മാരാങ്കോട് ഉന്നതിയിലെ കുട്ടികൾക്ക് ഓണക്കോടി നൽകി ഇസാഫ് ബാങ്ക്

മണ്ണുത്തി: ഓണാഘോഷങ്ങളുടെ ഭാഗമായി മാരാങ്കോട് ഉന്നതിയിലെ കുട്ടികൾക്ക് ഇസാഫ് സ്‌മോൾ ഫിനാൻസ് ബാങ്ക് നൽകുന്ന ഓണക്കോടികൾ ജില്ലാ കളക്ടർ ശിഖാ സുരേന്ദ്രന് കൈമാറി. ഇസാഫ് ബാങ്ക് ആസ്ഥാനത്ത് സംഘടിപ്പിച്ച ഓണാഘോഷത്തിന്റെ ഉദ്‌ഘാടന വേളയിലാണ് ഓണക്കോടികളുടെ വിതരണോദ്‌ഘാടനം നടത്തിയത്. സഹജീവികളെ ചേർത്തുനിർത്തുന്ന മഹത്തരമായ സന്ദേശമാണ് ഓണം നൽകുന്നതെന്നും അത്തരത്തിൽ മാതൃകാപരമായ പ്രവർത്തനങ്ങളാണ് ഇസാഫ് കാഴ്ച്ചവെക്കുന്നതെന്നും കളക്ടർ പറഞ്ഞു. ഇസാഫ് സ്റ്റാഫ് വെൽഫെയർ ട്രസ്റ്റ് ചെയർമാനും ഇസാഫ് കോഓപ്പറേറ്റീവ് സിഇഒയുമായ ജോർജ് തോമസ് അധ്യക്ഷത വഹിച്ച ചടങ്ങിൽ ഇസാഫ് സ്‌മോൾ ഫിനാൻസ് ബാങ്ക് എംഡിയും സിഇഒയുമായ ഡോ. കെ പോൾ തോമസ് മുഖ്യസന്ദേശം നൽകി. ഓണാഘോഷത്തിന്റെ ഭാഗമായി ഇസാഫ് ഗ്രൂപ്പ് ജീവനക്കാരുടെ കലാപരിപാടികളും സംഘടിപ്പിച്ചു. സമാപന സമ്മേളനത്തിൽ കേരള കാർഷിക സർവകലാശാല വൈസ് ചാൻസലർ ഡോ. ടി സജിത റാണി ഓണസന്ദേശം നൽകി. ഇസാഫ് ഫൗണ്ടേഷൻ എക്സിക്യുട്ടീവ് ഡയറക്ടർ മെറീന പോൾ, ഇസാഫ് ബാങ്ക് എക്സിക്യുട്ടീവ് ഡയറക്ടർ ജോർജ് കെ ജോൺ, എക്സിക്യുട്ടീവ് വൈസ് പ്രസിഡന്റുമാരായ സുദേവ് കുമാർ വി, ബോസ്‌കോ ജോസഫ്, ഗിരീഷ് സി പി, സെഡാർ റീട്ടെയിൽ എംഡി അലോക് തോമസ് പോൾ, ഇസാഫ് സ്റ്റാഫ് വെൽഫെയർ ട്രസ്റ്റ് ബോർഡ് മെമ്പർ ഷൈനി വർഗീസ് എന്നിവർ പ്രസംഗിച്ചു.