലിയൻ അധികൃതരുടെ അനുമതിയും രജിസ്ട്രേഷൻ നടപടികളും പൂർത്തിയാക്കിയതായി ബിപിസിഎൽ അറിയിച്ചു.
ആഗോള എണ്ണവിതരണ മേഖലയിലുള്ള അനിശ്ചിതത്വങ്ങൾക്കിടയിൽ നിർണായകമായ ഏറ്റെടുക്കലാണ് ബിപിസിഎൽ നടത്തിയത്. എണ്ണ ലഭ്യതക്കായി ആഗോളതലത്തിൽ വിവിധ രാജ്യങ്ങളുമായി സഹകരിക്കുന്നത് ഇന്ത്യയുടെ ദീർഘകാല ഊർജ ആവശ്യങ്ങൾക്ക് കരുത്തുപകരും. ബ്രസീലിന്റെ വടക്കുകിഴക്കൻ തീരമേഖലയോടു ചേർന്ന്, അറ്റ്ലാന്റിക് സമുദ്രത്തിൽ സ്ഥിതി ചെയ്യുന്ന ബിഎം- സീൽ- 11, ബിഎം- സി- 30 എണ്ണപ്പാടങ്ങളിൽ ഐബിവിയ്ക്ക് പങ്കാളിത്തമുണ്ട്. ബിഎം- സീൽ- 11ൽനിന്നും പൂർണതോതിൽ ഉത്പാദനം ആരംഭിക്കുന്നതോടെ, പ്രതിവർഷം 10 ലക്ഷം ടൺ എണ്ണ, പ്രകൃതിവാതക ഉത്പന്നങ്ങൾ ഇന്ത്യയ്ക്ക് ലഭിക്കും. എണ്ണ പര്യവേഷണരംഗത്തെ സുപ്രധാന ചുവടുവെപ്പാണ് ഏറ്റെടുക്കലിലൂടെ പൂർത്തിയായതെന്ന് ബിപിസിഎൽ ചെയർമാനും മാനേജിങ് ഡയറക്ടറുമായ സഞ്ജയ് ഖന്ന പറഞ്ഞു.
Anu Maria Thomas
