തിരുവനന്തപുരം : കെ.പി.സി.സി.യുടെ ഔദ്യോഗിക പ്രസിദ്ധീകരണ വിഭാഗമായ പ്രിയദർശിനി പബ്ലിക്കേഷൻസ് ഏർപ്പെടുത്തിയിട്ടുള്ള മൂന്നാമത് പ്രിയദർശിനി സാഹിത്യ പുരസ്കാരത്തിന്റെ നിർണയത്തിനായി സമിതിയെ തീരുമാനിച്ചതായി കെ.പി.സി.സി. പ്രസിഡന്റ് അഡ്വ. സണ്ണി ജോസഫ് അറിയിച്ചു.
ഒരു ലക്ഷം രൂപയും പ്രശസ്തിപത്രവും ആർട്ടിസ്റ്റ് ബി.ഡി. ദത്തൻ രൂപകൽപ്പന ചെയ്യുന്ന ശിൽപ്പവും അടങ്ങുന്നതാണ് പ്രിയദർശിനി സാഹിത്യ പുരസ്കാരം. മുൻ വർഷങ്ങളിൽ ടി. പത്മനാഭനും പ്രൊഫ. എം. ലീലാവതിയുമാണ് പ്രിയദർശിനി സാഹിത്യ പുരസ്കാരത്തിന് അർഹരായത്.
പുരസ്കാര നിർണയ സമിതി അംഗങ്ങളായി കെ.സി. നാരായണൻ (ചെയർമാൻ), ഇ. സന്തോഷ് കുമാർ (അംഗം), സുധാ മേനോൻ (അംഗം), അഡ്വ. പഴകുളം മധു എം.എൽ.എ. (മെമ്പർ സെക്രട്ടറി) എന്നിവരടങ്ങുന്ന നാലംഗ സമിതിയെയാണ് നാമനിർദേശം ചെയ്തതെന്ന് കെ.പി.സി.സി. പ്രസിഡന്റ് അറിയിച്ചു.
