തൃശൂർ : മൈസൂരിൽ ഉണ്ടായ വാഹനാപകടത്തിൽ തൃശൂർ വരവൂർ സ്വദേശിനിയായ നഴ്സിംഗ് വിദ്യാർഥിനി മരിച്ചു. വരവൂർ കുമരപ്പനാലിൽ കുന്നത്ത് വീട്ടിൽ സുരേന്ദ്രന്റെ മകൾ ആര്യ (18) ആണ് മരിച്ചത്.
മൈസൂർ ആദി ചുഞ്ചനഗിരി മെഡിക്കൽ കോളേജിലെ ബി.എസ്.സി നഴ്സിംഗ് വിദ്യാർഥിനിയായിരുന്നു ആര്യ. മെയ് 26 – ന് വൈകീട്ടാണ് അപകടം ഉണ്ടായത്. കോളേജിൽ നിന്ന് പിതാവിനോടൊപ്പം കാറിൽ നാട്ടിലേക്ക് മടങ്ങുന്നതിനിടെയാണ് അപകടമുണ്ടായത്. ഇവർ സഞ്ചരിച്ചിരുന്ന കാറിൽ എതിരെ വന്ന മറ്റൊരു കാർ ഇടിക്കുകയായിരുന്നു.
അപകടത്തിൽ ഗുരുതരമായി പരിക്കേറ്റ ആര്യയെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. പിതാവ് സുരേന്ദ്രന് പരിക്കേറ്റെങ്കിലും അപകടഭീഷണിയില്ലെന്നാണ് ലഭിക്കുന്ന വിവരം.
കോളേജിലെ ഭക്ഷണവും താമസ സൗകര്യങ്ങളും തൃപ്തികരമല്ലാത്തതിനാൽ പഠനം അവസാനിപ്പിച്ച് പിതാവിനൊപ്പം നാട്ടിലേക്ക് മടങ്ങുന്നതിനിടെയായിരുന്നു അപകടമുണ്ടായതെന്ന വിവരം ബന്ധുക്കൾ അറിയിച്ചു.
മാതാവ് സിനി, സഹോദരൻ ആകാശ്. സംസ്കാരം പിന്നീട് നടക്കും.
