മലങ്കര മാർത്തോമ്മാ സുറിയാനി സഭയുടെ ചരിത്രത്തെക്കുറിച്ചുള്ള ലാൽ വർഗീസിന്റെ രണ്ടാം ഗ്രന്ഥം ആമസോൺ കിൻഡിൽ ഇ-ബുക്കിൽ

ഡാലസ്: അമേരിക്കയിലെ ഡാലസിൽ അഭിഭാഷകനായ ലാൽ വർഗീസിന്റെ രണ്ടാം ഗ്രന്ഥമായ “A Faith Journey: Milestones in the History of the Malankara Mar Thoma Syrian Church” ആമസോൺ Kindle eBooks പ്ലാറ്റ്‌ഫോമിലൂടെ ലോകമെമ്പാടുമുള്ള വായനക്കാർക്ക് ഇപ്പോൾ ലഭ്യമാണ്. അമേരിക്കയിൽ ഇതിന്റെ വില 5.99 യു.എസ്. ഡോളർ മാത്രമാണ്.

മലങ്കര മാർത്തോമ്മാ സുറിയാനി സഭയുടെ ചരിത്രം, പൈതൃകം, വിശ്വാസം, ആരാധനാക്രമം (ലിറ്റർജി), കൂട്ടായ ആരാധന, സഭാപാരമ്പര്യങ്ങൾ, നവീകരണ പ്രസ്ഥാനം എന്നിവയെ സമഗ്രമായും സംക്ഷിപ്തമായും പരിചയപ്പെടുത്തുന്ന ഗ്രന്ഥമാണിത്. പ്രത്യേകിച്ച് മാർത്തോമ്മാ സഭയുടെ അടുത്ത തലമുറയ്ക്ക് അവരുടെ സഭയുടെ വിശ്വാസപാരമ്പര്യവും ആത്മീയ പൈതൃകവും ആഴത്തിൽ മനസ്സിലാക്കുന്നതിനും സംരക്ഷിക്കുന്നതിനും ഈ ഗ്രന്ഥം സഹായകമാകുമെന്ന പ്രത്യാശയിലാണ് ഇത് പ്രസിദ്ധീകരിച്ചിരിക്കുന്നത്.

മലങ്കര മാർത്തോമ്മാ സഭയുടെ ചരിത്രം അചഞ്ചലമായ വിശ്വാസത്തിന്റെയും നവീകരണാത്മക ദർശനത്തിന്റെയും സുവിശേഷമൂല്യങ്ങളോടുള്ള പ്രതിബദ്ധതയുടെയും തെളിവാണ്. കിഴക്കൻ സഭയുടെ സമ്പന്നമായ പാരമ്പര്യത്തിൽ വേരൂന്നിക്കൊണ്ട് കാലാനുസൃതമായ നവീകരണം സ്വീകരിച്ച സഭയുടെ യാത്രയാണ് ഈ ഗ്രന്ഥം അവതരിപ്പിക്കുന്നത്.

വടക്കേ അമേരിക്കയുൾപ്പെടെ പ്രവാസരാജ്യങ്ങളിൽ വളർന്നുവരുന്ന രണ്ടും മൂന്നും തലമുറകളെ സഭയുടെ വിശ്വാസത്തിലും പാരമ്പര്യത്തിലും നിലനിർത്തുക എന്നത് ഇന്ന് സഭ നേരിടുന്ന ഏറ്റവും വലിയ വെല്ലുവിളികളിലൊന്നാണ്. സാംസ്കാരിക അകലം, തലമുറകൾ തമ്മിലുള്ള വ്യത്യാസങ്ങൾ, നാമമാത്ര സഭകളുടെയും സ്വതന്ത്ര സഭകളുടെയും ആകർഷണം തുടങ്ങിയ സാഹചര്യങ്ങളിൽ സഭയുടെ അടിസ്ഥാന സ്വത്വം സംരക്ഷിച്ചുകൊണ്ട് കാലാനുസൃതമായ മാറ്റങ്ങൾ സ്വീകരിക്കേണ്ടതിന്റെ ആവശ്യകത ഈ ഗ്രന്ഥം ചൂണ്ടിക്കാണിക്കുന്നു.

നമ്മുടെ പൂർവികർ വിശ്വാസത്തിനുവേണ്ടി നടത്തിയ ത്യാഗങ്ങളും സഭയുടെ വളർച്ചയ്ക്കുവേണ്ടി നൽകിയ സംഭാവനകളും പുതിയ തലമുറയ്ക്ക് പരിചയപ്പെടുത്തുന്നതിലൂടെ സഭയോടുള്ള ആത്മബന്ധവും ഉത്തരവാദിത്വബോധവും വളർത്തിയെടുക്കുകയാണ് ഗ്രന്ഥത്തിന്റെ ലക്ഷ്യം.

രണ്ടും മൂന്നും തലമുറയിലെ അംഗങ്ങളുടെ ആത്മീയവും സാംസ്കാരികവുമായ ആവശ്യങ്ങൾ മനസ്സിലാക്കി ഉൾക്കൊള്ളുന്ന ശുശ്രൂഷ, സാംസ്കാരിക ബോധമുള്ള വൈദിക നേതൃത്വം, പ്രസക്തമായ ആരാധനാരീതികൾ, യുവജനങ്ങൾക്ക് നേതൃത്വത്തിൽ പങ്കാളിത്തം എന്നിവ സഭയുടെ ഭാവിക്ക് അനിവാര്യമാണെന്ന് ഗ്രന്ഥകാരൻ വിലയിരുത്തുന്നു. “ഒരു ഇടവക – ഒരു സമൂഹം” എന്ന കാഴ്ചപ്പാടിലൂടെ ഐക്യം വളർത്തിയെടുക്കുകയും എല്ലാ തലമുറകളെയും ഒരുമിച്ച് കൂട്ടുകയും ചെയ്യുമ്പോഴേ സഭയുടെ ദൗത്യം വരുംതലമുറകളിലേക്ക് ഫലപ്രദമായി കൈമാറാൻ കഴിയൂ എന്നും ഗ്രന്ഥം ഊന്നിപ്പറയുന്നു.

ഈ ഗ്രന്ഥത്തിന് ഡോ. തിയഡോഷ്യസ് മാർത്തോമ്മാ മെത്രാപ്പോലീത്ത ആമുഖം (Foreword) എഴുതിയിട്ടുണ്ട്. വടക്കേ അമേരിക്കാ ഭദ്രാസനാധ്യക്ഷൻ ഡോ. എബ്രഹാം മാർ പൗലോസ് എപ്പിസ്കോപ്പയും, ഇംഗ്ലണ്ടിലെ ആദ്യകാല മാർത്തോമ്മാ പ്രവാസിയും പണ്ഡിതനുമായ ഡോ. സാക്ക് വർഗീസ് ആശംസാസന്ദേശങ്ങൾ നൽകിയിട്ടുണ്ട്.

ഗ്രന്ഥത്തിന്റെ എഡിറ്റിംഗും മുഖവുരയും നിർവഹിച്ച റവ. ഡോ. ജെയിംസൺ കെ. പള്ളിക്കുന്നേലിനോടും, കൈയെഴുത്തുപ്രതി സൂക്ഷ്മമായി പരിശോധിക്കുകയും മുഴുവൻ പ്രവർത്തനങ്ങളിലും സഹകരിക്കുകയും ചെയ്ത ഭാര്യ കൊച്ചുമോളോടും ഗ്രന്ഥകാരൻ ഹൃദയം നിറഞ്ഞ നന്ദി രേഖപ്പെടുത്തുന്നു.

മാർത്തോമ്മാ സഭയുടെ ചരിത്രം, വിശ്വാസം, ആരാധന, ലിറ്റർജി, സഭാപാരമ്പര്യം, കൂട്ടായ ആരാധനയുടെ പ്രാധാന്യം എന്നിവ പുതിയ തലമുറയ്ക്ക് കൂടുതൽ ആഴത്തിൽ മനസ്സിലാക്കാൻ ഈ ഗ്രന്ഥം ഉപകരിക്കുമെന്നാണ് ഗ്രന്ഥകാരന്റെ പ്രത്യാശയും പ്രാർത്ഥനയും.

ശ്രദ്ധിക്കുക: ഈ ഗ്രന്ഥത്തിന്റെ വിൽപ്പനയിൽ നിന്നുള്ള മുഴുവൻ വരുമാനവും മലങ്കര മാർത്തോമ്മാ സുറിയാനി സഭയുടെ സ്ഥാപനമായ ആലുവ ശാന്തിഗിരി ആശ്രമം സ്ഥാപിച്ച “ശാന്തിഗിരി എൻഡോവ്‌മെന്റ് ഫണ്ടിലേക്ക്” സംഭാവനയായി നൽകുന്നതാണ്.

A Faith Journey: Milestones in the History of Malankara Mar Thoma Syrian Church – Kindle edition by Varghese, Lal . Religion & Spirituality Kindle eBooks @ Amazon.com.
— ലാൽ വർഗീസ്
Attorney at Law
Dallas, Texas, USA